వామ్మో అంత రేటా..? కేజీ రూ. 83కి చేరిన సన్నబియ్యం.. ఇక.. సెంచరీ ఖాయమా?

గత నాలుగు నెలలుగా దేశంలో, ముఖ్యంగా తెలుగు రాష్ట్రాల్లో బియ్యం ధరలు ఆకాశాన్నంటుతున్నాయి. కిలో సన్నబియ్యం ధర రూ.50-55 నుంచి ఏకంగా రూ.83కు చేరగా, నాణ్యత తక్కువ గల బియ్యం కూడా రూ.60 పైనే పలుకుతోంది. ప్రస్తుత ధోరణి చూస్తుంటే, కిలో బియ్యం ధర రూ.100 దాటే ప్రమాదం ఉందని ప్రజలు ఆందోళన చెందుతున్నారు. ఈ ధరల పెరుగుదలకు అనేక కారణాలున్నాయి. మాయదారి ఎల్‌నినో ప్రభావంతో వర్షాలు తగ్గడం, ధాన్యం దిగుబడి తగ్గిపోవడం ప్రధానం. యాసంగి సాగు విస్తీర్ణం కూడా తగ్గడంతో మార్కెట్లో సన్నధాన్యానికి తీవ్ర కొరత ఏర్పడింది. మరోవైపు, తెలంగాణలో పండే సన్న రకం ధాన్యానికి పొరుగు రాష్ట్రాలైన కర్ణాటక, మహారాష్ట్ర, ఆంధ్రప్రదేశ్‌లలో విపరీతమైన డిమాండ్ ఉంది. దీంతో అక్కడి వ్యాపారులు నేరుగా కొనుగోలు చేసి బెంగళూరు, ముంబై, చెన్నై వంటి నగరాలకు తరలించడంతో స్థానికంగా కొరత ఏర్పడుతోంది. మిల్లర్ల అక్రమాలు కూడా ధరల పెరుగుదలకు దారితీస్తున్నాయి. గతంలో అరువుపై బియ్యం ఇచ్చిన మిల్లర్లు, ఇప్పుడు నగదు ఇస్తేనే బియ్యం ఇస్తామని షరతు విధించడంతో రిటైల్ వ్యాపారులు ధరలు పెంచుతున్నారు. విజిలెన్స్ తనిఖీల్లో వెల్లడైన రూ.2000 కోట్ల విలువైన ప్రభుత్వ ధాన్యం మాయం, రేషన్ బియ్యం రీసైక్లింగ్ వంటి అక్రమాలు కృత్రిమ కొరతను సృష్టిస్తున్నాయి. ఈ సంక్షోభాన్ని పరిష్కరించేందుకు ప్రభుత్వం తక్షణమే కఠిన చర్యలు తీసుకోవాలని ప్రజలు కోరుతున్నారు.