ఎల్‌ఐసీ పాలసీదారులకు షాక్.. నవంబర్ 30 నుంచి కొన్ని పాలసీలు బంద్!

మీకు ఎల్‌ఐసీ బీమా ఉందా.. అయితే మీకో షాకింగ్ న్యూస్..! లైఫ్ ఇన్సూరెన్స్ కార్పొరేషన్ అఫ్ ఇండియా(ఎల్ఐసీ) తమ కస్టమర్లకు షాక్ ఇచ్చింది. డిసెంబర్ 1 నుంచి కొన్ని బీమా పాలసీలు నిలిపేసేందుకు నిర్ణయం తీసుకుంది. జీవన్ ఆనంద్, జీవన్ ఉమాంగ్, జీవన్ లక్ష్యతోపాటు జీవన్ లాభ్ లాంటి సుమారు 12 రకాల బీమా పథకాలను, పలు రకాల గ్రూప్ ఇన్సూరెన్స్ పాలసీలను, ఇతర రైడర్లు నవంబర్ 30 తర్వాత నుంచి కనుమరుగు కానున్నాయి.

ఇన్సూరెన్స్ బీమా రెగ్యులేటర్ సవరించిన కస్టమర్- సెంట్రిక్ పాలసీ రూల్స్ ప్రకారం ఎల్ఐసీ ఈ మేరకు సవరణలు చేసినట్లు తెలుస్తోంది. ఇదిలా ఉండగా కొత్త పాలసీలకు మాత్రం బోనస్ రేట్లు తక్కువగా.. ప్రీమియమ్ రేట్లు అధికంగా ఉంటాయని సంస్థ తెలిపింది.

మరోవైపు ఎల్ఐసీ.. జూలై 8, 2019న జారీ చేయబడిన కొత్త నాన్- లింక్డ్, లింక్డ్ ఇన్సూరెన్స్ పాలసీ రెగ్యులేషన్స్‌కు కట్టుబడకపోవడంతోనే దాదాపు 75-80 శాతం జీవిత బీమా పాలసీలు నవంబర్ 30న మూసివేయనున్నారని సమాచారం. దీంతో సదురు పాలసీలను నవంబర్ 30 కంటే ముందే తీసుకోవాలని వినియోగదారులను ఎల్ఐసీ ఏజంట్లు కోరుతున్నారు.

మరోవైపు ఎల్ఐసీ అధికారి ఒకరు మాట్లాడుతూ ‘కొన్ని బీమా పాలసీలను నవంబర్ 30కి మూసివేస్తున్నామని.. ఆ తర్వాత వాటిని కాస్త సవరించి కొత్త పేర్లతో మళ్ళీ వినియోగదారులకు అందుబాటులోకి తీసుకొస్తామని’ తెలిపారు.  దీని బట్టి చూస్తే కొత్త పాలసీ తీసుకోవాలనుకునే వారు ఈ నెల ఆగడం ఉత్తమమే అని చెప్పాలి.