Shortness of Breath: మీకూ ఉన్నట్లుండి ఊపిరి బిగపట్టి.. ఉక్కిరిబిక్కిరి అవుతుందా? ఇలా ఎందుకు జరుగుతుందంటే..
కొన్ని సందర్భాల్లో శ్వాస తీసుకోవడంలో ఇబ్బంది తలెత్తుంది. ఇలా ఎందుకు జరుగుతుందో చాలా మందికి అర్ధం కాదు. పైగా దీనిని సాధారణ విషయంగా పరిగణించి నిర్లక్ష్యం వహిస్తుంటారు. ఇలాంటి శ్వాస సంబంధిత సమస్యలను ఎట్టి పరిస్థితుల్లోనూ తక్కువగా అంచనా వేయకూడదు. ఎందుకంటే..
Updated on: Apr 24, 2026 | 1:44 PM
నేటి కాలంలో శ్వాసకోశ సంబంధిత ఆరోగ్య సమస్యలు చాలా మందిని వెంటాడుతున్నాయి. కానీ దీని గురించి శ్రద్ధ తీసుకునే వారికంటే నిర్లక్ష్యం చేసే వారే ఎక్కువ. ఇలాంటి సమస్యలకు సరైన సమయంలో చికిత్స తీసుకోకపోవడం చాలా ప్రమాదకరం. అది శరీరం పలు తీవ్ర సమస్యలకు సంకేతం కావచ్చు. కాబట్టి శ్వాసకోశ సంబంధిత సమస్యలకు కారణమేమిటి? దీని లక్షణాలు ఏమిటి? ఈ రకమైన సమస్య బారిన పడే ప్రమాదం ఎవరికి ఎక్కువగా ఉంది? అనే విషయాలు ఇక్కడ తెలుసుకుందాం..
శ్వాస ఆడకపోవడానికి కారణాలు
అధిక శారీరక శ్రమ, శరీర బలహీనత, అధిక బరువు, మానసిక ఒత్తిడి, ఆందోళన వంటివి శ్వాస సమస్యలకు కారణం కావచ్చు. దుమ్ము, కాలుష్యం, వాతావరణ మార్పులు, అలెర్జీ సమస్యలు కూడా శ్వాసను ప్రభావితం చేస్తాయి.
ఏయే వ్యాధులకు ఇది సంకేతం
నిరంతరాయంగా ఆయాసం రావడం అనేది ఆస్తమా, బ్రాంకైటిస్, ఇతర ఊపిరితిత్తుల సంబంధిత వ్యాధుల లక్షణం. అంతేకాకుండా గుండె వైఫల్యం, రక్తనాళాలలో అడ్డంకులు వంటి గుండె సంబంధిత సమస్యలు కూడా ఆయాసానికి కారణం కావచ్చు. రక్తహీనత ఉన్నవారి శరీరానికి తగినంత ఆక్సిజన్ అందకపోవడం వల్ల ఆయాసం వచ్చే అవకాశం ఉంది. కొన్ని సందర్భాల్లో థైరాయిడ్ అసమతుల్యతలు, ఊపిరితిత్తుల ఇన్ఫెక్షన్లు కూడా దీనికి కారణం కావచ్చు. ఒకవేళ ఆయాసంతో పాటు ఛాతీ నొప్పి, తల తిరగడం, తీవ్రమైన అలసట వంటి లక్షణాలు ఉంటే వెంటనే వైద్యుడిని సంప్రదించాలి.
దీనివల్ల ఎవరికి ఎక్కువ ప్రమాదం?
వృద్ధులు, ధూమపానం చేసేవారు, కాలుష్య ప్రాంతాలలో నివసించేవారు, అధిక బరువు ఉన్నవారు ఈ సమస్యకు ఎక్కువగా గురవుతారు. శారీరక శ్రమ లేని జీవనశైలి ఉన్నవారిలో కూడా ఇది సాధారణంగా కనిపిస్తుంది.
దీన్ని ఎలా నివారించాలి?
క్రమమైన వ్యాయామం ఊపిరితిత్తుల సామర్థ్యాన్ని పెంచి, ఆరోగ్యాన్ని మెరుగుపరుస్తుంది. సమతుల్య ఆహారం తీసుకోవడం, ధూమపానం మానుకోవడం మంచిది. కాలుష్యం నుంచి రక్షించుకోవడానికి, పరిశుభ్రతను పాటించడానికి మాస్క్ ధరించాలి.
నోట్: ఇక్కడ ఇచ్చిన సమాచారం కేవలం అవగాహన కోసం మాత్రమే. టీవీ9 తెలుగు ఈ విషయాలను నిర్ధారించడం లేదు. పూర్తి వివరాలకు సంబంధిత నిపుణులను సంప్రదించడం మంచిది.
మరిన్ని ఆరోగ్య కథనాల కోసం ఇక్కడ క్లిక్ చేయండి.
