డయాబెటిస్ రోగులకు అలర్ట్.. చలికాలంలో రక్తంలో షుగర్ లెవల్ ఎందుకు పెరుగుతుందో తెలుసా..?

ప్రస్తుత కాలంలో చాలామంది డయాబెటిస్‌తో బాధపడుతున్నారు.. ఇలాంటి పరిస్థితుల్లో ఆరోగ్యాన్ని కాపాడుకోవడం ముఖ్యం.. అయితే.. మీరు కూడా డయాబెటిక్ పేషెంట్ అయితే ఈ శీతాకాలంలో మీ షుగర్ లెవెల్ పెరిగే అవకాశం ఉంది.. ఎందుకంటే వేసవితో పోలిస్తే చలికాలంలో మనం ఎక్కువగా తింటాము. ఈ సీజన్‌లో వ్యాయామం కూడా తగ్గుతుంది. మారిన ఆహారపు అలవాట్లు, జీవనశైలిలో మార్పుల వల్ల చలికాలంలో షుగర్ లెవెల్ మరింత పెరిగే ప్రమాదం ఉంది. అటువంటి పరిస్థితిలో, దానిని నియంత్రించడం చాలా ముఖ్యం. అయితే.. కొన్ని పద్దతుల ద్వారా ఈ సీజన్‌లో పెరిగిన షుగర్ లెవల్స్‌ను నియంత్రించవచ్చని నిపుణులు చెబుతున్నారు.

చలికాలంలో తక్కువ వ్యాయామం చేస్తారని, దీని వల్ల శరీరంలో ఇన్సులిన్ రెసిస్టెన్స్ ఏర్పడి షుగర్ లెవెల్ పెరుగుతుందని ఢిల్లీలోని జీటీబీ ఆస్పత్రిలోని మెడిసిన్ విభాగంలో డాక్టర్ అజిత్ కుమార్ చెబుతున్నారు. ఈ సీజన్‌లో శరీరంలో హార్మోన్ల మార్పులు చోటుచేసుకుంటాయి. శరీరంలో కార్టిసాల్ హార్మోన్ స్థాయి పెరుగుతుంది. ఈ హార్మోన్ చక్కెర స్థాయిని పెంచుతుంది.

వాస్తవానికి శీతాకాలంలో సూర్యరశ్మి తక్కువగా ఉంటుంది.. విటమిన్ డి లోపం ఉండవచ్చు.. ఇది చక్కెర స్థాయిని కూడా పెంచుతుంది. అటువంటి పరిస్థితిలో దానిని నియంత్రించడం చాలా ముఖ్యం. దీని కోసం మీరు కొన్ని పద్ధతులను అనుసరించాలి.

రోజువారీ వ్యాయామం..

చలికాలంలో కూడా మీరు క్రమం తప్పకుండా వ్యాయామం చేయడం చాలా ముఖ్యం. వ్యాయామం చేయడం వల్ల బ్లడ్ షుగర్ అదుపులో ఉంటుంది. ఇది శరీరం రోగనిరోధక వ్యవస్థను బలపరుస్తుంది. డయాబెటిక్ పేషెంట్లు చలికాలంలో కూడా కనీసం 30 నిమిషాల పాటు వ్యాయామం చేయడం చాలా అవసరం.. అయితే వారు ఉదయం చాలా త్వరగా వ్యాయామం చేయకూడదని గుర్తుంచుకోండి. ఉదయం పూట ఉష్ణోగ్రత తక్కువగా ఉండడమే ఇందుకు కారణం. తక్కువ ఉష్ణోగ్రతలో వ్యాయామం చేయడం వల్ల ఆరోగ్యం పాడవుతుంది. డయాబెటిక్ పేషెంట్లు విపరీతమైన చలికాలంలో ఇంటి లోపల వ్యాయామం చేయాలని డాక్టర్ సూచించారు. మీకు డయాబెటిస్‌తో పాటు గుండె జబ్బులు లేదా మూత్రపిండాల వ్యాధి ఉంటే బయట వ్యాయామం చేయడాన్ని ఆపాలని పేర్కొన్నారు.

మీ ఆహారం పట్ల శ్రద్ధ వహించండి..

మధుమేహ వ్యాధిగ్రస్తులు చలికాలంలో ఆహారపు అలవాట్ల విషయంలో ప్రత్యేక శ్రద్ధ తీసుకోవాలి. కూరగాయలు, పండ్లు, బాదం వంటి డ్రై ఫ్రూట్స్ మీ ఆహారంలో చేర్చుకోవాలి. శీతాకాలంలో, మీరు చాలా స్వీట్లు తినకూడదు లేదా మీరు బ్రెడ్ లేదా పిండితో చేసిన ఏదైనా తినకూడదు. ఈ రకమైన ఆహారంలో కార్బోహైడ్రేట్లు ఎక్కువగా ఉంటాయి.. ఇది చక్కెర స్థాయిని పెంచుతుంది. పప్పులు, కిడ్నీ బీన్స్, ఉసిరి వంటివి మీ ఆహారంలో చేర్చుకోవడానికి ప్రయత్నించండి.

రెగ్యులర్ చెకప్‌లు..

ఈ రెండు విషయాలు కాకుండా, మీరు మీ రక్తంలో చక్కెరను క్రమం తప్పకుండా తనిఖీ చేయడం కూడా ముఖ్యం. ప్రతిరోజూ ఒకటి లేదా రెండుసార్లు మీ చక్కెరను తనిఖీ చేయండి.. దీనికోసం ఒక చార్ట్‌ను రూపొందించండి. షుగర్ లెవెల్ సాధారణంగా ఉంటే సమస్య ఉండదు. అయితే షుగర్ లెవెల్ పెరిగితే మాత్రం వైద్యులను సంప్రదించాలి. ఈ విషయంలో అజాగ్రత్తగా ఉండకండి.

(నోట్‌: ఇందులోని అంశాలు కేవలం అవగాహన కోసం మాత్రమే. పలు వార్తా కథనాలు, నిపుణుల సలహాలు, సూచనల మేరకు అందించడం జరిగింది. ఏవైనా సందేహాలు ఉంటే ఆరోగ్య నిపుణులను సంప్రదించండి.)

మరిన్ని హెల్త్ వార్తల కోసం ఇక్కడ క్లిక్ చేయండి..