జాతకం ప్రకారం 2004లో ఆమె కెరీర్ ముగుస్తుందని చెప్పారు.. కానీ జీవితమే..

తెలుగు సినిమా కథానాయికల్లో సౌందర్యది ప్రత్యేక స్థానం. తెలుగు చిత్ర పరిశ్రమకు లభించిన అరుదైన నటిగా ఆమె గుర్తింపు పొందారు. కేవలం అభినయంతోనే రాణించవచ్చని ఆమె నిరూపించి అగ్రస్థానం అందుకున్నారు. కన్నడ చిత్ర పరిశ్రమ నుంచి తెలుగులోకి వచ్చిన సౌందర్య తండ్రి, సత్యనారాయణ ఒక రచయిత, దర్శకుడు, నిర్మాత. తెలుగులో ఆమె అంగీకరించిన తొలి సినిమా “రైతుభారతం”. ఈ చిత్ర నిర్మాణ సమయంలోనే ఆమెకు “మనవరాలి పెళ్ళి” చిత్రంలో నటించే అవకాశం లభించింది. “రైతుభారతం” నిర్మాణంలో జాప్యం జరగడంతో “మనవరాలి పెళ్ళి” మొదట విడుదలైంది. సౌందర్య అసలు పేరు సౌమ్య. “రైతుభారతం” దర్శకుడు త్రిపురనేని శ్రీప్రసాద్ ఆమెను బెంగళూరులో చూడటానికి వెళ్ళినప్పుడు, ఆమె తండ్రి సత్యనారాయణతో మాట్లాడారు. త్రిపురనేని శ్రీప్రసాద్ సూచన మేరకు సత్యనారాయణ జాతకం ప్రకారం “సౌందర్య” అనే పేరును సూచించారు, అది ఆమోదించబడింది. సత్యనారాయణ తన కుమార్తె జాతకం గురించి మాట్లాడుతూ, ఆమె అగ్ర హీరోల సరసన ఎనిమిదేళ్ళు బిజీగా ఉంటుందని, 2004లో ఆమె కెరీర్ ముగుస్తుందని అంచనా వేశారు. ఇది దాదాపు నిజమైంది, కానీ 2004లో ఆమె జీవితమే ముగుస్తుందని ఎవరూ ఊహించలేదు.

“మనవరాలి పెళ్ళి” చిత్రం తర్వాత ఆమెకు “అమ్మోరు”లో అవకాశం లభించింది. అయితే, ఆ చిత్రం పూర్తి కావడానికి ఐదేళ్ళు పట్టింది. “రాజేంద్రుడు – గజేంద్రుడు” సినిమాతో సౌందర్య తన తొలి శతదినోత్సవ షీల్డ్‌ను అందుకున్నారు. ఆ తర్వాత ఎస్.వి. కృష్ణారెడ్డి దర్శకత్వంలో “మాయలోడు”, “టాప్ హీరో”, “పెళ్ళిపీటలు”, “ప్రేమకు వేళాయెరా”, “సర్దుకుపోదాం రండి”, “ప్రేమకు స్వాగతం” వంటి చిత్రాల్లో నటించారు. “యమలీల” చిత్రంలో అలీ సరసన నటించడానికి ఆమె ఆసక్తి చూపకపోవడంతో కృష్ణారెడ్డి ఇంద్రజను ఎంపిక చేశారు. అయితే, “శుభలగ్నం” సినిమాలో అలీతో స్పెషల్ సాంగ్ చేయడానికి ఆమె పట్టుబట్టారు. హీరో కృష్ణ సరసన నటించిన “నెంబర్ వన్” చిత్రం విజయవంతం కావడంతో ఆమెకు పెద్ద హీరోల పక్కన నటించే అవకాశాలు వచ్చాయి. చిరంజీవి సరసన “రిక్షావోడు”, “చూడాలని ఉంది”, “అన్నయ్య” వంటి చిత్రాల్లో నటించారు. బాలకృష్ణ సరసన “టాప్ హీరో” చిత్రంలో నటించారు. బాలయ్య దర్శకత్వంలో ప్రారంభమైన “నర్తనశాల” చిత్రంలో ద్రౌపది పాత్రను సౌందర్య పోషించారు. మహానటి సావిత్రి పోషించిన పాత్రను చేస్తున్నాననే భయంతో, భక్తితో ఆ పాత్రను పోషించారు. పౌరాణిక పాత్రకు ప్రత్యేక శ్రద్ధ తీసుకుని నాలుగు రోజులు అనుకున్న వర్క్ ఒకటిన్నర రోజుల్లోనే పూర్తి చేశారు. అయితే ఆ సినిమా రెండవ షెడ్యూల్ ప్రారంభం కాకుండానే ఆమె కన్నుమూశారు.

మోహన్ బాబు నెలకొల్పిన శ్రీ విద్యా నికేతన్ విద్యా సంస్థలంటే సౌందర్యకు చాలా ఇష్టం. తన కెరీర్ లో ప్రతిష్టాత్మకంగా నిలిచిన “పెదరాయుడు” సినిమాలో అవకాశం కల్పించిన మోహన్ బాబు అంటే ఆమెకు ప్రత్యేక గౌరవం ఉండేది. మోహన్ బాబుతో కలిసి “పెదరాయుడు”, “రాయుడు”, “పోస్ట్ మాన్”, “శ్రీరాములయ్య”, “అధిపతి”, “కొండవీటి సింహాసనం”, “శివశంకర్” చిత్రాల్లో నటించారు. నాగార్జునతో “హలో బ్రదర్”, “ఎదురులేని మనిషి”, “రాముడొచ్చాడు”, “ఆజాద్”, “నిన్నే ప్రేమిస్తా” చిత్రాల్లో నటించారు. వెంకటేశ్ సరసన “ఇంట్లో ఇల్లాలు వంటింట్లో ప్రియురాలు”, “పవిత్రబంధం”, “పెళ్ళి చేసుకుందాం”, “జయం మనదేరా” వంటి చిత్రాల్లో నటించారు. “పవిత్రబంధం”లో అగ్రిమెంట్ మ్యారేజ్ ఇల్లాలిగా, “పెళ్ళిచేసుకుందాం”లో అత్యాచారానికి గురైన యువతిగా ఆమె అభినయం అందరి ప్రశంసలు పొందింది. రాజశేఖర్, జగపతిబాబు, శ్రీకాంత్, చక్రవర్తి వంటి హీరోల సరసన కూడా మంచి పాత్రలు పోషించారు.

తెలుగులో బిజీగా ఉన్న సమయంలోనే తమిళ, కన్నడ, హిందీ చిత్రాల్లో నటించారు. రజనీకాంత్, అమితాబ్ బచ్చన్ వంటి స్టార్ హీరోలతో కూడా నటించారు. ఎంత బిజీగా ఉన్నా సౌందర్య నిర్మాతలను ఎప్పుడూ ఇబ్బంది పెట్టలేదు, డేట్స్ సమస్యలను సామరస్యపూర్వకంగా పరిష్కరించుకునేవారు. తన అభినయంతో, అందచందాలతో లాంగ్ స్టాండింగ్ హీరోయిన్‌గా పేరు తెచ్చుకున్నారు. కొత్తతరం నటీనటుల పోటీలో నిలిచి తన ప్రతిభతో స్థానం నిలబెట్టుకున్నారు. సినిమా హీరోయిన్‌కు గౌరవం పెంచిన నటి సౌందర్య. 2004 ఏప్రిల్ 17 శనివారం ఉదయం ఆమె విమాన ప్రమాదంలో కన్నుమూశారు.

మరిన్ని సినిమా వార్తల కోసం ఇక్కడ క్లిక్ చేయండి.