RRR Movie: నాటు నాటు పాట లిరిక్స్ పై ఆసక్తికర విషయాలు చెప్పిన చంద్రబోస్.. బాల్యం జ్ఞాపకాలు..

దర్శకధీరుడు రాజమౌళి రూపొందించిన ఆర్ఆర్ఆర్ చిత్రంలోని నాటు నాటు సాంగ్ ఆస్కార్ అవార్డ్‏కు నామినేట్ అయిన సంగతి తెలిసిందే. బెస్ట్ ఒరిజినల్ సాంగ్ విభాగంలో నాటు నాటు పాటకు చోటు దక్కడంపై సినీ ప్రియులు సంతోషం వ్యక్తం చేస్తున్నారు. ఈ పాటకు సంగీతం ఎంఎం కీరవాణి అందించగా.. రచయిత చంద్రబోస్ లిరిక్స్ రాశారు. నాటు నాటు పాట ఆస్కార్ అవార్డుకు నామినేట్ కావడంపై సంతోషంగా ఉందన్నారు గేయ రచయిత చంద్రబోస్. ఈ పాటను.. తన గ్రామం.. బాల్యం.. కుటుంబ నేపథ్యానికి సంబంధించిదని తెలిపారు. తన మనసులోని భావాలకు.. చిన్ననాటి జ్ఞాపకాలకు అక్షర రూపం ఇచ్చానని అన్నారు.

“నాటు నాటు పాట ఆస్కార్ అవార్డ్ ఒరిజినల్ సాంగ్ కేటగిరిలో నామినేట్ అయినందుకు నేను చాలా సంతోషంగా ఉన్నాను. కీరవాణి సర్, రాజమౌళి గారికి నా హృదయపూర్వక ధన్యవాదాలు. చిన్న పల్లెటూరి నుంచి వచ్చి.. సామాన్య నేపథ్యం ఉన్న నాలాంటి రచయితకు ఇది గొప్ప విజయం. ఇక నాటు నాటు పాట రాయడానికి చాలా సమయం పట్టింది. పాటలో రాసిన ప్రతి పదమూ.. నా బాల్యం, నా గ్రామం, నా కుటుంబానికి సంబంధించినదే. నా మనసులోని భావాలకు.. జ్ఞాపకాలకు అక్షర రూపం ఇచ్చాను ” అంటూ చెప్పుకొచ్చారు.

ఆస్కార్ నామినేషన్ గురించి మాట్లాడుతూ.. ” ఇది ఇప్పటికీ నేను నమ్మలేకపోతున్నాను. ఒరిజినల్ కేటగిరిలో 15 పాటలు ఉన్నాయి. అందులో నాటు నాటు ఒకటి. అవతార్ సినిమా.. నాటు నాటు పాటల మధ్య పోటీ ఉందని నేను అనుకున్నాను.. కానీ అవతార్ చిత్రంలోని పాట రాలేదు. నాటు నాటు సాంగ్ టాప్ 5లో ఉంది. ” అన్నారు. 95వ ఆస్కార్ అవార్డ్ వేడుకలు మార్చి 12న జరగనున్నాయి.

ఇవి కూడా చదవండి

మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి.