Sukumar- Mahesh Babu: సుకుమార్, మహేష్ బాబు.. తెరవెనక ఏదో జరుగుతుందబ్బా..?

సుకుమార్, మహేష్ బాబు కాంబినేషన్‌లో సినిమా వస్తే చూడాలని చాలా కాలంగా అభిమానులు వేచి చూస్తున్నారు. ఈ ఇద్దరూ కలిసి చేసిన నేనొక్కడినే సినిమా ఫ్లాప్ అయ్యుండొచ్చు కానీ దానికి కల్ట్ ఫాలోయింగ్ ఉంది. ఆ సినిమాను ఇంకాస్త బాగా తీసుంటే నెక్ట్స్ లెవల్‌లో ఉండేదని ఇప్పటికీ బాధ పడుతుంటాడు సుకుమార్. మరోవైపు మహేష్ బాబు కూడా వన్ సినిమా ఫలితంపై చాలా సార్లు మాట్లాడాడు. అది ఫ్లాప్ అయినా కూడా తన కెరీర్‌లో వన్ ఆఫ్ ది బెస్ట్ మూవీ అన్నాడు. మహేష్ అన్నాడని కాదు గానీ నిజంగానే నేనొక్కడినే సినిమా భలే ఉంటుందబ్బా అనేవాళ్లు చాలా మంది ఉన్నారు.

ఆ సినిమా ఇప్పుడు వచ్చినా కూడా చూస్తూనే ఉంటారు ఫ్యాన్స్. అందుకే ఈ కాంబినేషన్‌లో మరొక్క సినిమా పడితే బాగుండు అని ఎప్పటికప్పుడు కోరుకుంటూనే ఉంటారు. అన్నీ అనుకున్నట్లు జరిగుంటే ఈ పాటికే మహేష్, సుక్కు కాంబినేషన్‌లో రెండో సినిమా వచ్చి మూడేళ్లై ఉండేది. పుష్ప కంటే ముందే మహేష్ బాబుతో సినిమా అనౌన్స్ చేసాడు లెక్కల మాస్టారు. అప్పట్లో ఈ ఇద్దరూ కలిసి అనౌన్స్ చేసిన సినిమా అనుకోకుండా ఆగిపోయింది. అప్పుడే పుష్ప లైన్‌లోకి వచ్చాడు. అలా అల్లు అర్జున్ పాన్ ఇండియా హీరో అయిపోయాడు. ఈ గ్యాప్‌లో అనిల్ రావిపూడి, పరశురామ్, త్రివిక్రమ్ లాంటి దర్శకులతో పని చేసాడు మహేష్. ఇక పుష్ప 2 తర్వాత సుకుమార్ రేంజ్ ఎలా పెరిగిందో అర్థం చేసుకోవచ్చు.

ఇలాంటి టైమ్‌లో గానీ మహేష్, సుక్కు సినిమా పడితే అంతకంటేనా అంటున్నారు అభిమానులు. ఇప్పుడు ఈ టాపిక్ ఎందుకు అనుకోవచ్చు.. తాజాగా సుకుమార్ భార్య తబిత సుకుమార్ నిర్మించిన గాంధీ తాత చెట్టు ట్రైలర్‌ను మహేష్ విడుదల చేసాడు. ఆ మధ్య ఇద్దరి మధ్య మనస్పర్ధలు వచ్చాయనే వార్తలొచ్చాయి. కానీ ఇప్పుడు ట్రైలర్ రిలీజ్ చేయడం చూసాక.. కలిసి పని చేస్తారేమో అనే ఆశలు చిగురిస్తున్నాయి. అయితే ఈ కాంబో ఎక్స్‌పెక్ట్ చేయాలంటే కనీసం మూడేళ్ళు ఆగాల్సిందే. ప్రస్తుతం రాజమౌళితో సినిమా కమిటయ్యాడు మహేష్. మరోవైపు రామ్ చరణ్‌తో సినిమా చేయబోతున్నాడు సుకుమార్. మరి ఈ కాంబినేషన్ కలుస్తుందో లేదో చూడాలిక.