ముద్దు సీనుపై రష్మిక స్పందన

విజయ్ దేవరకొండ, రష్మిక మందన్న కలిసి నటిస్తోన్న రెండో చిత్రం ‘డియర్ కామ్రేడ్’. ఈ మూవీ నుంచి ఇటీవల విడుదలైన టీజర్‌లో ముద్దు సన్నివేశం ఉండటంపై కొందరు నెటిజన్లు అసహనం వ్యక్తం చేశారు. ‘గీత గోవిందం’లోనూ ఇలాంటి సీన్ చూపించారని, అది హిట్ అయిన కారణంగా మళ్లీ ఇలాంటి సీన్‌ను చూపించారని కామెంట్లు చేశారు. ముఖ్యంగా కన్నడనాట రష్మికపై కొందరు విమర్శలు కురిపించారు. దీంతో ఈ కామెంట్లపై రష్మిక స్పందించారు.

‘‘సినిమాలోని సన్నివేశం ముద్దును డిమాండ్ చేసింది. నా పాత్రకు న్యాయం చేయాలంటే ఆ సీన్‌లో నటించాలి. లిప్‌లాక్ సన్నివేశం ఆధారంగా ఓ సినిమాను జడ్జ్ చేయకూడదు. సినిమా మొత్తాన్ని చూసి మాట్లాడాలి. ప్రజలు గీతగోవిందంను హిట్ చేశారు. దీన్ని కూడా ఆదరిస్తారన్న నమ్మకం ఉంది’’ అంటూ ఓ ఇంటర్వ్యూలో చెప్పుకొచ్చింది. కాగా భరత్ కమ్మ దర్శకత్వం వహించిన ఈ చిత్రం మే 31న ప్రేక్షకుల ముందుకు రానుంది.