చివరి షెడ్యూల్‌లో ‘మహర్షి’

టాలీవుడ్ సూపర్‌స్టార్ మహేశ్ బాబు నటిస్తోన్న ‘మహర్షి’ షూటింగ్ చివరకు వచ్చేసింది. ఫైనల్ షెడ్యూల్‌లో భాగంగా మిగిలిన సన్నివేశాలను చిత్రీకరించునున్నారు. దీంతో రెండు పాటలు మినహా టాకీ పార్ట్ పూర్తి అవ్వనుంది. ఈ షెడ్యూల్ ముగిసిన వెంటనే మహేశ్ సౌతాఫ్రికాకు వెళ్లనున్నారు. అక్కడ ఓ యాడ్ షూటింగ్‌ను పూర్తి చేసుకొని తిరిగివచ్చాక పాటల చిత్రీకరణలో పాల్గొననున్నాడు మహేశ్.

రైతుల సమస్యల ఆధారంగా తెరకెక్కుతున్న ఈ చిత్రంలో మహేశ్ రెండు పాత్రలలో కనిపించనున్నాడు. ఆయన సరసన పూజా హెగ్డే నటిస్తుండగా.. అల్లరి నరేశ్ కీలక పాత్రలలో కనిపించనున్నాడు. వంశీపైడిపల్లి దర్శకత్వంలో తెరకెక్కుతోన్న ఈ మూవీని దిల్ రాజు, అశ్వనీదత్, పీవీపీ సంయుక్తంగా నిర్మిస్తున్నారు. దేవీ శ్రీ ప్రసాద్ సంగీతం అందిస్తోన్న ఈ చిత్రం మే9న ప్రేక్షకుల ముందుకు రానుంది.