Kunal Kamra: స్టాండప్ కమెడియన్ కునాల్ కమ్రాకు బిగ్ షాక్.. బుక్ మై షో సంచలన నిర్ణయం
ఇటీవల స్టాండప్ కమెడియన్లకు వరుసగా వివాదాల్లో ఇరుక్కుంటున్నారు. కొన్ని వారాల క్రితం రణవీర్ అలహాబాద్యా, సమయ్ రైనా తదితర స్టాండప్ కమెడియన్లపై కేసు నమోదైంది. ఇప్పుడు కునాల్ కమ్రాపై కూడా కేసు నమోదైంది. ఇప్పుడు దీనికి అదనంగా బుక్ మై షో కునాల్ కమ్రాపై సంచలన నిర్ణయం తీసుకుంది.
Updated on: Apr 05, 2025 | 4:14 PM
ప్రస్తుతం స్టాండప్ కమెడియన్లకు గడ్డు కాలం నడుస్తోంది. నవ్వించాలని వారు వేస్తోన్న జోకులు వారినే ఇబ్బందుల్లో పడేస్తున్నాయి. కొన్ని వారాల క్రితం, ‘ఇండియా గాట్ టాలెంట్’ అనే కామెడీ షోలో రణవీర్ అలహాబాద్యా చెప్పిన ఒక వికృతమైన జోక్ తీవ్ర చర్చనీయాంశమైంది. దీనికి సంబంధించి రణ్‌వీర్ అలహాబాద్, సమయ్ రైనా సహా పలువురిపై కేసులు నమోదయ్యాయి. ఇప్పుడు మరో స్టాండప్ కమెడియన్ కునాల్ కమ్రా వంతు. ఇటీవల అతను నిర్వహించిన ఓకామెడీ షోపై ఫిర్యాదు నమోదైంది. ప్రస్తుతం కునాల్ పై దర్యాప్తు జరుగుతోంది. ఇంతలో బుక్ మై షో కునాల్ కు సంబంధించి సంచలన నిర్ణయం తీసుకుంది. అతనిపై నిషేధం విధిస్తున్నట్లు ప్రకటించింది. ఇకపై అతని ఏ షోలకు టిక్కెట్లను అమ్మబోమని వెల్లడించింది. అంతేకాదు కునాల్ కు సంబంధించిన సమాచారాన్ని మొత్తం కూడా తమ వెబ్‌సైట్ నుంచి తొలగించింది.
ఇటీవల కామెడీ షో చేసిన కునాల్ కమ్రా దాని వీడియోను సోషల్ మీడియాలో షేర్ చేశాడు. ఆ షోలో కునాల్ కమ్రా మహారాష్ట్ర డిప్యూటీ సీఎం ఏక్‌నాథ్ షిండే పై సంచలన వ్యాఖ్యలు చేశాడు. అలాగే ప్రధాని నరేంద్ర మోడీ, అమిత్ షా, అరవింద్ కేజ్రీవాల్‌లపై జోకులు వేశాడు. దీంతో కునాల్ కమ్రా వీడియో వైరల్ అయింది. కేవలం రెండు రోజుల్లోనే రెండు కోట్లకు పైగా నెటిజన్లు కునాల్ వీడియోను వీక్షించారు. అదనంగా, వీడియో చూసిన వ్యక్తులు కునాల్‌కు ఉదారంగా డబ్బును విరాళంగా ఇచ్చారు. కానీ ఆ వీడియో చూసిన తర్వాత, శివసేన (షిండే వర్గం) ఆగ్రహించి, ప్రదర్శన జరుగుతున్న ముంబైలోని ‘హాబిట్’ ఆడిటోరియంలోకి చొరబడడం గందర గోళానికి దారి తీసింది. ఆ తరువాత, శివసేన పోలీసులకు ఫిర్యాదు చేసింది. దీంతో ముంబై పోలీసులు కునాల్ కమ్రాకు మూడుసార్లు సమన్లు జారీ చేశారు. అయితే, మద్రాస్ హైకోర్టును ఆశ్రయించిన కునాల్ కమ్రాకు మధ్యంతర బెయిల్ లభించింది. ఇంతలో, శివసేన (షిండే వర్గం) యువజన విభాగం నాయకుడు రాహుల్ కనాల్, కునాల్ కమ్రా భవిష్యత్తు ప్రదర్శనలకు టిక్కెట్లు అమ్మవద్దని బుక్ మై షోకు లేఖ రాశారు.
శివసేన లేఖకు ప్రతిస్పందిస్తూ, బుక్ మై షో తన వెబ్‌సైట్ నుంచి కునాల్ కమ్రా గురించిన మొత్తం సమాచారాన్ని తొలగించింది. అదనంగా, కునాల్ భవిష్యత్ షోలకు టిక్కెట్లను తన వెబ్‌సైట్ ద్వారా విక్రయించబోమని తెలిపింది. కామ్రాకు నిషేధాలు కొత్తేమీ కాదు. విమానంలో ప్రయాణిస్తున్నప్పుడు జర్నలిస్ట్ అర్నాబ్ గోస్వామిని అవమానించినందుకు కమ్రాను గతంలో అనేక విమానయాన సంస్థలు అతనిని నిషేధించాయి.
మరిన్ని సినిమా వార్తల కోసం ఇక్కడ క్లిక్ చేయండి..
