Delhi Police: ఢిల్లీ పోలీసులకు చిక్కిన సీరియల్‌ కిల్లర్‌… పాతికేళ్లుగా పోలీసుల కళ్లుగప్పి తిరుగుతున్న లాంబా

పాతికేళ్లుగా పోలీసుల కళ్లుగప్పి తప్పించుకు తిరుగుతున్న ఓ సీరియల్ కిల్లర్‌ అజయ్‌ లాంబాను ఎట్టకేలకు పట్టుకున్నారు. ట్యాక్సీ డ్రైవర్లను లక్ష్యంగా చేసుకుని దారుణంగా హత్యలు చేసి, వారి కార్లను దోచుకెళ్లడమే ఈ కిల్లర్‌ మోటివ్‌. సుమారు 24 ఏళ్ల క్రితం ఢిల్లీ, ఉత్తర ప్రదేశ్, ఉత్తరాఖండ్ రాష్ట్రాల్లో సంచలనం సృష్టించిన నాలుగు దోపిడీ, హత్య కేసుల్లో ఇతను ప్రధాన నిందితుడు.

అజయ్​ లాంబా నేరాలకు పాల్పడే పద్ధతి చాలా సులభంగా ఉంటుంది. ఉత్తరాఖండ్‌కు వెళ్లడానికి టాక్సీని అద్దెకు తీసుకుంటాడు. ఆ తర్వాత డ్రైవర్‌కు మత్తు మందు ఇచ్చి, హత్య చేస్తాడు. మృతదేహాన్ని పారవేసి, కారును అక్రమంగా నేపాల్ సరిహద్దు దాటించి విక్రయిస్తాడు. కానీ ఎప్పుడూ దొరకలేదు! ఇలా 2001లో నాలుగు హత్యలు ఆ తర్వాత మరికొన్ని చోరీలు, హత్యలు చేసినట్లు పోలీసుల విచారణలో తేలింది. అప్పటి నుంచి అజయ్ బంగా పరారీలో ఉన్నాడు.

48 ఏళ్ల అజయ్ లంబా స్వస్థలం ఢిల్లీ. ఆరో తరగతి వరకు చదివిన అజయ్ లంబా.. ఆ తర్వాత ఉత్తర్ ప్రదేశ్ లోని బరేలీ ప్రాంతానికి చేరుకుని అక్కడ ఓ ఇద్దర్ని హతమార్చినట్లు తేలింది. అతడు 2008 నుంచి 2018 వరకు నేపాల్ లో ఉన్నాడు. ఆ తర్వాత కుటుంబంతో కలిసి ఉత్తరాఖండ్ లోని డెహ్రాడున్ కు మకాం మార్చాడు. ఈ క్రమంలో పోలీసులకు చిక్కాడు. దాదాపు 24 ఏళ్ల తర్వాత సీరియల్ కిల్లర్ అజయ్ లంబా చిక్కడంతో పోలీసులు ఊపిరి పీల్చుకున్నారు.