APPSC Group 2 Mains: ఏపీపీఎస్సీ గ్రూప్ 2 మెయిన్స్ మళ్లీ వాయిదా పడే ఛాన్స్! కారణం ఇదే..
ఏపీపీఎస్సీ గ్రూప్ 2 మెయిన్స్ పరీక్ష వాయిదా పడే అవకాశం ఉంది. ఇటీవల మెయిన్స్ షెడ్యూల్ విడుదలవగా వచ్చే ఏడాది జనవరి మొదటి వారంలో పరీక్ష నిర్వహించేందుకు కమిషన్ ఏర్పాట్లు చేస్తుంది. ఈ క్రమంలో అనూహ్య పరిణామాలు చోటు చేసుకోవడంతో గ్రూప్ 2 పరీక్ష తేదీపై సందిగ్ధత నెలకొంది..
Updated on: Nov 05, 2024 | 9:30 AM
అమరావతి, నవంబర్ 5: ఏపీపీఎస్సీ గ్రూప్ 2 మెయిన్స్ పరీక్ష షెడ్యూల్‌ను ఇటీవల కమిషన్ విడుదల చేసిన సంగతి తెలిసిందే. షెడ్యూల్ ప్రకారం మెయిన్స్ గ్రూప్ -2 మెయిన్స్ పరీక్షలను 2025 జనవరి 5 నుంచి నిర్వహించనున్నట్లు ఏపీపీఎస్సీ ప్రకటించింది. రాష్ట్ర వ్యాప్తంగా దాదాపు లక్ష మంది అభ్యర్ధులు ఈ పరీక్షకు హాజరుకానున్నారు. అయితే జనవరి 5న జరుగుతుందా? లేదా? అన్నదానిపై సందిగ్ధత నెలకొంది. అందుకు కారణం లేకపోలేదు. నేడో రేపో మెగా డీఎస్సీ నోటిఫికేషన్ వెలువడనుంది. ఈ నెలలోనే దరఖాస్తు ప్రక్రియ పూర్తి చేసి వచ్చే ఏడాది ఫిబ్రవరి 3 నుంచి మార్చి 4వ తేదీ మధ్య రాత పరీక్షలు నిర్వహించాలని విద్యాశాఖ నిర్ణయించింది. ఈ మేరకు గతంలో పరీక్షల తేదీలను కూడా వెల్లడించింది. డీఎస్సీ పరీక్షల తర్వాత ఇంటర్, పదో తరగతి పబ్లిక్‌ పరీక్షలు జరుగుతాయి. ఈ నేపథ్యంలో అన్ని చోట్ల పరీక్షా కేంద్రాలు బిజీగా ఉండనున్నాయి.
గ్రూప్ 2 మెయిన్స్ పరీక్ష రాసేవారిలో కొంత మంది డీఎస్సీకి కూడా హాజరవుతారు. ఈ అంశాలన్నింటినీ పరిగణనలోకి తీసుకొని వాటి కన్నా ముందే జనవరి 5న గ్రూప్ 2 మెయిన్స్ పరీక్ష నిర్వహించాలని కమిషన్ నిర్ణయించింది. ఈ మేరకు తెలియజేస్తూ అక్టోబర్‌ 30న ఏపీపీఎస్సీ ప్రకటన విడుదల చేసింది. అయితే ప్రకటిత తేదీ నుంచి పరీక్ష రాసేందుకు మూడు నెలల వ్యవధి ఇవ్వాలని గ్రూప్ 2 అభ్యర్థులు కోరుతున్నారు. ఒకవేళ గ్రూప్ 2 వాయిదా వేస్తే ఏప్రిల్‌ లేదా మేలో మాత్రమే నిర్వహించేందుకు వీలుంటుంది. ఏప్రిల్‌ వరకు పరీక్ష కేంద్రాలన్నీ బిజీ ఉంటాయి. కాబట్టి మేలో పరీక్ష జరిగే అవకాశం ఉంది. అయితే డీఎస్సీ రాత పరీక్షల తేదీలు అనుసరించి గ్రూప్ 2 తేదీ మార్చాలా.. వద్దా అన్న దానిపై నిర్ణయం తీసుకుంటామని ఏపీపీఎస్సీ వర్గాలు సూచన ప్రాయంగా తెలిపాయి.
మరోవైపు గ్రూప్ 2 మెయిన్స్ పరీక్ష వాయిదా వేయాలని పలువురు అభ్యర్థులు ఎమ్మెల్సీలు డాక్టర్‌ వేపాడ చిరంజీవిరావు, లక్ష్మణరావులతో కలిసి ఏపీపీఎస్సీ ఛైర్‌పర్సన్‌ అనురాధకు సోమవారం వేర్వేరుగా విజ్ఞప్తి చేశారు. అంతేకాకుండా గ్రూప్ 1 మెయిన్స్ పరీక్షకు 1:100 నిష్పత్తిలో అభ్యర్థులను ఎంపిక చేయాలని డిమాండ్‌ చేశారు. అలాగే డీవైఈఓ పరీక్ష కటాఫ్‌ మార్కులు కూడా తగ్గించాలని కోరారు. ఈ మేరకు గ్రూప్ 1 మెయిన్స్ పరీక్షలను వాయిదా వేయాలని పలువురు వినతిపత్రాలు అందజేశారు.
