ITR Filing: ఆదాయ పన్ను దాఖలు చేసే వారికి అలర్ట్.. ఈ తప్పులు చేశారో నష్టపోతారు జాగ్రత్త..
రిటర్న్ ఫైల్ చేసేటప్పుడు సాధారణంగా కొన్ని తప్పులు దొర్లుతాయి. వాటిని గుర్తించకపోతే డీఫాల్ట్ అయ్యే అవకాశం ఉంటుంది. ముఖ్యంగా మొదటి సారి రిటర్న్ దాఖలు చేసేవారు తప్పనిసరిగా జాగ్రత్తలు తీసుకోవాలి.
కొత్త ఆర్థిక సంవత్సరం ప్రారంభమవడంతో అందరూ తమ ఇన్ కమ్ ట్యాక్స్ రిటర్న్ ఫైల్ చేసేందుకు సమాయత్తమవుతున్నారు. ఇప్పటికే చాలా మంది రిటర్న్ దాఖలు చేయడం పూర్తి చేశారు. 2023-24 ఆర్థిక సంవత్సరానికి గానూ ఇప్పటివరకు 7,55,412 మంది రిటర్న్‌లు దాఖలు చేశారు. జూలై 31 వరకూ రిటర్న్ దాఖలు చేసేందుకు సమయం ఉంది. అయితే రిటర్న్ ఫైల్ చేసేటప్పుడు సాధారణంగా కొన్ని తప్పులు దొర్లుతాయి. వాటిని గుర్తించకపోతే డీఫాల్ట్ అయ్యే అవకాశం ఉంటుంది. ముఖ్యంగా మొదటి సారి రిటర్న్ దాఖలు చేసేవారు తప్పనిసరిగా జాగ్రత్తలు తీసుకోవాలి. ఈ నేపథ్యంలో సాధారణంగా ఇన్ కమ్ ట్యాక్స్ రిటర్న్ దాఖలు చేసే వారు చేసే తప్పులేంటి? వాటిని ఎలా అధిగమించాలి? చూద్దాం రండి..
ఐటీఆర్ ఫారమ్‌ను తప్పుగా ఎంచుకోవద్దు..
పన్ను చెల్లింపుదారులు చేసే అత్యంత సాధారణ తప్పులలో ఒకటి తప్పు ఐటీ ఫారమ్‌ను తప్పుగా ఎంచుకోవడం. మీరు ఆన్‌లైన్‌లో లేదా ఆఫ్‌లైన్‌లో ఫైల్ చేసినా, సరైన ఫారమ్‌లో వివరాలను ఫైల్ చేయడం ఖచ్చితంగా అవసరం. పన్నులు దాఖలు చేయడానికి పన్ను చెల్లింపుదారులు ఉపయోగించే మొత్తం ఏడు రకాల ఫారమ్‌లు ఉన్నాయి. రూ. 50 లక్షల వరకు ఆదాయం ఉన్న వ్యక్తి తన జీతం, ఒక ఇంటి ఆస్తి, ఇతర వనరుల నుంచి ఆదాయాన్ని పొందే వ్యక్తి ఐటీఆర్-1ని ఫైల్ చేయవచ్చు. హిందూ అవిభాజ్య కుటుంబాలు (హెచ్యూఎఫ్), వ్యాపారం, వృత్తి ద్వారా మొత్తం ఆదాయం రూ. 50 లక్షల వరకు ఆదాయం ఉన్న సంస్థలు, వ్యక్తులు ఐటీఆర్-4ను దాఖలు చేయవచ్చు.
రెసిడెన్షియల్ ప్రాపర్టీ ద్వారా రూ. 50 లక్షల కంటే ఎక్కువ ఉన్నవారు ఐటీఆర్-2, నిపుణులు ఐటీఆర్-3ని దాఖలు చేస్తారు. ఐటీఆర్-5, ఐటీఆర్-6 ఫారం ను ఎల్ఎల్పీ, వ్యాపారాల ద్వారా దాఖలు చేయబడతాయి. స్వచ్ఛంద సంస్థ లేదా మతపరమైన ట్రస్ట్, రాజకీయ పార్టీ, పరిశోధన సంఘం, వార్తా సంస్థ లేదా చట్టంలో పేర్కొన్న సారూప్య సంస్థలతో సహా పన్ను చెల్లింపుదారుల కోసం ఐటీఆర్-7 దాఖలు చేయాల్సి ఉంటుంది. ఫారమ్‌ను తీసుకునే ముందు మీ అర్హత ప్రమాణాలను జాగ్రత్తగా తనిఖీ చేయాల్సి ఉంటుంది.
అన్ని ఆదాయ వనరులు నివేదించాలి..
ఐటీఆర్లో మీ అన్ని ఆదాయ వనరులను తప్పనిసరిగా నివేదించాలి. లేకపోతే ఆదాయపు పన్ను శాఖ దానిని ఐటీ చట్టం ఉల్లంఘనగా పరిగణించి మీకు నోటీసు పంపే అవకాశం ఉంది. చాలా మంది వ్యక్తులు వేతనాలతో పాటు బ్యాంక్ సేవింగ్స్ ఖాతా, ఫిక్స్‌డ్ డిపాజిట్లు ఎప్డీలు), బీమా, పీపీఎఫ్ వంటి ఇతర పొదుపు పథకాలపై పొందిన వడ్డీ వంటి అనేక ఆదాయ వనరులను కలిగి ఉంటారు. అవి పన్ను రహితమైనప్పటికీ, ఆ ఆదాయాన్ని మీరు నివేదించాలి. అలాగే ఉద్యోగాన్ని మార్చుకున్నట్లయితే, రెండు యజమానుల ద్వారా సంపాదించిన ఆదాయాన్ని నివేదించడం అవసరం. మీరు మీ పిల్లల పేరుతో ఏదైనా పెట్టుబడి ఆదాయాన్ని కలిగి ఉన్నట్లయితే, పన్ను రిటర్న్‌లను దాఖలు చేసేటప్పుడు దానిని కూడా పేర్కొనాలి.
మీ ఆస్తులను వెల్లడించాలి..
వ్యక్తిగత పన్ను చెల్లింపుదారులు తమ ఐటీఆర్లో నిర్దిష్ట ఆస్తులను వెల్లడించాలని ప్రభుత్వం ఆదేశించింది. మీకు సొంత భూమి, భవనం వంటి స్థిరాస్తుల వివరాలు, వాటి ధరలు నివేదించాలి.
సెక్షన్ 80సీ క్లెయిమ్ చేయడంలో తప్పులు..
సెక్షన్ 80సీ ప్రయోజనాలను క్లెయిమ్ చేయడంలో ఎంప్లాయీ ప్రావిడెంట్ ఫండ్ (ఈపీఎఫ్)లో యజమాని కంట్రిబ్యూషన్ కూడా చేర్చాలని మనలో చాలా మంది అనుకుంటారు. కానీ ఇది సరికాదు. అదేవిధంగా, హౌసింగ్ లోన్‌పై తిరిగి చెల్లించిన ప్రిన్సిపల్ మాత్రమే సెక్షన్ 80సీకి అర్హమైనది.
టీడీఎస్ వివరాలు సరిగ్గా ఉండాలి..
మనలో చాలా మంది ఐటీ డిపార్ట్‌మెంట్‌లో ఉన్న టీడీఎస్ ఫారమ్-26 ఏఎస్ క్రెడిట్‌ను ధృవీకరించకుండానే రిటర్న్‌లను ఫైల్ చేస్తారు. మీ యజమాని లేదా ఎవరైనా టీడీఎస్ ని మినహాయించిన వారు IT డిపార్ట్‌మెంట్‌లో డిపాజిట్ చేయకపోతే లేదా మీ పాన్‌ను సరిగ్గా పేర్కొనడంలో విఫలమైతే, ఆ మొత్తం ఫారమ్-26 ఏఎస్లో కనిపించదు, ఇది డిఫాల్ట్‌కు దారి తీస్తుంది. కాబట్టి టీడీఎస్ డిడక్ట్ అయిన తర్వాత క్రెడిట్ ఫారమ్-26 ఏఎస్లో పేర్కొనబడిందో లేదో తనిఖీ చేయండి. అది సక్రమంగా లేకపోతే సరిచేయండి.
మరిన్ని బిజినెస్ వార్తల కోసం ఇక్కడ క్లిక్ చేయండి..
