ఉన్నట్టుండి తగ్గుతున్న బంగారం, వెండి ధరలు..! కారణం ఏంటంటే?

ప్రపంచంలో ఎక్కడైనా యుద్ధం లేదా భౌగోళిక రాజకీయ ఉద్రిక్తతలు ఏర్పడితే సాధారణంగా పెట్టుబడిదారులు సురక్షిత పెట్టుబడులైన బంగారం, వెండి వైపు మొగ్గు చూపుతారు. అయితే ప్రస్తుతం మధ్యప్రాచ్యంలో జరుగుతున్న ఉద్రిక్తతల నేపథ్యంలో ఆశించిన విధంగా కాకుండా బంగారం మరియు వెండి ధరలు తగ్గడం మార్కెట్‌లో ఆసక్తికర పరిస్థితిని సృష్టించింది. ముఖ్యంగా ఇరాన్‌, ఇజ్రాయెల్‌ మధ్య పెరుగుతున్న ఉద్రిక్తతల సమయంలో ఈ పరిస్థితి కనిపిస్తోంది.

కమోడిటీ మార్కెట్‌లో యుద్ధం ప్రారంభమైన తర్వాత బంగారం, వెండి ధరలు తగ్గాయి. వెండి ధర సుమారు రూ.14,000 వరకు పడిపోయి దాదాపు 5 శాతం తగ్గింది. బంగారం విషయానికి వస్తే MCXలో ఫిబ్రవరి 28న 10 గ్రాములకు సుమారు రూ.1,69,880, మార్చి 13న సుమారు రూ.1,59,350, మార్చి 15న సుమారు రూ.1,62,000, అంటే బంగారం ధరలో కూడా సుమారు రూ.7,800కు పైగా తగ్గుదల నమోదైంది.

ఎందుకు తగ్గాయి?

నిపుణుల ప్రకారం యుద్ధ పరిస్థితుల్లో సాధారణంగా బంగారం ధరలు పెరుగుతాయి. కానీ ఈసారి పరిస్థితి కొంత భిన్నంగా ఉంది. ప్రపంచవ్యాప్తంగా ఏర్పడిన అనిశ్చితి కారణంగా కొంతమంది పెట్టుబడిదారులు బంగారంలో పెట్టుబడి పెట్టిన డబ్బును వెనక్కి తీసుకుంటున్నారు. ఈ అమ్మకాల ఒత్తిడి వల్ల ధరలు తగ్గే పరిస్థితి ఏర్పడింది. యుద్ధ సమయంలో అమెరికా కరెన్సీ బలపడటం కూడా మరో ప్రధాన కారణం. పెట్టుబడిదారులు ఇప్పుడు అమెరికా డాలర్, అమెరికా ట్రెజరీ బాండ్లు వంటి ఆస్తులను కూడా సురక్షిత పెట్టుబడులుగా పరిగణిస్తున్నారు. దీంతో బంగారం, వెండి వంటి విలువైన లోహాలపై డిమాండ్ కొంత తగ్గింది. మధ్యప్రాచ్య పరిస్థితులు ఇంకా స్పష్టంగా లేకపోవడంతో బంగారం ధరలు కొన్నిసార్లు పెరిగి, కొన్నిసార్లు తగ్గే పరిస్థితి కొనసాగుతుందని మార్కెట్ నిపుణులు చెబుతున్నారు. అందువల్ల పెట్టుబడిదారులు జాగ్రత్తగా నిర్ణయాలు తీసుకోవాలని సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి