Financial Fraud: మీ పేరు మీద ఇంకెవరైనా లోన్ తీసుకున్నారా?.. ఇప్పుడే చెక్ చేసుకోండి, లేకుంటే మొదటికే మోసం!

మీరు ఏ రోజూ బ్యాంకులో అప్పు తీసుకోకపోయినా, మీ క్రెడిట్ హిస్టరీలో లోన్లు కనిపిస్తున్నాయంటే మీరు మోసానికి గురైనట్లే. ఇటువంటి మోసాల బారిన పడకుండా ఉండటానికి క్రమం తప్పకుండా కొన్ని జాగ్రత్తలు తీసుకోవాలి. మీ పేరు మీద ఉన్న రుణాలను ఎలా తనిఖీ చేయాలి, మోసపోయినట్లు తెలిస్తే ఎలా స్పందించాలో ఇప్పుడు తెలుసుకుందాం.

క్రెడిట్ రిపోర్ట్‌ను తనిఖీ చేయండి

మీ పేరు మీద ఎన్ని లోన్లు ఉన్నాయి, క్రెడిట్ కార్డుల వినియోగం ఎలా ఉందో తెలుసుకోవడానికి ప్రతి మూడు నెలలకోసారి మీ క్రెడిట్ రిపోర్ట్‌ను తనిఖీ చేయడం ఉత్తమం. CIBIL, Experian, Equifax లేదా CRIF High Mark వంటి అధికారిక వెబ్‌సైట్లలో మీ పాన్ కార్డ్ వివరాలు ఇచ్చి ఉచితంగా మీ క్రెడిట్ స్కోర్‌ను చూసుకోవచ్చు. ఇందులో మీకు సంబంధం లేని ‘ఓపెన్’ లోన్లు ఏవైనా ఉంటే వెంటనే గుర్తించవచ్చు.

బ్యాంక్ అలర్ట్‌ల పట్ల అప్రమత్తత

చాలామంది బ్యాంకు నుంచి వచ్చే SMSలను ప్రకటనలు అనుకుని వెంటనే డిలీట్ చేస్తారు. కానీ, మీ ఖాతా నుంచి EMI కట్ అయినట్లు లేదా కొత్త లోన్ మంజూరైనట్లు మెసేజ్ వస్తే అస్సలు నిర్లక్ష్యం చేయవద్దు. మీకు సంబంధం లేని లావాదేవీల గురించి మెసేజ్ రాగానే వెంటనే మీ నెట్ బ్యాంకింగ్ లేదా బ్యాంక్ అధికారిక వెబ్‌సైట్‌లోకి లాగిన్ అయ్యి లోన్ స్టేటస్‌ను క్రాస్-చెక్ చేసుకోవాలి.

మోసపోయినట్లు గుర్తిస్తే ఏం చేయాలి?

ఒకవేళ మీ ఐడి ప్రూఫ్‌తో ఎవరైనా రుణం తీసుకున్నారని నిర్ధారించుకుంటే భయపడాల్సిన పనిలేదు. వెంటనే మీ ఆధార్, పాన్ కార్డ్ మరియు బ్యాంక్ స్టేట్‌మెంట్లను తీసుకుని సదరు బ్యాంకు శాఖను సందర్శించి అధికారులకు ఫిర్యాదు చేయండి. ఇది ‘ఐడెంటిటీ థెఫ్ట్’ (గుర్తింపు దొంగతనం) అని లిఖితపూర్వకంగా తెలియజేయండి. దీనితో పాటు సమీపంలోని సైబర్ క్రైమ్ పోలీస్ స్టేషన్‌లో ఫిర్యాదు చేయడం వల్ల భవిష్యత్తులో మీకు చట్టపరమైన ఇబ్బందులు కలగవు.

గమనిక: ఇది కేవలం సమాచారం మాత్రమే. సంస్థ దీనికి బాధ్యత వహించదు. మీ ఆర్థిక లావాదేవీల విషయంలో వ్యక్తిగత పత్రాల షేరింగ్‌లో ఎల్లప్పుడూ జాగ్రత్తగా ఉండండి.