ఇరాన్‌ ఒక ఆర్థిక శక్తిగా మారనుందా? యుద్ధం, సీజ్‌ఫైర్‌తో ఎలాంటి లాభం పొందిందంటే?

అమెరికా–ఇరాన్ మధ్య 39 రోజుల పాటు కొనసాగిన ఘర్షణకు కాల్పుల విరమణతో ముగింపు వచ్చినప్పటికీ, దాని ఆర్థిక ప్రభావాలు ప్రపంచవ్యాప్తంగా చర్చనీయాంశంగా మారాయి. ముఖ్యంగా హోర్ముజ్ జలసంధి పై ఇరాన్ సాధించిన కొత్త ప్రభావం, అంతర్జాతీయ వాణిజ్య సమీకరణాలను మారుస్తోంది. ప్రపంచ ముడి చమురులో దాదాపు 20 శాతం ఈ జలసంధి గుండా రవాణా అవుతుంది. యుద్ధ సమయంలో ఇరాన్ ఈ మార్గాన్ని అడ్డుకోవడంతో చమురు ధరలు భారీగా పెరిగి, సరఫరా గొలుసులు దెబ్బతిన్నాయి. ఈ ఒత్తిడి కారణంగా అమెరికా, ఇతర దేశాలు చర్చలకు ముందుకొచ్చినట్లు విశ్లేషకులు భావిస్తున్నారు.

కాల్పుల విరమణ ఒప్పందం తరువాత, ఈ మార్గం గుండా వెళ్లే నౌకలపై టోల్ విధించే అవకాశాన్ని ఇరాన్ ప్రస్తావించడం కీలక పరిణామంగా మారింది. ఇది సాధారణ సముద్ర మార్గాన్ని ఒక ఆదాయ వనరుగా మార్చే ప్రయత్నంగా భావిస్తున్నారు. సరుకు పరిమాణం, స్వభావం ఆధారంగా రుసుములు నిర్ణయించే విధానం అమల్లోకి వస్తే, ఇది అంతర్జాతీయ రవాణా ఖర్చులను పెంచే ప్రమాదం ఉంది. ఈ పరిణామం ప్రభావం కేవలం షిప్పింగ్ కంపెనీలకే పరిమితం కాకుండా, గ్లోబల్ మార్కెట్లపై పడే అవకాశం ఉంది. ముఖ్యంగా భారత్ వంటి దిగుమతులపై ఆధారపడే దేశాల్లో పెట్రోల్, డీజిల్ ధరలపై ఒత్తిడి పెరిగి, ద్రవ్యోల్బణం అధికమయ్యే అవకాశముంది.

అమెరికా అధ్యక్షుడు డొనాల్డ్ ట్రంప్ ఈ ఒప్పందాన్ని దౌత్య విజయం గా పేర్కొనగా, ఇరాన్ దీన్ని దీర్ఘకాలిక ఆర్థిక వ్యూహంగా మలుచుకున్నట్లు కనిపిస్తోంది. యుద్ధంలో మౌలిక సదుపాయాలు దెబ్బతిన్నప్పటికీ, భవిష్యత్తులో స్థిరమైన ఆదాయ వనరును సృష్టించుకోవడంలో ఇరాన్ ముందంజ వేసింది. ఈ కాల్పుల విరమణ తక్షణ ఉపశమనం ఇచ్చినప్పటికీ, హోర్ముజ్ జలసంధిపై ఇరాన్ పెరిగిన నియంత్రణ ప్రపంచ వాణిజ్యానికి కొత్త రిస్క్‌గా మారే సూచనలు కనిపిస్తున్నాయి.

మరిన్ని బిజినెస్ వార్తల కోసం ఇక్కడ క్లిక్ చేయండి