Ola New e-Scooter: ఓలా నుంచి మరో కొత్త ఎలక్ట్రిక్ స్కూటర్.. లాంచింగ్ ఎప్పుడంటే..
ఓలా ఎలక్ట్రిక్ నుంచి మరో కొత్త స్కూటర్ వస్తే, సంస్థ పోర్ట్ఫోలియో మరింత శక్తివంతంగా మారుతుందనడంలో సందేహం లేదు. ఎలక్ట్రిక్ స్కూటర్ సెగ్మెంట్లో ఓలాకు ఇప్పటికే మంచి గుర్తింపు ఉందన్న విషయం తెలిసిందే.
Madhu |
Updated on: Jun 20, 2023 | 6:00 PM
మన దేశంలో ఎలక్ట్రిక్ స్కూటర్ల విభాగంలో ఓలా తిరుగులేని ఆధిపత్యాన్ని చెలాయిస్తోంది. ఇప్పటి వరకూ అత్యధిక విక్రయాలు జరిపిన సంస్థగా నిలిచింది. నంబర్ వన్ పొజిషన్లో కొనసాగుతోంది. అత్యాధునిక ఫీచర్లు.. ఆకర్షణీయమైన ఆకృతిల్లో పలు మోడళ్లను ఆవిష్కరించింది. ఇదే క్రమంలో మరో కొత్త మోడల్ ను తీసుకువచ్చేందుకు సన్నాహాలు చేస్తోంది. ఈ మేరకు ఓలా ఎలక్ట్రిక్ సీఈఓ భవిష్ అగర్వాల్ ఓ ట్వీట్ చేశారు. కొత్త మోడల్ కు సంబంధించిన హెడ్ లైట్లతో ఓ చిత్రాన్ని ఉంచారు. 2023, జులైలో కొత్త ప్రాడక్ట్ లాంచ్ ఉంటుంది అన్నట్టుగా ఆయన ట్వీట్ చేశారు.
భవిష్ అగర్వాల్ పెట్టిన ట్వీట్ ఇది..
‘జులైలో జరిగే ఈవెంట్లో ఓ కొత్త ప్రాడక్ట్ను ప్రకటిస్తాం. ఈ ఈవెట్ను #endICEAge షో అని పిలుస్తున్నాం. ఇది పార్ట్ 1 మాత్రమే. ఈ షోతో స్కూటర్లలో ఐసీఈ ఏజ్ స్కూటర్లకు ముగింపు పడుతుంది! ఎస్1 ప్రో, ఎస్ 1 ఎయిర్తో పాటు మరెన్నో..,’ అని చికట్లో వెలుగుతున్న ఓ స్కూటర్ హెడ్ ల్యాంప్ చిత్రాన్ని జోడిస్తూ భవిష్ అగర్వాల్ ట్వీట్ చేశారు.
ఐసీఈ అంటే.. ఇంటర్నల్ కంబషన్ ఇంజిన్తో కూడిన స్కూటర్లు. వీటిని తగ్గించేందుకు ప్రపంచం కృషిచేస్తోంది. ఇందులో భాగంగా ఎలక్ట్రిక్ వాహనాలకు డిమాండ్ పెరుగుతోంది. ఈ నేపథ్యంలో భవిష్ అగర్వాల్ ట్వీట్ ఇప్పుడు వైరల్గా మారింది. నెటిజనులు దీనిపై విపరీతంగా స్పందిస్తున్నారు. కొందరూ పాజిటివ్ స్పందస్తుండగా.. మరికొందరు సర్వీస్ సరిగా లేదని అది చూసుకోవాలని సూచిస్తూ రీట్వీట్ చేస్తున్నారు.
కొత్త ఉత్పత్తి ఎలా ఉండొచ్చు..
అగర్వాల్ ప్రస్తావిస్తున్న కొత్త ఉత్పత్తి గురించి పెద్దగా తెలియనప్పటికీ, కొత్త ఎలక్ట్రిక్ స్కూటర్ విండ్‌షీల్డ్‌ను కలిగి ఉంటుందని చిత్రాలు చూపిస్తున్నాయి, ఇది సరికొత్త టూరర్ స్కూటర్ లేదా బహుశా దాని ప్రస్తుత మోడల్‌లో టూరర్ వేరియంట్ కావచ్చునని అంచనా. కంపెనీ తన అత్యంత సరసమైన ఉత్పత్తి ఓలా ఎస్1 ఎయిర్ కోసం కొత్త ఉపకరణాల సెట్‌ను తీసుకువచ్చే అవకాశం కూడా ఉంది.
ప్రస్తుతం ఓలా పరిస్థితి ఇది..
ప్రస్తుతం ఓలా ఎలక్ట్రిక్ పోర్ట్ఫోలియోలో.. ఓలా ఎస్1, ఓలా ఎస్1 ప్రో, ఓలా ఎస్1 ఎయిర్ వంటి ప్రాడక్ట్స్ ఉన్నాయి. వీటి ఎక్స్షోరూం ధరలు వరుసగా రూ. 1.30లక్షలు, రూ. 1.40లక్షలు, రూ. 99,999గా ఉన్నాయి. ఓలా ఎలక్ట్రిక్ నుంచి మరో కొత్త స్కూటర్ వస్తే, సంస్థ పోర్ట్ఫోలియో మరింత శక్తివంతంగా మారుతుందనడంలో సందేహం లేదు. ఎలక్ట్రిక్ స్కూటర్ సెగ్మెంట్లో ఓలాకు ఇప్పటికే మంచి గుర్తింపు ఉందన్న విషయం తెలిసిందే.
మరిన్ని బిజినెస్ వార్తల కోసం ఇక్కడ క్లిక్ చేయండి..
