Gold Rate: వామ్మో.. బంగారం ధర రూ.9 లక్షలు అవుతుందా? సంచలనం సృష్టిస్తున్న కొత్త రిపోర్ట్‌!

ప్రస్తుతం బంగారం ధర భారీగా పెరుగుతోంది. త్వరలో 10 గ్రాముల బంగారం ధర రూ.2 లక్షలకు చేరుకుంటుందని చాలా మంది అంచనా వేస్తున్నారు. కొంతమంది నిపుణులు రూ.2 లక్షల నుండి 2.5 లక్షల వరకు ఉండే అవకాశం ఉందని అంచనా వేస్తున్నారు. కానీ ఇప్పుడు మరో షాకింగ్ అంచనా తెరపైకి వచ్చింది. బంగారం ధర ఔన్సుకు 27,000 డాలర్ల వరకు పెరగవచ్చని కొత్త నివేదికలు చెబుతున్నాయి. అదే జరిగితే ఇండియలో 10 గ్రాములు బంగారం ధర రూ.8 నుంచి 9 లక్షలకు పెరిగే అవకాశం ఉంది.

ఇటీవల బంగారం ధర ఔన్సుకు 5,000 డాలర్లు దాటింది. ఈ సంవత్సరం ఇప్పటివరకు బంగారం ధర దాదాపు 17 శాతం పెరిగింది. గత సంవత్సరం ఈ పెరుగుదల 64 శాతంగా ఉంది. దీని ఫలితంగా పెట్టుబడిదారులకు భారీ లాభాలు వచ్చాయి. లండన్ బులియన్ మార్కెట్ అసోసియేషన్ (LBMA) సర్వే ప్రకారం.. 2026లో బంగారం ధరలు ఔన్సుకు 7,150 డాలర్లకి చేరుకోవచ్చు. ఇది జరిగితే భారత్‌లో బంగారం ధర 10 గ్రాములకు రూ.2.3 నుండి 2.5 లక్షల వరకు పెరుగుతుంది. గ్రీన్‌ల్యాండ్ సమస్యపై అమెరికా, నాటో మధ్య విభేదాలు, అమెరికా ఫెడరల్ రిజర్వ్ స్వయంప్రతిపత్తిపై సందేహాలు, మధ్యంతర ఎన్నికల తర్వాత రాజకీయ అనిశ్చితి వంటి భౌగోళిక రాజకీయ ఉద్రిక్తతలు పెట్టుబడిదారులను బంగారాన్ని సురక్షితమైన స్వర్గధామంగా మార్చడానికి దారితీస్తున్నాయి. మెటల్స్ ఫోకస్ డైరెక్టర్ ఫిలిప్ న్యూమాన్ ప్రకారం ఈ అనిశ్చితి బంగారాన్ని మరింత ప్రియంగా మార్చుతుంది.

ప్రపంచ కేంద్ర బ్యాంకులు పెద్ద మొత్తంలో బంగారాన్ని కొనుగోలు చేస్తున్నాయి. అభివృద్ధి చెందుతున్న దేశాలు డాలర్‌పై ఆధారపడటాన్ని తగ్గించడానికి తమ బంగారు నిల్వలను పెంచుకుంటున్నాయి. గోల్డ్‌మన్ సాచ్స్ అంచనాల ప్రకారం.. కేంద్ర బ్యాంకులు నెలకు సగటున 60 మెట్రిక్ టన్నుల బంగారాన్ని కొనుగోలు చేస్తున్నాయి. పోలాండ్ తన నిల్వలను 700 టన్నులకు పెంచాలని నిర్ణయించింది. చైనా కేంద్ర బ్యాంకు వరుసగా 14 నెలలుగా బంగారాన్ని పోగుచేస్తోంది. గోల్డ్‌మన్ సాచ్స్ 2026 చివరి నాటికి బంగారం ధరల అంచనాను 5,400 డాలర్లకు పెంచింది. కొంతమంది విశ్లేషకులు ఈ సంవత్సరం అది 6,400 డాలర్లకు చేరుకోవచ్చని భావిస్తున్నారు. యుద్ధ ముప్పు, ఆర్థిక అస్థిరత బంగారం ధరలను పెంచే అవకాశం ఉందని ఆర్థిక నిపుణులు అంచనా వేస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి