షాకింగ్ న్యూస్.. ప్రియాగోల్డ్ బిస్కెట్లలో పశువుల తవుడు! డోడ్లా పాలలో డిటర్జెంట్..?

న్యూఢిల్లీ: ఆహార పదార్థాల నాణ్యత, భద్రతపై మరోసారి తీవ్ర ఆందోళనలు వ్యక్తమవుతున్నాయి. ప్రముఖ ప్రియాగోల్డ్ బిస్కెట్ల తయారీ సంస్థ సూర్య ఫుడ్ అండ్ ఆగ్రో, డోడ్లా డెయిరీ, యూఈఐఆర్ ఆర్గానిక్ ఫుడ్స్‌పై తీవ్రమైన ఆహార భద్రతా ఉల్లంఘనలకు సంబంధించి ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) చట్టపరమైన చర్యలు ప్రారంభించింది. తనిఖీలు, ప్రయోగశాల పరీక్షల్లో వెలుగుచూసిన అంశాలు వినియోగదారుల్లో కలకలం రేపుతున్నాయి.

బిస్కెట్ల తయారీలో పశువుల మేత తవుడు!

ప్రియాగోల్డ్ బిస్కెట్లను తయారు చేసే సూర్య ఫుడ్ అండ్ ఆగ్రో సంస్థలో వినియోగదారుడి ఫిర్యాదు మేరకు FSSAI అధికారులు తనిఖీలు నిర్వహించారు. ఈ సందర్భంగా మానవ వినియోగానికి ఉద్దేశించని, పశువుల మేత కోసం మాత్రమే ఉపయోగించాల్సిన తవుడును బిస్కెట్ల తయారీలో వినియోగిస్తున్నట్లు అధికారులు గుర్తించినట్లు వెల్లడైంది. ఆ దాణా సంచులపై పశువుల మేత కోసం అని స్పష్టంగా పేర్కొన్నట్లు సమాచారం.

అంతేకాకుండా, తయారీ కేంద్రంలో పరిశుభ్రత, తెగుళ్ల నియంత్రణ, ముడి పదార్థాల నిల్వ, పదార్థాలను వేరు చేసి ఉంచడం, ఉద్యోగుల వ్యక్తిగత పరిశుభ్రత, ప్రాంగణ నిర్వహణ వంటి అంశాల్లోనూ పలు లోపాలు బయటపడ్డాయి. ఈ తీవ్రమైన ఉల్లంఘనల నేపథ్యంలో సంస్థ లైసెన్స్‌ను ఇప్పటికే నిలిపివేసినట్లు FSSAI తెలిపింది. తాజాగా చట్టపరమైన చర్యలను కూడా ప్రారంభించింది.

డోడ్లా పాల నమూనాలో డిటర్జెంట్, కాస్టిక్ సోడా?

డోడ్లా డెయిరీకి చెందిన ఫుల్ క్రీమ్ పాల నమూనా పరీక్షల్లోనూ ఆందోళనకరమైన అంశాలు వెలుగులోకి వచ్చాయి. తొలుత పాలలో కొవ్వు శాతం నిర్దేశిత ప్రమాణాలకు అనుగుణంగా లేకపోవడంతో నమూనాను నాసిరకమైనదిగా ప్రకటించారు. కంపెనీ అప్పీల్ చేయడంతో నమూనాను రెఫరల్ ఫుడ్ లాబొరేటరీకి పంపించారు.

అక్కడ నిర్వహించిన పరీక్షల్లో పాల నమూనాలో డిటర్జెంట్, కాస్టిక్ సోడా ఉన్నట్లు, అలాగే కొవ్వు శాతం నిర్దేశిత కనీస పరిమితి కంటే తక్కువగా ఉన్నట్లు నిర్ధారణ అయినట్లు FSSAI వెల్లడించింది. దీంతో ఆ పాలను అసురక్షితమైనదిగా, నాసిరకమైనదిగా పరిగణిస్తూ సంబంధిత సంస్థలు, ఆహార వ్యాపార నిర్వాహకులపై చట్టపరమైన చర్యలకు ఆమోదం తెలిపింది.

ఎండుద్రాక్షలో పురుగుమందుల అవశేషాలు

మరోవైపు, యూఈఐఆర్ ఆర్గానిక్ ఫుడ్స్ విక్రయించే పసుపు ఎండుద్రాక్ష నమూనాలో పురుగుమందుల అవశేషాలను అధికారులు గుర్తించారు. ఈ వ్యవహారంలోనూ ఆహార భద్రతా నిబంధనల ఉల్లంఘనలపై చర్యలు ప్రారంభించారు.

వినియోగదారుల ఆరోగ్యంపై ఆందోళన

ఆహార పదార్థాల తయారీ, నిల్వ, విక్రయాల్లో నాణ్యతా ప్రమాణాలు పాటించడం తప్పనిసరి. ప్రజల ఆరోగ్యానికి ముప్పు కలిగించే ఉల్లంఘనలపై కఠిన చర్యలు తీసుకుంటామని FSSAI స్పష్టం చేసింది. అయితే, ఈ కేసుల్లో తుది చట్టపరమైన నిర్ణయాలు సంబంధిత విచారణ, న్యాయ ప్రక్రియల అనంతరం వెలువడాల్సి ఉంది. వినియోగదారులు ఆహార పదార్థాలను కొనుగోలు చేసేటప్పుడు నాణ్యత, లేబుల్స్, గడువు తేదీలను పరిశీలించాలని నిపుణులు సూచిస్తున్నారు.

మరిన్ని బిజినెస్ వార్తల కోసం ఇక్కడ క్లిక్ చేయండి..