IND vs WI 5th T20I: ఆ ఒక్క వికెట్.. చిన్నస్వామిలో మ్యాచ్ స్వరూపాన్నే మార్చేస్తుందిగా..!

IND vs WI 5th T20I: వెస్టిండీస్ భారత గడ్డపై అడుగుపెట్టినప్పుడు, ఆ జట్టు ఏమాత్రం పోటీనివ్వదని చాలామంది భావించారు. కానీ, ఆ జట్టు చివరి వన్డేలో 352 పరుగుల లక్ష్యాన్ని ఛేదించి తమ సత్తా చాటింది. టీ20 సిరీస్‌లో అయితే భారత్‌కు ఏ మాత్రం తగ్గకుండా రెండు మ్యాచ్‌లు గెలిచి 2-2తో సమం చేశారు. ఈ కీలక స్థితిలో, టీ20 సిరీస్ కోల్పోకుండా తమ స్థాయికి తగ్గ ఆటతీరును ప్రదర్శించాల్సిన బాధ్యత ఇప్పుడు భారత జట్టుపై ఉంది. 2019 ఫిబ్రవరి నుంచి భారత గడ్డపై ఒక్క టీ20 సిరీస్‌ను కూడా చేజార్చుకోని టీమిండియా, ఈ రికార్డును నిలబెట్టుకుంటుందా లేక వెస్టిండీస్ పైచేయి సాధిస్తుందా అనేది ఆసక్తికరంగా మారింది.

నాలుగు టీ20 మ్యాచ్‌లలో పరుగుల వరద పారింది. పలు కొత్త రికార్డులు కూడా నమోదయ్యాయి. ఇప్పుడు సిరీస్ విజేతను తేల్చే ఆఖరి సమరం బెంగళూరులోని చిన్నస్వామి స్టేడియంలో జరగనుంది. ఈ స్టేడియం భారీ స్కోర్‌లకు అడ్డా, చిన్న బౌండరీలతో బ్యాట్స్‌మెన్‌లకు స్వర్గధామం. బౌలర్లు మరోసారి భయపడే పిచ్‌పై భారత్, వెస్టిండీస్ సిద్ధమయ్యాయి. 2002 నుంచి భారత గడ్డపై ఏ ఫార్మాట్‌లోనూ సిరీస్ గెలవని వెస్టిండీస్, ఈ అరుదైన అవకాశాన్ని అందుకోవాలని సవాలు విసురుతోంది. ఆ ఛాన్స్ ఇవ్వకూడదని భారత్ పట్టుదలగా ఉంది.

నాలుగో టీ20లో భారత ఓటమికి కారణాల్లో అభిషేక్ శర్మ వైఫల్యం ఒకటి. 24 బంతుల్లో కేవలం 29 పరుగులే చేయడం ఆశించిన విధంగా లేదు. అయితే, ఈసారి సంజు శాంసన్‌తో పాటు అభిషేక్ నుంచి మెరుపు ఆరంభాన్ని టీమిండియా అభిమానులు ఆశిస్తున్నారు. ఇషాన్ కిషన్ కూడా గత మ్యాచ్‌లలో అంచనాలకు తగ్గట్టు ఆడలేకపోయాడు. ఈ మ్యాచ్‌లో అతని నుంచి భారీ హిట్టింగ్ అవసరం. మొదటి టీ20లో సెంచరీ తర్వాత కెప్టెన్ శ్రేయస్ అయ్యర్ కూడా తడబడుతున్నాడు. తిలక్ వర్మ కూడా చెప్పుకోదగ్గ ఇన్నింగ్స్ ఆడాల్సి ఉంది.

బౌలింగ్‌లో టీమిండియాకు సవాళ్లు ఎదురవుతున్నాయి. మయంక్ యాదవ్, ప్రీస్ యాదవ్, అక్షర్ పటేల్, నమన్దీర్‌లు విండీస్ హిట్టర్‌లను ఎలా నిలవరిస్తారనేది చూడాలి. ఆల్ రౌండర్‌గా తన స్థానం పదిలం చేసుకోవాలనుకుంటున్న నితీష్ కుమార్ రెడ్డి బ్యాటింగ్‌లో పర్వాలేదనిపించినా, బౌలింగ్‌లో మరింత మెరుగుపడాలి. ఈ మ్యాచ్‌లో ఆకాశ్‌దీప్ సింగ్ ఆడేది అనుమానమే, అతని స్థానంలో సీనియర్ పేసర్ భువనేశ్వర్ కుమార్‌ను ఎంపిక చేశారు.

టీమిండియా గెలవాలంటే వెస్టిండీస్ అసలు ఆయుధాన్ని నేలకూల్చాల్సిందే. ఈ సిరీస్‌కు ముందు సాధారణ బ్యాట్స్‌మెన్‌గా గుర్తింపు ఉన్న షాయి హోప్, సిరీస్ ప్రారంభం నుంచి వన్డేలు, టీ20లు రెండింటిలోనూ భీభత్సమైన ఫామ్‌తో దూసుకుపోతున్నాడు. మూడు వన్డేలలో 240 బంతుల్లో 278 పరుగులు చేయగా, నాలుగు టీ20లలో 135 బంతుల్లో 261 పరుగులు బాదాడు. షాయి హోప్‌ను తొందరగా అవుట్ చేసిన నాలుగు మ్యాచ్‌లలో భారత్ నెగ్గింది. అతని చెలరేగిన మూడు మ్యాచ్‌లలో ఓడింది. కాబట్టి, ఐదో టీ20లో అతన్ని తొందరగా అవుట్ చేస్తే టీమిండియాకు సగం విజయం దక్కినట్టే. ఆ తర్వాత రూథర్‌ఫోర్డ్, హెట్‌మేర్ వికెట్లు కూడా కీలకమే. వీరిని ఎక్కువసేపు క్రీజ్‌లో ఉంచకుండా అవుట్ చేయాలి.

మరోవైపు, బౌలింగ్ పరంగా వెస్టిండీస్ బలహీనమే. అయినా, వారి దూకుడు బ్యాటింగ్‌తో ఆ లోపాన్ని అధిగమిస్తున్నారు. చిన్నస్వామి స్టేడియంలో మంచి బౌన్స్, చిన్న బౌండరీలతో బ్యాటింగ్ స్వర్గధామం. ఎంత భారీ స్కోర్ అయినా ఛేదనకు అవకాశం ఉంది. మంచు ప్రభావం వల్ల టాస్ గెలిచిన జట్టు ఫీల్డింగ్ ఎంచుకోవచ్చు. అయితే, వర్ష సూచన (80% అవకాశం) ఉంది. వర్షం గండం తప్పి, మ్యాచ్ సజావుగా సాగి, టీమిండియా బౌలర్లు చెలరేగితే గెలిచే అవకాశాలు ఉంటాయి.