Investments: ఎస్ఐపీ, లంప్సమ్ విధానాల్లో ఏది బెస్ట్.. వాటి మధ్య తేడాలను తెలుసుకోవాల్సిందే..!
ఇటీవల కాలంలో ఎక్కడ చూసినా మ్యూచువల్ ఫండ్స్ అనే మాట ఎక్కువగా వినిపిస్తోంది. వీటిలో పెట్టుబడి పెట్టేవారు క్రమంగా పెరుగుతున్నారు. దీర్ఘకాలంలో అత్యధిక సంపద పోగుచేయాలనుకునేవారికి ఇవి మంచి ఎంపికలుగా మారుతున్నాయి. గతంలో ఎక్కువ మంది బ్యాంకుల్లోని ఫిక్స్ డ్ డిపాజిట్ పథకాల్లో పెట్టుబడి పెట్టేవారు. ఇప్పుడు వాటితో పాటు మ్యూచువల్ ఫండ్స్ లో ఇన్వెస్ట్ చేస్తున్నారు. వాటిలో సిప్, లంప్సమ్ అనే రెండు విధానాల్లో పెట్టుబడి పెట్టవచ్చు. ఈ రెండింటిలో ఏది మంచిది, దేనిలో ఎక్కువ రాబడి వస్తుందనే విషయాలను ఇప్పుడు తెలుసుకుందాం.
Updated on: Apr 29, 2025 | 5:00 PM
సాధారణంగా పెట్టుబడి ప్రధాన ఉద్దేశం అధిక ఆదాయం సంపాదించడమే. కాబట్టి సక్రమమైన వ్యూహాలు, మార్కెట్ పై అవగాహన అవసరం. దీనికోసం పెట్టుబడిదారులు ఎందుకు, ఎలా, ఎక్కడ అనే విధానంలో ముందుకు వెళ్లాలని ఆర్థిక నిపుణులు సూచిస్తున్నారు. వీటిలో ఎందుకు అనే మీ ఆర్థిక లక్ష్యం, ఎలా అనేది మీకు వచ్చే నగదుపై ఆధారపడి ఉంటుంది. అంటే సిప్, లంప్సమ్ విధానాల్లో పెట్టుబడి పెట్టడం, చివరిగా ఎక్కడ అంటే రాబడినిచ్చే ఫండ్స్ ను ఎంపిక చేసుకోవడం. ఈ మూడింటినీ సక్రమంగా నిర్వహిస్తే మీ ఆర్థిక విజయానికి తిరుగు ఉండదు.
ప్రతినెలా వాయిదాల రూపంలో పెట్టుబడి పెట్టే విధానాన్ని సిస్టమాటిక్ ఇన్వెస్ట్ మెంట్ ప్లాన్ (సిప్) అంటారు. అలా కాకుండా ఒకే సారి డబ్బును ఇన్వెస్ట్ చేస్తే దాన్ని లంప్సమ్ అంటారు. ఈ రెండు మధ్య తేడాల్లోకి వెళితే.. దీర్ఘకాలిక ఆర్థిక లక్ష్యాలు నెరవేర్చుకోవడానికి సిప్ లు ఉపయోగపడతాయి. అస్థిర మార్కెట్ల పరిస్థితుల్లో ఇవి మంచి ఎంపికగా మారతాయి. ఎందుకంటే రూపాయి విలువ తగ్గినప్పుడు మీరు మరిన్ని యూనిట్లను కొనుగోలు చేయవచ్చు. నెలవారీ ఆదాయం పొందే వారికి సిప్ లు మంచి ఎంపిక. అయితే సిప్ లను కాలానుగుణంగా పెంచుకుంటూ వెళ్లకపోతే మీరు అనుకున్న ఆర్థిక లక్ష్యాన్ని చేరుకోలేకపోవచ్చు.
లంప్సమ్ పెట్టుబడులు మరో రకమైన ప్రయోజనం కలిగిస్తాయి. ఒకేసారి పెద్దమొత్తంలో పెట్టుబడి పెడితే దానికి అనుగుణంగా రాబడిని ఇచ్చే మార్గాలను ఎంపిక చేసుకోవచ్చు. వాటిలో లాభదాయకమైన దానిలో ఇన్వెస్ట్ చేయవచ్చు. అంటే వన్ టైమ్ ఇన్వెస్ట్ మెంట్ అన్నమాట. తక్కువ సమయంలో పని పూర్తవ్వడంతో పాటు ప్రతి నెలా ఆలోచించే అవసరం ఉండదు. అయితే ఏకమొత్తంలో పెట్టుబడి పెట్టడం వల్ల రిస్క్ కూడా ఎక్కువే ఉంటుంది. మార్కెట్ క్షీణిస్తే పెట్టుబడి ప్రమాదంలో పడుతుంది. ఈ విధానంలో లాభాలూ ఎక్కువే, రిస్కు కూడా ఎక్కువే.
ఏది ఏమైనా సిప్, లంప్సమ్ పెట్టుబడులు అనేవి మీకు వచ్చే ఆదాయానికి అనుగుణంగా ప్లాన్ చేసుకోవాలి. ఇవి ధీర్ఘకాలంలో రాబడిని ఇస్తాయి . కాబట్టి మీ ఆదాయాన్ని జాగ్రత్తగా ఖర్చు చేసి, కుటుంబ అవసరాలకు పోను మిగిలిన దాన్ని ఇన్వెస్ట్ చేయాలి. అప్పుడు మీరు ఆర్థికంగా విజయం సాధించే అవకాశం ఉంటుంది.
మరిన్ని బిజినెస్ వార్తల కోసం ఇక్కడ క్లిక్ చేయండి..
