White-Collar Hirings: ఏఐ, మెషిన్ లెర్నింగ్ రంగాల్లో పెరిగిన జాబ్ ఆఫర్స్.. టాప్ రేసులో తెలంగాణ
ఏఐ, మెషిన్ లెర్నింగ్.. వంటి వైట్ కాలర్ ఉద్యోగ నియామకాలు అక్టోబర్ నెలలో పుంజుకున్నట్లు నౌక్రి జాబ్స్పీక్ ఇండెక్స్ తాజా నివేదిక వెల్లడించింది. అంతేకాకుండా ఈ ఏడాది ప్రారంభంలో మందగమనంగా సాగిన ఫ్రెషర్స్ నియామకాలు కూడా అక్టోబర్ నాటికి భారీగా పెరిగినట్లు తెలిపింది..
Updated on: Nov 05, 2024 | 12:32 PM
ఏఐ, మెషిన్ లెర్నింగ్ (AI/ML) వంటి నూతన టెక్నాలజీతో అక్టోబర్లో వైట్ కాలర్ జాబ్స్ 10 శాతం పెరిగాయని నౌక్రి జాబ్స్పీక్ ఇండెక్స్ పేర్కొంది. ప్రస్తుత ఆర్థిక సంవత్సరంలో ఆయిల్ & గ్యాస్ (18%), ఫార్మా & బయోటెక్ (12%), FMCG (8%), IT (6%).. ఈ నాలుగింటిలో గత ఏడు నెలల్లో ఐటీ ఉద్యోగ నియామకాల్లో గణనీయమైన వృద్ధి నమోదు చేసింది. .
AI/ML రంగాల్లో అసాధారనంగా 39% వార్షిక, 2% నెలవారీ వృద్ధిని సాధించాయి. వైట్ కాలర్ నియామకాల్లో 28% పెరుగుదలతో IT యునికార్న్స్ అద్భుత పనితీరును ప్రదర్శిస్తున్నాయి. మొత్తంమీద గ్లోబల్ కెపాబిలిటీ సెంటర్లు (GCCలు) 17% వార్షిక పెరుగుదలతో స్థిరమైన వృద్ధిని నమోదు చేశాయి. ఈ GCCలలో కోల్కతా 68.46% వృద్ధి, అహ్మదాబాద్ 47.68% వృద్ధితో వేగంగా అభివృద్ధి చెందుతున్న సెంటర్లుగా నిలిచాయి. అంతర్జాతీయ కంపెనీలు భారత్లో తమ కార్యకలాపాల విస్తరణకు పెరుగుతున్న ప్రాధాన్యతను సూచిస్తున్నాయని తాజా సూచీలు నిర్ధారిస్తున్నాయి.
దక్షిణాది రాష్ట్రాల్లో డేటా-సెంట్రిక్ రోల్స్ నియామకాలు అక్టోబర్లో వృద్ధికి దారితీశాయని ఇండెక్స్ హైలైట్ చేసింది. 24% వార్షిక వృద్ధితో తమిళనాడు అగ్రస్థానంలో నిలవగా.. ఆ తర్వాత స్థానాల్లో 16 శాతంతో తెలంగాణ, 12 శాతంతో కర్ణాటక, 9 శాతంతో ఆంధ్రప్రదేశ్, 7 శాతంతో కేరళ నిలిచాయి. హైదరాబాద్, చెన్నై రీసెర్చ్ అండ్ అనలిటిక్స్ ఇండస్ట్రీ నియామకాల్లో అగ్రగామిగా ఉన్నాయి. ఇవి వరుసగా 51%, 50% ఆకట్టుకునే రీతిలో వృద్ధిని కొనసాగిస్తున్నాయి. కొచ్చిన్ బ్యాంకింగ్, ఫైనాన్షియల్ సర్వీసెస్ అండ్ ఇన్సూరెన్స్ (BFSI) 40 శాతం వార్షిక పెరుగుదలను సూచిస్తుంది. 2024లో మందగమనంలో సాగుతున్న ఫ్రెషర్స్ నియాయకాలు అక్టోబర్లో 6% వార్షిక పెరుగుదలతో సానుకూలంగా మారింది.
ఆర్కిటెక్చర్ అండ్ ఇంటీరియర్ డిజైన్లో 57%, KPO & అనలిటిక్స్ 39%, అగ్రికల్చర్ & డైరీ 36% రంగాలు ఫ్రెషర్స్ నియామకాల్లో పెరుగుదలకు దోహదం చేశాయని చెప్పవచ్చు. ముఖ్యంగా ఫ్రెషర్స్ నియామకాల్లో వేగం వ్యాపార విస్తరణకు బలమైన సూచికని, రాబోయే గ్రాడ్యుయేట్లకు మరిన్ని అవకాశాలను అందిస్తుందని నౌక్రి చీఫ్ బిజినెస్ ఆఫీసర్ పవన్ గోయల్ అన్నారు.
