అందరికీ అదో పెద్ద జోక్.. ‘బిగ్‌బాస్‌’పై చిన్మయి ఫైర్

ప్రముఖ రియాలిటీ షో బిగ్‌బాస్‌పై వివాదాలు కొనసాగుతూనే ఉన్నాయి. తెలుగు, తమిళం, హిందీ తేడా లేకుండా ప్రతి భాషలోనూ ఈ షోను ఆపివేయాలంటూ కొందరు తమ గొంతును వినిపిస్తూనే ఉన్నారు. కాగా తమిళ్‌లో ఇటీవల టెలికాస్ట్‌ అయిన బిగ్‌బాస్‌ ఎపిసోడ్‌పై ఫైర్ అయ్యారు ప్రముఖ సింగర్, డబ్బింగ్ ఆర్టిస్ట్ చిన్మయి.

‘‘మహిళలను తడిమేందుకే మేము బస్సులను ఎక్కేవాళ్లమని ఓ సెలబ్రిటీ చెప్పిన వ్యాఖ్యలను తమిళ ఛానెల్ గర్వంగా ప్రసారం చేసింది. ఆ వ్యాఖ్యలకు అక్కడున్న అందరూ ఎంజాయ్ చేయడం గమనర్హం. ప్రేక్షకులు, మహిళలపై లైంగిక దాడులకు పాల్పడే వారందరికీ ఇదో పెద్ద జోక్’’ అని చిన్మయి కామెంట్ పెట్టారు.

కాగా ఇటీవల జరిగిన బిగ్‌బాస్ తమిళ్ ఎపిసోడ్‌లో నటి మీరా మిథున్ మాట్లాడుతూ.. టాస్క్‌ పేరుతో తనపై చేయి చేసుకున్నాడని దర్శకుడు చేరన్‌పై బిగ్‌బాస్ వ్యాఖ్యత కమల్‌ హాసన్‌కు ఫిర్యాదు చేసింది. దానికి స్పందించిన కమల్.. ‘‘ఎవరూ కావాలనే అమ్మాయిలను ఇబ్బందిపెట్టరు.. ఉదాహరణకు రస్సుగా ఉన్న బస్సులో వెళ్లే వారు మహిళలను ఇబ్బంది పెట్టడానికి వెళ్లరు.. కొందరు తమ పని మీద కూడా వెళ్తుంటారు’’ అన చెప్పుకొచ్చాడు. దీనికి వెంటనే అక్కడున్న మరో కంటెస్టెంట్ శరవణన్ మాట్లాడుతూ.. ‘‘కాలేజీ సమయంలో అమ్మాయిలు ఉంటారన్న ఉద్దేశ్యంతోనే తాను రస్సుగా ఉన్న బస్సుల్లో వెళ్లేవాడిని’’ అని చెప్పాడు. ఇక ఈ మాటలకు అక్కడున్న వారందరూ క్లాప్స్ కొడుతూ ఎంజాయ్ చేశారు. ఆ తరువాత కమల్ హాసన్ నవ్వుతూ.. ‘‘ఇతడు అన్ని చేశాడు. ఇప్పుడు పవిత్రుడయ్యాడు’’ అంటూ శరవణన్‌ను ఉద్దేశించి తన ‘గుణ’ చిత్రంలోని డైలాగ్‌ను చెప్పి ముగించాడు.

ఈ వీడియోను చిన్మయి షేర్ చేస్తూ.. ‘బిగ్‌బాస్‌’ ఎపిసోడ్‌పై తన అసంతృప్తిని వ్యక్తం చేశారు. కాగా ఆ వీడియోపై పలువురు నెటిజన్లు కూడా ఫైర్ అవుతున్నారు.

A Tamil channel aired a man proudly proclaiming he used the Public Bus Transport system to molest/grope women – to cheers from the audience.

And this is a joke. To the audience. To the women clapping. To the molester.

Damn. https://t.co/kaL7PMDw4u

— Chinmayi Sripaada (@Chinmayi) July 27, 2019