Tirumala: శ్రీవారి కానుకలు వేలం.. వాచీలు, మొబైల్స్‌కి రూ. లక్షల్లో ఆదాయం..

తిరుమల వెంకన్నకు భక్తులు వివిధ రూపాల్లో మొక్కులు చెల్లిస్తారు. ఆపదమొక్కుల స్వామికి కానుకలు సమర్పిస్తారు. ఇలా వడ్డికాసుల వాడికి కానుకలు సమర్పించే భక్తులు నిలువు దోపిడీ మొక్కును చెల్లిస్తారు. ముడుపులు కట్టి హుండీ లో కానుకలు సమర్పిస్తుంటారు. తిరుమల శ్రీవారి ఆలయంతో పాటు టీటీడీ అనుబంధ ఆలయాల్లో నిండుతున్న హుండీ కానుకలను పరకామణిలో లెక్కిస్తున్న టీటీడీ అందులో వచ్చే వస్తువులను పలు రకాలుగా వెంకన్న ఖాతాకు జమ చేస్తోంది.

హుండీలో కానుకలుగా వచ్చే నగదు, బంగారు, బియ్యం, వస్త్రాలు, ఎలక్ట్రానిక్ వస్తువులు ఇలా పలు రకాల కానుకలను వేరుచేసి వేలం వేస్తున్న టిటిడి శ్రీవారి ఆదాయంగా పరిగణిస్తోంది. తిరుమల వెంకన్న ఆలయంలోకి అనుమతి లేని మొబైల్స్, ఎలక్ట్రానిక్స్ వాచీలతో వచ్చే భక్తులను తనిఖీ చేసి స్వాధీనం చేసుకునే వస్తువులు శ్రీవారి హుండీకి చేరుతుండగా వాటిని కూడా టీటీడీ వేలం వేసి హుండీ ఆదాయంగా పరిగణిస్తుంది. స్వామివారి దర్శనానికి వెళ్లే ముందు మొబైల్స్ డిపాజిట్ చేసి తిరిగి తీసుకెళ్లకుండా వెళ్లే భక్తుల ఎలక్ట్రానిక్ గూడ్స్, మొబైల్స్ లను వేలం వేసేందుకు ట్రెజరీలో డిపాజిట్ చేస్తున్న టిటిడి ఈ మేరకు ప్రతి మూడు నెలలకు ఒకసారి ఆన్ లైన్ వేలం ప్రక్రియను నిర్వహిస్తోంది.

వేలంలో పాల్గొనే కొనుగోలుదారులు కానుకలను నేరుగా పరిశీలించుకునే అవకాశాన్ని కూడా టీటీడీ కల్పిస్తోంది. ఈ మేరకు కొనుగోలు పోర్టర్ లో తమ పేర్లను నమోదు చేసుకునేందుకు వెసులుబాటు కల్పిస్తోంది. ఇలా హుండీ కానుకలుగా వచ్చే వాచీలు, మొబైల్ ఫోన్లను మూడు నెలలకు ఒకసారి వేలం వేస్తున్న టీటీడీ ఈ మేరకు ఈ-ఆక్షన్ నిర్వహిస్తోంది. ఇందులో భాగంగా ఈ ఏడాది మార్చి 13న వేలం నిర్వహించిన టిటిడి 50 లాట్స్ గా విభజించి మొబైల్ ఫోన్లు, వాచీలను ఈ-వేలం నిర్వహించింది.

ఈ మేరకు కొనుగోలు పోర్టర్ లో ఆన్ లైన్ రిజిస్టర్ చేసుకున్న వారు బిడ్డింగ్ లో పాల్గొనగా 12 లాట్స్ లో మొబైల్ ఫోన్లు, వాచీలు సేల్స్ అయ్యాయి. ఈ మేరకు రూ. 8.11 లక్షల ఆదాయం టిటిడికి వచ్చింది. ఇక మిగిలిపోయిన మరో 38 లాట్స్ కు ఈ రోజు ఈ-వేలం నిర్వహించిన టిటిడి మార్కెటింగ్ విభాగం అధికారులు 14 లాట్స్ లోని 493 వాచీలు, 24 లాట్స్ లోని 258 మొబైల్ ఫోన్స్ అమ్మకానికి పెట్టింది. దాదాపు రూ. 42 లక్షల ఆదాయం వచ్చేలా శ్రీవారికి కానుకగా వచ్చిన వాచీలు మొబైల్ ఫోన్లను విక్రయించేందుకు టీటీడీ వేలం నిర్వహించింది.

మరిన్ని ఆంధ్రప్రదేశ్ వార్తల కోసం క్లిక్ చేయండి..