Andhra: కొత్తగా ఫ్లాట్ కొంటున్నారా.? ఈ చిన్న లాజిక్ తెలియకపోతే కొంప కొల్లేరే.!

ఆధునిక జీవనశైలి పెరిగే కొద్దీ అపార్ట్మెంట్లపై ఆకర్షణ కూడా అంతే వేగంగా పెరిగిపోతోంది. ప్రతి కుటుంబం తమ కలలింటి కోసం వేచి చూస్తోంది. కానీ ఆ కలలు నిజం కావాలంటే, ఒక చిన్న కానీ కీలకమైన విషయాన్ని తప్పకుండా గమనించాల్సిన అవసరం ఉంది. అదే ఏంటంటే, మీకు ఆసక్తిగా ఉన్న ఫ్లాట్ లేదా ప్లాట్ ఏపీలో నమోదు అయిందా లేదా అన్నది. తాజాగా ఏపీ RERA చైర్మన్, MAUD ముఖ్య కార్యదర్శి సురేష్ కుమార్ ఒక కీలక హెచ్చరిక జారీ చేశారు. రాష్ట్రవ్యాప్తంగా అనుమతి లేకుండా కొన్ని ప్రాజెక్టులు ‘ప్రీ-లాంచ్’ పేరుతో పబ్లిసిటీ చేస్తూ, కస్టమర్ల నుండి ముందస్తు డిపాజిట్లు వసూలు చేస్తున్నట్లు గుర్తించామని తెలిపారు. ఇది పూర్తిగా రియల్ ఎస్టేట్ రెగ్యులేషన్ అండ్ డెవలప్‌మెంట్ చట్టం, 2016కు విరుద్ధమని ఆయన స్పష్టం చేశారు.

ఎందుకు RERA అనేది అంత అవసరం?

RERA అనేది ఒక ప్రతిష్టాత్మకమైన రెగ్యులేటరీ వ్యవస్థ. ఇది వినియోగదారులను రక్షించడమే లక్ష్యంగా ఏర్పడింది. ఈ చట్టం కింద బిల్డర్లు, డెవలపర్లు తమ ప్రాజెక్టులను RERAలో నమోదు చేయాల్సి ఉంటుంది. అనుమతులు, ఫైనాన్షియల్ స్టేటస్, ప్రాజెక్ట్ డీటెయిల్స్ వంటి విషయాలు పూర్తిగా పరిశీలించాకే వారు మార్కెటింగ్ ప్రారంభించగలుగుతారు.

RERA నంబర్ లేకుండా చేసే ప్రకటనలు, బుకింగ్‌లు, డిపాజిట్లు— అన్నీ అనైతికమేనని అన్నారు. ప్రీ లాంచ్ మాయాజాలం – మోసాలకు బలవుతున్న వారు సామాన్యులే. “ఇంకా పనులు ప్రారంభించలేదు, కానీ మీకు ప్రత్యేక డిస్కౌంట్ మీద ఓ ఫ్లాట్ బుక్ చేసుకోండి” అంటూ కొంతమంది డెవలపర్లు వినియోగదారులను ఆకట్టుకుంటున్నారు. వాస్తవానికి ఇది చాలా ప్రమాదకరం. ఎందుకంటే అసలు ప్రాజెక్ట్‌కు అధికారిక అనుమతులు ఉన్నాయా లేదా అన్నదే తెలియదు. నిర్మాణం ఏ స్థాయికి చేరుకుంటుందో, ఎప్పటికి పూర్తి అవుతుందో అన్న అనిశ్చితి ఉంటుంది. అలాంటి ప్రాజెక్టులు నాణ్యత లోపాలు, డిలేలు, లీగల్ ఇష్యూలు వంటి సమస్యలకు దారితీస్తాయి

చట్టం ఏమంటోంది?

ప్రాజెక్ట్‌ను RERAలో నమోదు చేయకముందే డిపాజిట్లు తీసుకోవడం పూర్తిగా నిషేధం. ఇదే తరహాలో ప్రమోషన్, ప్రకటనలు, బుకింగ్‌లు కూడా చట్టానికి వ్యతిరేకం.” — AP RERA చైర్మన్, సురేష్ కుమార్

ఇదే కాకుండా, వినియోగదారుల ఫిర్యాదులను RERA స్వయంగా పరిశీలించి చర్యలు తీసుకునే అధికారం కలిగి ఉంది. ఇలాంటి మోసాల నుంచి మీరు ఎలా కాపాడుకోగలరు?

1. RERA వెబ్‌సైట్ (https://www.rera.ap.gov.in) ద్వారా ప్రాజెక్ట్ RERA నంబర్, లైసెన్స్ వివరాలు చెక్ చేయండి.

2. “ప్రి-లాంచ్” పేరుతో అడిగే డిపాజిట్లను ఎట్టి పరిస్థితుల్లోనూ చెల్లించవద్దు.

3. పత్రపూర్వక ఒప్పందాలు లేకుండా ఏ డాక్యుమెంట్‌పై సంతకం పెట్టవద్దు.

4. ఒకసారి డబ్బు ఇచ్చాక సమస్యలు వస్తే RERA అధికారికంగా ఫిర్యాదు చేయండి.

వినియోగదారులకు సూచన

మీ డబ్బు, మీ భవిష్యత్తు – అవి మీ చేతిలోనే ఉంటాయి. సొంతింటి కలను నెరవేర్చాలంటే కచ్చితంగా బాధ్యతతో నిర్ణయాలు తీసుకోవాలి. నమ్మకమైన, RERAలో నమోదైన డెవలపర్లను మాత్రమే ఎంచుకోవాలి. తక్కువ ధర, ఫాన్సీ ప్రకటనలు, ప్రీ లాంచ్ ఆఫర్లకు ఆకర్షితులవ్వకండి. అది మీ గడచిన శ్రమ ఫలితాన్ని పోగొట్టే ప్రమాదం కలిగించవచ్చు.

ఫైనల్‌గా..

కొత్త ఇంటి కలను నెరవేర్చాలంటే ముందు అడుగు సరైనదిగా ఉండాలి. RERA లాంటి చట్టాలను పట్టించుకోకుండా ముందుకు వెళ్లే నిర్ణయాలు చివరకు పశ్చాత్తాపానికి దారితీస్తాయి. కనుక, మీ ఇంటి కలకు భద్రత కలిగించేలా, చట్టబద్ధంగా ముందుకు సాగండి. ఎందుకంటే… చిన్న తప్పు… గొప్ప నష్టానికి దారి తీస్తుంది!