బంధువులు కనకదుర్గమ్మ శ్రీచక్ర అర్చన బుక్ చేయమంటే.. ఇతను ఏం చేశాడో తెలుసా..?

గుంటూరుకు చెందిన రాజేష్ పదో తరగతి వరకు చదువుకున్నాడు. ఆటో నడుపుకుంటూ జీవనం సాగిస్తున్నాడు. సోషల్ మీడియాలో ఎక్కువ సమయం గడిపే రాజేష్‌కు ఇటీవల బంధువులు ఫోన్ చేశారు. విజయవాడ కనకదుర్గమ్మ ఆలయంలో నిర్వహించే శ్రీచక్ర అర్చనకు సంబంధించిన టికెట్ కావాలని అడిగారు. దీంతో ఆన్‌లైన్‌లో టికెట్ల కోసం వెతికిన రాజేష్.. సేవా టికెట్ ఫొటోను డౌన్‌లోడ్ చేసుకున్నాడు. అనంతరం దాన్ని ఫోర్జరీ చేసి, అందులోని క్యూఆర్ కోడ్‌ను తొలగించి నకిలీ టికెట్ తయారు చేశాడు. దాన్ని తన బంధువులకు పంపించి.. వారి నుంచి రూ.3,500 తీసుకున్నాడు. అయితే టికెట్ అందుకున్న బంధువులకు అనుమానం వచ్చింది. క్యూఆర్ కోడ్ లేకపోవడంతో ఆలయ అధికారులను సంప్రదించారు. పరిశీలించిన అధికారులు అది నకిలీ టికెట్ అని తేల్చారు. విషయం బయటపడటంతో రాజేష్ అప్రమత్తమయ్యాడు.

ఫ్యాక్టరీ రీసెట్ చేస్తే ఆధారాలు పోతాయని భావించాడు

పోలీసులు విచారణ చేపడతారని భావించిన రాజేష్.. తన ఫోన్‌ను ఫ్యాక్టరీ రీసెట్ చేశాడు. ఫోన్‌లోని ఆధారాలన్నీ తొలగిపోయాయని, ఇక తనను గుర్తించడం కష్టమని భావించాడు. కేసు నమోదు చేసిన పోలీసులు రాజేష్‌ను అదుపులోకి తీసుకుని అతడి ఫోన్‌ను పరిశీలించారు. అయితే ఫ్యాక్టరీ రీసెట్ కారణంగా ఫోన్‌లో నేరుగా ఎలాంటి ఆధారాలు లభించలేదు. దీంతో పోలీసులు సాంకేతిక ఆధారాలపై దృష్టి సారించారు.

గూగుల్ బ్యాకప్‌లో కీలక ఆధారం

రాజేష్ వినియోగించిన మెయిల్, గూగుల్ డ్రైవ్, బ్యాకప్ వంటి డిజిటల్ వనరులను పోలీసులు పరిశీలించారు. ఈ క్రమంలో నకిలీ టికెట్‌కు సంబంధించిన కాపీ బ్యాకప్‌లో లభించింది. టికెట్‌ను ఎడిట్ చేసినట్లు కూడా పోలీసులు గుర్తించారు. దానికి సంబంధించిన తేదీ, సమయ వివరాలను సాంకేతికంగా సేకరించారు. ఫ్యాక్టరీ రీసెట్ చేసినప్పటికీ.. మెయిల్ ఐడీని తొలగించకపోవడం, గూగుల్ బ్యాకప్‌లో నకిలీ టికెట్‌కు సంబంధించిన ఆధారాలు ఉండటంతో రాజేష్ పోలీసులకు చిక్కాడు. సేకరించిన డిజిటల్ ఆధారాల ఆధారంగా అతడిని అరెస్ట్ చేశారు.

నకిలీ టికెట్లపై అప్రమత్తం

నకిలీ శ్రీచక్ర అర్చన టికెట్ వ్యవహారం వెలుగులోకి రావడంతో ఆలయ అధికారులు, పోలీసులు అప్రమత్తమయ్యారు. డిజిటల్ ఆధారాలను సేకరించి నిందితుడిని గుర్తించడంతో.. భవిష్యత్తులో ఇలాంటి నకిలీ టికెట్ల వ్యవహారాలకు అడ్డుకట్ట వేసేందుకు చర్యలు తీసుకునే అవకాశం ఉంది. ఫోన్‌ను ఫ్యాక్టరీ రీసెట్ చేస్తే డిజిటల్ ఆధారాలు పూర్తిగా తొలగిపోతాయని భావించిన రాజేష్‌కు.. క్లౌడ్ బ్యాకప్, మెయిల్‌లో మిగిలిన డేటా కీలక ఆధారాలుగా మారాయి.