AP Rains: ఉత్తరాంధ్రలో మోస్తరు వర్షాలు.. ఏపీకి ఎల్లో అలెర్ట్.. తాజా వెదర్ రిపోర్ట్

వాయువ్య బంగాళాఖాతంలో ఏర్పడిన అల్పపీడనం కారణంగా ఏపీలోని పలు జిల్లాల్లో వర్షాలు కురుస్తాయని వాతావరణ శాఖ తెలిపింది. బంగాళాఖాతంలో ఉన్న అల్పపీడనం ఉత్తరం వైపు వెళ్తోంది. ఇది క్రమంగా బలపడుతూ.. సోమవారం నాటికి వాయుగుండంగా మారే ఛాన్స్ ఉందంది. పసిఫిక్ మహాసముద్రంలో ఏర్పడి చైనాలో బీభత్సం సృష్టిస్తున్న ‘యాగి’ తుఫాన్ కారణంగా ఈ అల్పపీడనం ఉత్తరం దిశగా కదులుతోందని చెప్పింది. దీంతో ఏపీలో కుండపోత వర్షాల ముప్పు తప్పిందని వాతావరణ నిపుణులు వివరించారు.

అయితే ఈ అల్పపీడనం ప్రభావంతో రాబోయే మూడు రోజుల పాటు ఆంధ్రప్రదేశ్ అంతటా వర్షాలు కురుస్తాయని.. శనివారం, ఆదివారం తేలికపాటి నుంచి ఒక మోస్తరు వర్షం లేదా ఉరుములతో కూడిన జల్లులు అనేక చోట్ల కురిసే అవకాశముందన్నారు. ఉత్తరాంధ్రలో మోస్తరు వర్షాలు కురుస్తాయి. ఏపీకి ఎల్లో అలెర్ట్ జారీ చేసింది వాతావరణ శాఖ. 40 కి.మీ. వేగంతో గాలులు వీస్తాయని మత్స్యకారులు వేటకు వెళ్లొద్దని అధికారులు హెచ్చరించారు.

మరోవైపు తెలంగాణకి భారీగా వర్ష సూచన కనిపిస్తోంది. రోజంతా మేఘాలు ఉంటాయి. సాయంత్రం వేళ ఉత్తర, మధ్య తెలంగాణలో భారీ వర్షాలు కురుస్తాయంది. అటు హైదరాబాద్‌కి మోస్తరు వర్ష సూచన చేసింది వాతావరణ కేంద్రం. ప్రస్తుతం అల్పపీడనం భువనేశ్వర్‌కి దగ్గర‌లో ఉంది. దాని ప్రభావం ఉత్తర తెలంగాణపై కనిపిస్తోంది. తెలంగాణలో గాలి వేగం గంటకు మాగ్జిమం 15 కిలోమీటర్లుగా ఉంటుంది. అల్పపీడనం ప్రభావంతో తెలంగాణలో మూడ్రోజుల పాటు వర్షాలు కురిసే అవకాశముందని హైదరాబాద్ వాతావరణ కేంద్రం పేర్కొంది.