Packet Milk: మీ ఇంటికొచ్చే ప్యాకెట్ పాలు ఎలా తయారవుతాయో తెలుసా..?

మీ ఇంటికి ప్యాకెట్‌లో చేరే పాలు అనేక సంక్లిష్ట దశల గుండా ప్రయాణిస్తాయి. పాడి పశువుల నుంచి పాలు సేకరించడంతో ఈ ప్రయాణం మొదలవుతుంది. పాడి రైతులు ఉదయం 8 గంటలకల్లా పాలు పితికి, వాటిని సమీపంలోని పాల కేంద్రాల్లో పోస్తారు. అక్కడ పాల నాణ్యతను నిర్ధారించడానికి వెన్న శాతం (ఫ్యాట్) పరీక్షలు నిర్వహిస్తారు. తదనంతరం, పాలను క్యాన్లలో నింపి బల్క్ కూలర్‌లకు పంపిస్తారు, ఇక్కడ 4 డిగ్రీల సెల్సియస్ ఉష్ణోగ్రత వద్ద తాత్కాలికంగా నిల్వ చేస్తారు. అనంతరం పాలను ప్రత్యేకమైన ట్యాంకర్లలో డైరీ ప్రాసెసింగ్ ప్లాంట్‌కు తరలిస్తారు. మార్గమధ్యంలో ఎలాంటి ట్యాంపరింగ్ జరగకుండా నిరోధించడానికి ట్యాంకర్లకు సీల్ నంబర్‌లను వేస్తారు. డైరీకి చేరిన తర్వాత, ఈ సీల్‌లను తనిఖీ చేసి, పాలను ప్రాసెసింగ్ హాల్‌లోకి దించుతారు. డైరీలో పాలను లోతుగా పరీక్షిస్తారు. అడల్ట్రెంట్స్ (కల్తీ పదార్థాలు), న్యూట్రలైజర్లు, ప్రిజర్వేటివ్‌ల ఉనికిని గుర్తించడానికి పరీక్షలు చేస్తారు. ఈ పరీక్షలలో ఏ మాత్రం డీవియేషన్ ఉన్నా ఆ పాలను ప్రాసెసింగ్‌కు తీసుకోరు. పాలు అన్ని నాణ్యతా ప్రమాణాలకు అనుగుణంగా ఉన్నాయని నిర్ధారించుకున్న తర్వాతే ప్యాకెట్ పాల తయారీ ప్రక్రియ మొదలవుతుంది.

పాలు ప్రాసెసింగ్ యూనిట్లకు చేరుకున్నాక, వాటిలోని క్రిములను చంపడం, కొవ్వు శాతాన్ని క్రమబద్ధీకరించడం వంటివి చేస్తారు. ముఖ్యంగా, పాలను పాశ్చరైజేషన్ చేస్తారు. ఇది పాలను 74-75 డిగ్రీల సెల్సియస్ వద్ద వేడి చేసే ప్రక్రియ. ఈ ఉష్ణోగ్రత వద్ద మానవులకు హానికరమైన బ్యాక్టీరియా చనిపోతుంది, తద్వారా పాల షెల్ఫ్ లైఫ్ పెరుగుతుంది. తదుపరి దశ హోమోజినైజేషన్. ఈ ప్రక్రియలో అధిక పీడనంతో కొవ్వు కణాలను పాలలో సమానంగా విస్తరించేలా చేస్తారు, ఫలితంగా పాలు చిక్కగా, క్రీమీగా ఉంటాయి. ఆ తర్వాత, సెంట్రిఫ్యూజ్ పద్ధతిలో క్రీమ్ సెపరేటర్ల ద్వారా పాలలోని ప్రొటీన్లు, కొవ్వు, నీటిని వేరు చేస్తారు. పాల నుంచి వేరు చేసిన కొవ్వు నుండి నీటిని తొలగించి వెన్నను తయారు చేస్తారు. ఉదాహరణకు, 20,000 లీటర్ల పాల నుండి సుమారు 2,000 లీటర్ల వెన్న ఉత్పత్తి అవుతుంది. పాలలో ఉండే కొవ్వు శాతాన్ని బట్టి టోన్డ్, డబుల్ టోన్డ్, ఫుల్ క్రీమ్ వంటి వివిధ రకాల ప్యాకెట్లను తయారు చేస్తారు. 6% కొవ్వు, 9% SNF (సాలిడ్స్-నాట్-ఫ్యాట్) ఉండే ఆరెంజ్ ప్యాకెట్ (ప్యాశ్చరైజ్డ్ ఫుల్ క్రీమ్ మిల్క్) రుచిగా ఉంటుంది. ఇది స్వీట్ షాపులు, హోటళ్ళు వంటి వారికి అనుకూలం. 4.5% కొవ్వు, 8.5% SNF ఉండే స్టాండర్డైజ్డ్ మిల్క్ పెరుగుతున్న పిల్లలకు, క్రీడాకారులకు శక్తిని అందిస్తుంది. ఇక 3% కొవ్వు ఉండే గ్రీన్ ప్యాకెట్ (ప్యాశ్చరైజ్డ్ టోన్డ్ మిల్క్) అన్ని కుటుంబాల వారికి సాధారణంగా ఉపయోగపడుతుంది. డబుల్ టోన్డ్ మిల్క్‌లో 1.5% కొవ్వు ఉంటుంది, దీనిలో వెన్న రావడం కష్టం. వెన్న లేదా మీగడ కావాలంటే, హోమోజినైజ్ చేయని ప్యాశ్చరైజ్డ్ హోల్ మిల్క్ తీసుకోవడం మంచిది.

ప్రాసెసింగ్ పూర్తయిన తర్వాత, పాలను ఆటోమేటిక్ మెషిన్ల ద్వారా ప్యాకెట్లలో నింపి సీల్ చేస్తారు. ప్యాకింగ్ ప్రక్రియ చాలా వేగంగా జరుగుతుంది. గంటకు సుమారు 8,000 నుండి 10,000 ప్యాకెట్లను ప్యాక్ చేయగల హై-స్పీడ్ మెషిన్లను ఉపయోగిస్తారు. పాలు ఎక్కువ కాలం నిల్వ ఉండేలా టెట్రా ప్యాక్‌లలో కూడా ప్యాక్ చేస్తారు. తయారైన పాల ప్యాకెట్లను కోల్డ్ స్టోరేజ్‌లో నిల్వ చేసి, అర్ధరాత్రి తర్వాత నుండి వివిధ ప్రాంతాలకు పంపిణీ చేస్తారు.

Also Read: ఈ ఆలయానికి వెళ్లి దీక్ష తీసుకుంటే.. మద్యపానం జోలికే వెళ్లరు..!