AP Municipal Results: ఆంధ్రప్రదేశ్ మున్సిపల్ ఫలితాల్లో వైసీపీ జోరు.. మైదుకూరు, తాడిపత్రిలో టీడీపీ హవా

AP Municipal elections results : ఆంధ్రప్రదేశ్ మున్సిపాలిటీలు, మున్సిపల్ కార్పొరేషన్లు, నగర పంచాయతీ ఎన్నికల ఓట్ల లెక్కింపు పూర్తైంది. అయితే, పట్టణవాసులు ఇచ్చిన తీర్పు పూర్తిగా ఏకపక్షంగా సాగింది. ఆది నుంచి చివరి దాకా ఫ్యాన్ గాలి కొనసాగింది. ఆడా ఈడా కాదు… అన్నింటా మనమే.. అన్నిచోట్ల మనమే అన్నట్లు సాగింది. మున్సిపల్‌ ఎన్నికల్లో తిరుగులేని రికార్డు సాధించి విపక్షాల జాడ కనపడకుండా చేసింది అధికారపార్టీ. పంచాయితీ ఎన్నికల్లోనూ మెజార్టీ దక్కించుకున్నా.. గుర్తులు లేకపోవడంతో సాధికారికంగా చెప్పలేకపోయిన పార్టీ.. తాజా ఫలితాలతో ప్రతిపక్షాలకు స్ట్రాంగ్‌ కౌంటర్‌ ఇచ్చింది.

మొత్తం రాష్ట్ర వ్యాప్తంగా 13జిల్లాల్లో జరిగిన పురపోరులో 11 కార్పొరేషన్లు…71మున్సిపాలిటీలకు 10న ఎన్నికలు జరిగాయి. అయితే ఇందులో పశ్చిమగోదావరి జిల్లాలోని ఏలూరు కార్పొరేషన్‌తో పాటు గుంటూరు జిల్లా చిలకలూరిపేట మున్సిపాలిటీ ఫలితాలను మాత్రం హైకోర్టు ప్రకటించవద్దని ఆదేశించింది. దీంతో మిగిలిన 11 కార్పొరేషన్‌లు, 70మున్సిపాలిటీల ఫలితాలు వెలవడ్డాయి. కార్పొరేషన్‌ల విషయానికి వచ్చేసరికే…గుంటూరు, విజయవాడ, విశాఖపట్నం, మచిలీపట్నం, ఒంగోలు, కర్నూలు, కడప, చిత్తూరు, తిరుపతి, అనంతపురం , విజయనగరం కార్పొరేషన్‌ ఎన్నికల ఓట్ల లెక్కింపు జరుగుతుంది.

మున్సిపల్ ఎన్నికల్లో 99 శాతం వైఎస్సార్‌సీపీ ఘన విజయం సాధించింది. ఈ ఎన్నికల్లో టీడీపీతో ప్రతిపక్ష పార్టీలన్ని తుడిచిపెట్టుకుపోయాయి. మొత్తం 70 మున్సిపల్ స్థానాలకు గానూ అధికార వైఎస్సార్‌సీపీ 68 మున్సిపాలిటీల్లో ఘన విజయం సాధించి పట్టప్రాంతాల్లో తిరుగులేని శక్తిగా ఎదిగింది.అయితే కడప జిల్లా మైదుకూరు మున్సిపాలిటీలో హోరాహోరీ నెలకొంది. ఇక్కడ మొత్తం 24 వార్డులుండగా… టీడీపీదే పైచేయి అయింది. టీడీపీకి 12, వైసీపీకి 11, జనసేనకు ఒక వార్డు దక్కాయి. అనంతపురం జిల్లా తాడిపత్రిలోనూ టీడీపీ, వైసీపీ మధ్య నువ్వానేనా అన్నట్టు సాగుతోంది. ఇక్కడ మొత్తం 36 వార్డులు ఉండగా, ఏకగ్రీవాలు అన్నీ కలుపుకుని వైసీపీ 12 చోట్ల విజయం సాధించగా, టీడీపీ 20 స్థానాల్లో నెగ్గింది. సీపీఐ 1, జనసేన 1, ఇండిపెండెంట్ అభ్యర్థికి ఒక స్థానం దక్కాయి. తాడిపత్రిలో 24వ వార్డు అభ్యర్థిగా బరిలో దిగిన టీడీపీ నేత జేసీ ప్రభాకర్ రెడ్డి గెలుపొందడంతో పార్టీ వర్గాలు సంబరాలు చేసుకుంటున్నాయి.

ఇక, మొత్తం 11 కార్పొరేషన్లకు గానూ విశాఖపట్నం, తిరుపతి, చిత్తూరు, గుంటూరు, కర్నూలు, ఒంగోలు, కడప, మచిలీపట్నం, విజయనగరం మున్సిపల్ కార్పొరేషన్లు వైసీపీ ఖాతాలో చేరాయి. ఏలూరు మున్సిపల్ కార్పొరేషన్‌కు సంబంధించి ఫలితాన్ని హైకోర్టు ఆదేశాలతో ఫలితాన్ని ఎన్నికల అధికారులు రిజర్వ్‌లో ఉంచారు.

11 మున్సిపల్ కార్పొరేషన్లు, 71 మున్సిపాలిటీలు, నగర పంచాయతీల్లో ఓట్లను లెక్కిస్తున్నారు. ఫలితాలకు సంబంధించిన అప్‌డేట్స్ ఇలా ఉన్నాయి..