ఆర్టీసీ ప్రయాణికులకు అదిరిపోయే శుభవార్త.. ఇక బస్సులో ప్రయాణం మరింత సులభతరం

ఏపీలో ఆర్టీసీ బస్సులో ప్రయాణాన్ని మరింత సులభతరం చేసేందుకు, ప్రయాణికుల రద్దీని తగ్గించేందుకు ప్రభుత్వం కీలక నిర్ణయం తీసుకుంది. పీఎం ఈ-బస్ సేవా పథకం కింద రాష్ట్రానికి ఎలక్ట్రిక్ బస్సులను అందించాలని కోరింది. దీనిపై సానుకూలంగా స్పందించిన కేంద్రం తొలి విడతగా రాష్ట్రానికి 750 బస్సులను అందించేందుకు నిర్ణయం తీసుకుంది. త్వరలోనే ఈ బస్సులు రాష్ట్రానికి చేరనున్నాయని కేంద్రం తెలిపింది. దీంతో బస్సుల వినియోగానికి అన్ని ఏర్పాటు చేయాలని అధికారులకు సీఎస్ ఆదేశాలు జారీ చేశారు.

అయితే కేంద్రం అందించే ఈ 750 బస్సులను రాష్ట్రవ్యాప్తంగా 11 నగరాల్లో అందుబాటులోకి తీసుకురానున్నట్టు అధికారులు తెలిపారు. కాబట్టి ఆయా ప్రాంతాల్లో ఎలక్ట్రిక్ బస్సుల ఛార్జింట్ స్టేషన్‌లు, బస్సుల నిర్వాహణకు అవరమైన సిబ్బందికి శిక్షణ ఇవ్వాలని సీఎస్ అధికారులకు సూచించారు. ఇక ఈ ఎలక్ట్రిక్ బస్సులకు కావాల్సిన మౌలిక వసతుల కోసం మొత్తం 12 డిపోల పరిధిలో 129.51 కోట్లు వెచ్చిస్తున్నట్టు రవాణాశాఖ ప్రత్యేక ప్రధానకార్యదర్శి తెలిపారు. ఈ మొత్తం నిధుల్లో 60 శాతం నిధులను కేంద్ర భరించనుండగా మిగతా 40 శాతం మాత్రం రాష్ట్ర ప్రభుత్వం సమకూరుస్తుందని తెలిపారు.

కేంద్రం నుంచి తొలి విడతలో భాగంగా వచ్చే ఈ 750 బస్సులను విశాఖపట్నం, కాకినాడ, రాజమహేంద్రవరం, విజయవాడ, అమరావతి, గుంటూరు, నెల్లూరు, తిరుపతి, కడప, అనంతపురం, కర్నూలు జిల్లాల్లో అందుబాటులోకి తీసుకురావాలని నిర్ణయం తీసుకున్నట్టు అధికారులు తెలిపారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.