బతుకమ్మ ఆడుతున్న మహిళలను అడ్డుకున్న ఎస్సై

మహిళలంతా ఒక చోట చేరి సందడిగా బతుకమ్మ ఆడుతుండగా ఓ పోలీస్ అధికారి వారి పట్ల అత్యుత్సాహం ప్రదర్శించాడు. దేవి నవరాత్రులు కావడంతో సాయంత్రం వేళ అమ్మవారి విగ్రహం ఎదుట మహిళలు బతుకమ్మలు ఏర్పాటు చేసి ఆడుతుండగా అటుగా వచ్చిన ఎస్సై వారిని అడ్డుకున్నారు. ఈ ఘటన ఏపీలోని కృష్ణా జిల్లాలో చోటు చేసుకుంది.

క‌ృష్ణా జిల్లా వీరులపాడు మండలంలో ఎస్సై హరిప్రసాద్ అత్యుత్సాహం ప్రదర్శించారు. వీరులపాడు మండలం జయంతి గ్రామంలో ఎస్సై హరిప్రసాద్ హల్‌చల్ చేశాడు. గురువారం సాయంత్రం అమ్మవారి విగ్రహం ఎదురుగా మహిళలు బతుకమ్మ ఆట ఆడుతున్నారు. అకస్మాత్తుగా అక్కడికి చేరుకున్న ఎస్సై హరిప్రసాద్ మహిళలను బతుకమ్మ ఆడకుండా అడ్డుకున్నారు. పూజ జరుగుతున్న ఈ సమయంలో అమ్మవారి విగ్రహం ఎదురుగా ఉన్న మైకులు సైతం లాగేసినట్లు స్థానికులు ఆరోపించారు. ఆలస్యంగా వెలుగులోకి వచ్చిన ఈ విషయం పై సోషల్ మీడియాలో నిరసనలు, విమర్శలు వెల్లువెత్తుతున్నాయి. జరిగిన సంఘటనపై నందిగామ డిఎస్పీ జి.వి.రమణమూర్తి స్పందించారు. జరిగిన సంఘటన దురదృష్టకరమని స్వయంగా తానే విచారిస్తున్నట్లుగా తెలిపారు. విచారణ అనంతరం బాధ్యులపై చర్యలు తీసుకుంటామన్నారు.