FBI Screens US : పెద్దన్న జో ప్రమాణస్వీకారోత్సవానికి భారీ భద్రత.. అమెరికా చరిత్రలోనే ఇలా తొలిసారి

FBI Screens US : అగ్రరాజ్యం అమెరికాలో కొత్త అధ్యక్షుడు కొలువుదీరే సమయం ఆసన్నమవుతుంది. అధికార మార్పిడి సమయంలో రాజధాని వాషింగ్టన్ డిసీలో జరిగిన అల్లర్లను దృష్టిలో పెట్టుకుని ఆ ప్రాంతంలో కట్టుదిట్టమైన భద్రతను ఏర్పాట్లు చేస్తున్నారు. జో బైడెన్ ప్రమాణ స్వీకార సమయంలో నిరసనలు మళ్ళీ చెలరేగే అవకాశం ఉందని భావిస్తున్న అధికారులు పటిష్ట బందోబస్తుని ఏర్పాటు చేస్తున్నారు. దీంతో ఆ ప్రాంతం మిలటరీ జోన్ ను తలపిస్తోంది.

భద్రతా బలగాల్లోని వారే నిరసనలకు కారణం అవుతారంటూ ఎఫ్‌బీఐ హెచ్చరించింది. దీంతో అధికారులు మరింత ఆందోళనకు గురవుతున్నారు. ఈ నేపథ్యంలో దళాల్లో ప్రతి సభ్యుడు అత్యంత అప్రమత్తతతో వ్యవహరించాలని ఉన్నతాధికారులు ఆదేశించారు. ఈ నేపథ్యంలో వాషింగ్టన్‌లోని క్యాపిటల్​ భవనం సహా ఇతర కేంద్ర ప్రభుత్వ కార్యాలయాల చుట్టూ భారీ బ్యారికేడ్లను ఏర్పాటు చేశారు. ఇనుప కంచెలను బిగించారు. స్థానిక పోలీసులతో సహా ఇప్పటికే 25,000 మందితో కూడిన నేషనల్​ గార్డ్స్‌ దళం క్యాపిటల్‌ భవనం చుట్టూ పహారా కాస్తోంది.

బైడెన్​ ప్రమాణస్వీకారోత్సవం సందర్భంగా ట్రంప్ మద్దతుదారులు పెద్ద ఎత్తున ఆందోళన చేసి ప్రమాదం ఉందని అమెరికా అత్యన్నత దర్యాప్తు సంస్థ ఎఫ్​బీఐ హెచ్చరించడంతో ఎటువంటి అవాంఛనీయ ఘటనలు జరిగినా దీటుగా ఎదుర్కొనేందుకు సిద్ధంగా ఉన్నామని వాషింగ్టన్​ సీక్రెట్​ సర్వీస్ ​స్పెషల్‌ ఏజెంట్​ ఇన్‌ఛార్జి మాథ్యూ మిల్లర్​ చెప్పారు. అమెరికా చరిత్రలో ఈ తరహా భద్రతా ఏర్పాట్లు ఎప్పుడూ జరగలేదని వెల్లడించారు. మరోవైపు న్యూయార్క్‌ నగరంలో నెలకొన్న ఆందోళనకర పరిస్థితుల దృష్ట్యా తమ ఔట్‌లెట్‌లను మూసివేస్తున్నట్లు స్టార్‌బక్స్‌ ప్రకటించింది.

Also Read: కొండకోనల్లో దారిలేని చోట అత్యవసర పరిస్థితుల్లో ఆపద్బంధువు బైక్ అంబులెన్స్