Nawaz Sharif షాబాజ్ ప్రభుత్వం కీలక నిర్ణయం.. మాజీ ప్రధాని నవాజ్ షరీఫ్ తిరిగి పాకిస్తాన్ వచ్చేందుకు అనుమతి!
యూకేలో చికిత్స పొందుతున్న పాక్ మాజీ ప్రధాని నవాజ్ షరీఫ్ తిరిగి తన దేశానికి వెళ్లేందుకు మార్గం సుగమమైంది. తాజాగా నవాజ్ షరీఫ్కు పాస్పోర్టు జారీ చేసింది షాబహజ్ ప్రభుత్వం.
Updated on: Apr 26, 2022 | 5:58 PM
Nawaz Sharif to Return Pakistan: యూకేలో చికిత్స పొందుతున్న పాక్ మాజీ ప్రధాని నవాజ్ షరీఫ్ తిరిగి తన దేశానికి వెళ్లేందుకు మార్గం సుగమమైంది. పాకిస్థాన్కు మూడుసార్లు ప్రధానమంత్రిగా పనిచేసిన 72 ఏళ్ల నవాజ్ షరీఫ్పై మాజీ ప్రధాని ఇమ్రాన్ ఖాన్ ప్రభుత్వం అనేక అవినీతి కేసులను మోపింది. దీంతో ఆయన వైద్య చికిత్స నిమిత్తం పాకిస్తాన్ నుంచి వెళ్లిపోయారు. ఆయన ప్రస్తుతం బ్రిటన్తో తలదాచుకుంటున్నారు. అయితే, తాజాగా నవాజ్ షరీఫ్కు పాస్పోర్టు జారీ చేసింది. పాకిస్తాన్లో అధికారంలోకి వచ్చిన కొత్త ప్రభుత్వం.
నవంబర్ 2019లో లాహోర్ హైకోర్టు నుండి అనుమతి పొందిన తరువాత, నవాజ్ షరీఫ్ చికిత్స కోసం లండన్ బయలుదేరారు. అల్ అజీజియా మిల్స్ అవినీతి కేసులో నవాజ్ షరీఫ్కు కూడా బెయిల్ మంజూరైంది. లాహోర్లోని అత్యంత భద్రత కలిగిన కోట్ లఖ్పత్ జైలులో అతను ఏడేళ్ల జైలు శిక్షను అనుభవిస్తున్నారు. అయితే, తాజాగా అతని తమ్ముడు, షాబాజ్ షరీఫ్ నేతృత్వంలో పాకిస్తాన్లో కొత్త ప్రభుత్వం ఏర్పాటు అయ్యింది. దీంతో పాకిస్తాన్ తిరిగి వచ్చేందుకు అతనికి పాస్పోర్ట్ జారీ చేసిందని స్థానిక వార్తాపత్రిక పేర్కొంది.
పాస్పోర్ట్ స్వభావం చాలా సరళంగా ఉంటుందని, తత్కాల్ కేటగిరీలో తయారు చేసినట్లు స్థానిక మీడియా వెల్లడించింది. నవాజ్ షరీఫ్ పాకిస్తాన్ ముస్లిం లీగ్ నవాజ్ (PML N) అధినేత. పాకిస్తాన్ పీపుల్స్ పార్టీ (పీపీపీ) అధ్యక్షుడు బిలావల్ భుట్టో జర్దారీ గత వారం లండన్లో ఆయనను కలిశారు. ఈ సందర్భంగా జర్దారీ పాక్ రాజకీయాల్లో ప్రస్తుత పరిస్థితుల గురించి సమాచారం ఇచ్చారు. ఈ సందర్భంగా ఇరువురు నేతలు రాజకీయాలు, దేశ ప్రయోజనాలకు సంబంధించిన అన్ని అంశాల్లో కలిసికట్టుగా పనిచేయాలని చర్చించుకున్నట్లు సమాచారం.
2019లో బ్రిటన్కు వెళ్లే ముందు పాకిస్తాన్కు తిరిగి వస్తానని షరీఫ్ వాగ్దానం చేశారు. అందులో నాలుగు వారాల్లో చట్టం, న్యాయ ప్రక్రియను ఎదుర్కొంటానని హామీ ఇచ్చారు. దీని తర్వాత వైద్యులు అతను ప్రయాణానికి సరిపోతారని నిర్ధారించారు. నవాజ్ షరీఫ్ చికిత్స కోసం లండన్ వెళ్లి అక్కడే ఉండిపోయారు.
