‘ఇజ్రాయెల్కు మద్దతు ఇస్తే, పరిణామాలు తీవ్రంగా ఉంటాయి’.. ప్రపంచ దేశాలకు ఇరాన్ స్ట్రాంగ్ వార్నింగ్!
ఇజ్రాయెల్, ఇరాన్ మధ్య యుద్ధం కారణంగా మూడవ ప్రపంచ యుద్ధం సంభవించే అవకాశం ఉందేమో అనిపిస్తుంది. ఇరాన్ పై ఇజ్రాయెల్ జరిపిన ప్రాణాంతక వైమానిక దాడిలో 78 మంది మరణించగా, వందలాది మంది గాయపడ్డారని వెల్లడైంది. అదే సమయంలో, ఇరాన్ కూడా ఇజ్రాయెల్పై ప్రతీకారం తీర్చుకుంది. ఇజ్రాయెల్ సైనిక స్థావరాలు, పౌరులపై దాడి చేసింది.
Updated on: Jun 14, 2025 | 8:02 PM
ఇజ్రాయెల్, ఇరాన్ మధ్య యుద్ధం కారణంగా మూడవ ప్రపంచ యుద్ధం సంభవించే అవకాశం ఉందేమో అనిపిస్తుంది. ఇరాన్ పై ఇజ్రాయెల్ జరిపిన ప్రాణాంతక వైమానిక దాడిలో 78 మంది మరణించగా, వందలాది మంది గాయపడ్డారని వెల్లడైంది. అదే సమయంలో, ఇరాన్ కూడా ఇజ్రాయెల్పై ప్రతీకారం తీర్చుకుంది. ఇజ్రాయెల్ సైనిక స్థావరాలు, పౌరులపై దాడి చేసింది.
ఇంతలో, ఇరాన్ ప్రపంచ దేశాలకు పెద్ద హెచ్చరిక చేసింది. పాశ్చాత్య దేశాలు ఇజ్రాయెల్కు మద్దతు ఇస్తే, వారు తీవ్ర పరిణామాలను ఎదుర్కోవలసి ఉంటుందని ఇరాన్ ఒక ప్రకటన విడుదల చేసింది. ఇరాన్ వైమానిక దాడిని ఆపడంలో పాశ్చాత్య దేశాలు ఇజ్రాయెల్కు సహాయం చేస్తే, అమెరికా, బ్రిటన్, ఫ్రాన్స్ సైనిక స్థావరాలు, వారి యుద్ధనౌకలను లక్ష్యంగా చేసుకుంటామని ఇరాన్ తెలిపింది.
ఇదిలావుంటే, ఇరాన్ ప్రజలు నియంతృత్వాన్ని కూలదోయాలని ఇజ్రాయెల్ ప్రధాన మంత్రి బెంజమిన్ నెతన్యాహు విజ్ఞప్తి చేశారు. ఇరాన్ ప్రజలు అక్కడి నియంతృత్వానికి వ్యతిరేకంగా నిలబడాలని బెంజమిన్ నెతన్యాహు పిలుపునిచ్చారు. ఇజ్రాయెల్ పోరాటం మీకు వ్యతిరేకంగా కాదు, ఇరాన్ నియంతృత్వానికి వ్యతిరేకంగా ఉందని అన్నారు. ఇజ్రాయెల్ సైనిక చర్య ఇరాన్ ప్రజలకు స్వేచ్ఛకు మార్గం సుగమం చేస్తుందని ఆయన అన్నారు.
ఇక, ఇజ్రాయెల్ దాడుల తర్వాత ఇరాన్ సుప్రీం నాయకుడు అలీ ఖమేనీ ఆగ్రహం వ్యక్తం చేశారు. ఇజ్రాయెల్ యుద్ధాన్ని ప్రారంభించిందని, ఇప్పుడు ఈ యుద్ధం నుండి బయటపడలేమని ఆయన అన్నారు. ఈ నేరం నుండి ఇజ్రాయెల్ తప్పించుకోలేమని, అది తనకు తానుగా బాధాకరమైన విధిని ఎంచుకుందని ఆయన అన్నారు. ఇజ్రాయెల్ కోసం నరకం తలుపులు తెరుచుకుంటాయని, మనం ఇజ్రాయెల్ను నాశనం చేస్తామని ఆయన అన్నారు.
ఇజ్రాయెల్పై ఇరాన్ తీసుకున్న ప్రతీకార చర్యకు ఆపరేషన్ ట్రూ ప్రామిస్ 3 అని పేరు పెట్టారు. అదే సమయంలో, ఇజ్రాయెల్ నిర్వహించిన వైమానిక దాడికి ఆపరేషన్ రైజింగ్ లయన్ అని పేరు పెట్టారు. దాడులు చేయడమే తప్ప.. దెబ్బ తినడం తెలియని ఇజ్రాయెల్కు ఈసారి చేదు అనుభవం ఎదురైంది. ఇజ్రాయెల్ ఆయుధాల పేరు చెబితే మొదట గుర్తుకొచ్చేది దుర్భేద్యమైన ఐరన్ డోమ్. నిప్పుల వర్షంలా ప్రత్యర్థులు రాకెట్లు, డ్రోన్లు, మిస్సైళ్లు ప్రయోగిస్తున్నా.. ఉక్కు కవచంలా ఆ దాడులను అడ్డుకుంటుంది. అయితే ఇరాన్ ప్రయోగించిన బాలిస్టిక్ మిస్సైళ్లను ఐరన్డోమ్ సమర్థవంతంగా అడ్డుకోలేకపోయింది. ఇరాన్ ప్రయోగించిన బాలిస్టిక్ మిస్సైళ్లు ఇజ్రాయెల్ రాజధాని టెల్అవీవ్తో పాటు పలు ప్రాంతాల్లో నిప్పుల వర్షం కురిపించాయి.
ఐరన్ డోమ్ను లోకల్గా కిప్పాట్ బర్జెల్గా వ్యవహరిస్తారు. ఇది స్వల్పశ్రేణి ఆయుధాలను అడ్డుకుంటుంది. ఇందులో రాడార్, కంట్రోల్ సెంటర్, మిసైల్ బ్యాటరీ ఉంటాయి. దూసుకొస్తున్న ముప్పును ముందుగా రాడార్ పసిగడుతుంది. అది ఎక్కడ నేలను తాకుతుందో అంచనావేస్తుంది. అక్కడ ఎటువంటి నిర్మాణాలు లేకపోతే.. వదిలేస్తుంది. అదే జనావాసాలు అయితే మాత్రం. రాకెట్ను ప్రయోగించి దానిని ధ్వంసం చేస్తుంది. ఈ వ్యవస్థ తయారీలో ఇజ్రాయెల్కు చెందిన ఎల్టా, ఎంప్రెస్ట్ సిస్టమ్, రఫెల్ సంస్థలు పనిచేశాయి.
2006లో హెజ్బొల్లా-ఇజ్రాయెల్ మధ్య ఘర్షణ చోటు చేసుకొంది. నాడు వేల రాకెట్లను ఆ సంస్థ టెల్ అవీవ్ పై ప్రయోగించింది. దీంతో భారీగా ప్రాణనష్టం చోటు చేసుకుంది. దీంతో ఇజ్రాయెల్ ఐరన్ డోమ్ తయారీకి నిర్ణయించింది. దీనికి అమెరికా పూర్తిగా సాయం చేసింది. 2008 నాటికి టమిర్ క్షిపణులను పరీక్షించింది. 2009లో ప్రాథమిక ప్రయోగాలు పూర్తి చేసింది. 2011 నాటికి అందుబాటులోకి తెచ్చింది. ఐరన్ డోమ్ సక్సెస్ రేటు 90శాతానికి పైగానే ఉంది. ఎయిర్ డిఫెన్స్ వ్యవస్థల్లో ఇదో అద్భుతం. అయితే 2023 అక్టోబర్ 7 నాటి హమాస్ దాడులను, తాజా ఇరాన్ క్షిపణి దాడులను అడ్డుకోవడంలో ఈ ఐరన్ డోమ్ వ్యవస్థ తడబడిందని నిపుణులు చెబుతున్నారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
