కేక్ కట్ చేసి క్యాండిల్స్ ఎందుకు ఊదుతాం..? 99శాతం మందికి తెలియని నిజాలు ఇవే..

పుట్టినరోజు వేడుక అంటేనే అందమైన కేక్, దానిపై మిలమిలలాడే రంగురంగుల కొవ్వొత్తులు, అందరూ కలిసి పాడే బర్త్‌డే సాంగ్ గుర్తొస్తాయి. కేక్ కట్ చేయడానికి ముందు కళ్లు మూసుకుని ఓ కోరిక కోరుకోవడం, ఆపై కొవ్వొత్తులను ఊదడం నేడు ప్రపంచవ్యాప్తంగా ఆనవాయితీగా మారింది. అయితే పుట్టినరోజున తీపి కేకును కట్ చేయడం, కొవ్వొత్తులను వెలిగించి ఊదే ఈ ఆచారం వెనుక వేల సంవత్సరాల పురాతన చరిత్ర, ఆసక్తికర నమ్మకాలు దాగి ఉన్నాయని మీకు తెలుసా? పుట్టినరోజులను ఒక ప్రత్యేక దినంగా జరుపుకునే సంప్రదాయం ప్రాచీన ఈజిప్టులో మొదలైంది. అయితే ఆ రోజుల్లో ఇది సామాన్య ప్రజల కోసం కాదు. కేవలం ఈజిప్టు రాజులు సింహాసనాన్ని అధిష్టించిన పట్టాభిషేక దినాన్ని వారి పుట్టినరోజుగా భావించేవారు. పట్టాభిషేకంతో రాజు సాధారణ మానవుడి స్థాయి నుంచి దేవుడిగా పునర్జన్మ పొందుతాడని ఈజిప్షియన్లు నమ్మేవారు.

గ్రీకుల తీపి నైవేద్యం.. ఆర్టెమిస్ దేవత పూజలు

ఈజిప్షియన్ల భావనను ప్రాచీన గ్రీకులు కేకులతో ముడిపెట్టారు. గ్రీకులు తమ చంద్ర దేవత అయిన ఆర్టెమిస్‌ను ప్రసన్నం చేసుకోవడానికి గుండ్రంగా, చంద్రుని ఆకారంలో ఉండే ప్రత్యేకమైన కేకులను తయారుచేసేవారు. స్వచ్ఛమైన పిండి, తేనెతో చేసిన ఈ కేకులను దేవత ఆలయాల్లో నైవేద్యంగా సమర్పించేవారు. ఈ క్రమంలోనే కేకుల సంప్రదాయం విస్తరించింది.

కొవ్వొత్తులు వెలిగించడం వెనుక చంద్ర కాంతి

చంద్రుని ఆకారంలో ఉండే కేకులపై వెలిగించిన కొవ్వొత్తులను ఉంచే పద్ధతిని కూడా గ్రీకులే ప్రారంభించారు. చంద్రుని చల్లని, ప్రకాశవంతమైన కాంతిని ప్రతిబింబించేలా కొవ్వొత్తులను వెలిగించేవారు. అంతేకాకుండా ఆ పవిత్ర జ్వాల ద్వారా తమ మనసులోని ప్రార్థనలు నేరుగా స్వర్గంలోని దేవతలకు చేరుతాయని వారు ప్రగాఢంగా విశ్వసించేవారు.

కొవ్వొత్తి పొగతో దేవుడికి చేరే కోరిక

నేడు పుట్టినరోజున కొవ్వొత్తులను ఊదే ముందు ఏదైనా కోరిక కోరుకోవడం సాధారణం. ఈ ఆచారం కూడా గ్రీకుల నమ్మకం నుంచే పుట్టింది. కొవ్వొత్తిని ఊదినప్పుడు పైకి లేచే పొగ… మానవ మనసులోని నిగూఢ కోరికలను నేరుగా దేవుడి వద్దకు మోసుకెళ్తుందని వారు నమ్మేవారు.

జర్మనీ కిండర్‌ఫెస్ట్.. దుష్టశక్తుల భయం

జర్మన్ సంప్రదాయం: జర్మనీలో ప్రాచుర్యం పొందిన కిండర్‌ఫెస్ట్ అనే వేడుక ద్వారా పిల్లల పుట్టినరోజున కొవ్వొత్తులు వెలిగించే సంప్రదాయం మరింత పెరిగింది. కేక్ మధ్యలో ఒక పెద్ద కొవ్వొత్తిని రోజంతా వెలిగించి, అది పిల్లల భవిష్యత్తుకు వెలుగునిస్తుందని భావించేవారు.

దుష్టశక్తుల నివారణ: మధ్యయుగ ఐరోపాలో పుట్టినరోజు జరుపుకునే వారిపై దుష్టశక్తుల కన్ను పడుతుందని భయపడేవారు. ఆ చెడు శక్తులను పారద్రోలడానికే రోజంతా దీపాలు, కొవ్వొత్తులు వెలిగించేవారు. శబ్దాలు చేసి దుష్టశక్తులను తరిమేందుకు బంధుమిత్రులంతా కలిసి కేరింతలు కొడుతూ, పాటలు పాడేవారు. ఒకప్పుడు కేవలం రాజులు, సంపన్నులకే పరిమితమైన ఈ వేడుక కాలక్రమేణా సామాన్యులందరి జీవితాల్లో భాగమైంది. కాబట్టి వచ్చేసారి మీ పుట్టినరోజున కేక్‌పై కొవ్వొత్తులు ఊదేటప్పుడు.. మీరు వేల ఏళ్ల నాటి ఘనమైన చారిత్రక సంప్రదాయాన్ని కొనసాగిస్తున్నారని గుర్తుంచుకోండి.