Telangana: ఇది కదా కావాల్సింది.. తెలంగాణ విద్యార్థులకు భలే గుడ్ న్యూస్..

విద్యార్థులపై ఆర్థిక భారం తగ్గించేందుకు తెలంగాణ ప్రభుత్వం మరో వినూత్న నిర్ణయం తీసుకుంది. రాష్ట్రవ్యాప్తంగా ప్రభుత్వ ఆధ్వర్యంలోని అన్ని విద్యాసంస్థల్లో చదువుతున్న చిన్నారుల నుంచి డిగ్రీ విద్యార్థుల వరకు.. వారి రోజువారీ అవసరాలన్నింటినీ ఒకే చోట అందించేలా ప్రత్యేక “ఎడ్యుకేషన్ కిట్”లను ప్రవేశపెట్టింది.

ఈ పథకం ద్వారా దాదాపు 9.5 లక్షల మంది విద్యార్థులు లబ్ధి పొందనున్నారు. చదువుకు అవసరమైన స్టేషనరీతో పాటు, హాస్టల్ జీవనానికి అవసరమైన పరికరాలు కూడా ఇందులో భాగం కావడం ఈ కిట్ ప్రత్యేకత. విద్యార్థుల వయస్సు, తరగతి ఆధారంగా బ్యాగ్‌లను డిజైన్ చేశారు. చిన్నపిల్లలకు తేలికపాటి బ్యాగ్‌లు, పెద్ద తరగతుల విద్యార్థులకు ఎక్కువ సామర్థ్యం గల బ్యాగ్‌లు అందించనున్నారు. అంతేకాదు, పెన్నులు, పెన్సిల్స్, స్కెచ్‌లు, పౌచ్‌లు వంటి స్టేషనరీ వస్తువులు పూర్తి సెట్‌గా ఇవ్వనున్నారు.

ఇదే కాకుండా, హాస్టల్ విద్యార్థుల అవసరాలను దృష్టిలో పెట్టుకుని ప్లేట్, గ్లాస్, స్పూన్ వంటి భోజన పరికరాలు, అలాగే దుప్పట్లు కూడా అందించనున్నారు. ప్రతి వస్తువుపై ప్రభుత్వ గుర్తింపు ఉండేలా ప్రత్యేకంగా డిజైన్ చేస్తున్నారు. విద్యార్థుల గుర్తింపును సులభతరం చేసేందుకు ఐడీ కార్డులను తప్పనిసరి చేస్తున్నారు. అలాగే ఉన్నత తరగతుల్లో చదివే విద్యార్థినుల యూనిఫామ్‌లో మార్పులు చేయాలని కూడా ప్రభుత్వం భావిస్తోంది.

ఈ కిట్‌ల సరఫరా కోసం టెండర్ ప్రక్రియను కఠినంగా అమలు చేస్తున్నారు. ఎంపికైన కాంట్రాక్టర్ రాష్ట్రంలోని అన్ని జిల్లాలకు సరఫరా చేయాల్సి ఉంటుంది. ఎలాంటి లోపాలు చోటుచేసుకున్నా డిపాజిట్ జప్తు చేసే విధంగా కఠిన నిబంధనలు అమలు చేస్తున్నారు. సరఫరాలో పారదర్శకత కోసం ట్రాకింగ్ వ్యవస్థను కూడా ఏర్పాటు చేస్తున్నారు. మొత్తంగా, ఒకే కిట్‌తో విద్యార్థుల అన్ని అవసరాలను తీర్చే ఈ పథకం… విద్యా రంగంలో ప్రభుత్వ కొత్త ఆలోచనగా నిలుస్తోంది.

Also Read: కొత్తిమీర ఇంటి వద్ద కట్టలు కట్టలుగా రావాలంటే ఇలా చేయండి..