Telangana: తెలంగాణ ప్రజలకు షాకింగ్ న్యూస్.. వచ్చే నెల నుంచి పెరగనున్న విద్యుత్ ఛార్జీలు.. ఎంతంటే..?

తెలంగాణ ప్రభుత్వం విద్యుత్ వినియోగదారులపై రూ.5,420 కోట్ల అదనపు భారాన్ని మోపాలని నిర్ణయించింది. ఈ మొత్తాన్ని ట్రూ అప్ ఛార్జీల రూపంలో ప్రజల నుండి వసూలు చేయనున్నారు. రాష్ట్రంలోని డిస్కంలు నష్టపోయిన ఈ మొత్తాన్ని భర్తీ చేసేందుకు ఈ పెంపును అమలు చేస్తున్నారు. నవంబర్ నెల నుండి ప్రతి యూనిట్ విద్యుత్ వినియోగంపై 30 పైసలు అదనంగా వసూలు చేయనున్నారు. డిసెంబర్ నెల నుండి ఈ అదనపు ఛార్జీ 50 పైసలకు పెరగనుంది. ఈ ట్రూ అప్ ఛార్జీలు రాష్ట్రంలోని రెండు ప్రధాన విద్యుత్ పంపిణీ సంస్థల పరిధిలో వేర్వేరు కాలపరిమితులతో అమలులో ఉండనున్నాయి. దక్షిణ తెలంగాణలోని టిజిఎస్‌పిడిసిఎల్ పరిధిలోని వినియోగదారులకు 29 నెలల పాటు ఈ ఛార్జీలు వర్తిస్తాయి. అదేవిధంగా ఉత్తర తెలంగాణలోని టిజిఎన్‌పిడిసిఎల్ పరిధిలోని వినియోగదారులకు 26 నెలల పాటు ఈ అదనపు భారం పడనుంది. ఈ కొత్త ఛార్జీలు రాష్ట్రంలోని అందరి వినియోగదారులపై వర్తించవు. గృహజ్యోతి పథకం కింద 200 యూనిట్ల కన్నా తక్కువ విద్యుత్ వినియోగిస్తున్న సుమారు 53 లక్షల కుటుంబాలకు ఈ ట్రూ అప్ ఛార్జీల నుండి మినహాయింపు లభించింది.

అయితే 200 యూనిట్లకు మించి విద్యుత్‌ను వినియోగించే కుటుంబాలపైనే ఈ అదనపు భారం పడుతుంది. ప్రస్తుత ఒక సాధారణ మధ్యతరగతి కుటుంబం కూడా 200 యూనిట్ల కన్నా ఎక్కువ విద్యుత్‌ను వినియోగిస్తుందని, కనుక ఈ పెంపు అత్యధిక కుటుంబాలపై ప్రభావం చూపుతుందని నిపుణులు చెబుతున్నారు. 2023-24, 2024-25 సంవత్సరాలలో విద్యుత్ సరఫరాకు సంబంధించి డిస్కంలు నష్టపోయిన రూ.5,420 కోట్లను పూడ్చేందుకు ఈ ఛార్జీల పెంపును ప్రభుత్వం అమలు చేస్తోంది. మునుపటి ప్రభుత్వంతో చేసుకున్న ఒప్పందాలు లేదా ఉచిత విద్యుత్ వంటి పథకాల కారణంగా డిస్కంలకు నష్టం వాటిల్లిందని, ఆ నష్టాన్ని ఇప్పుడు ప్రజల నుండి వసూలు చేయాలని ప్రభుత్వం ప్రణాళిక రూపొందించింది.

అయితే ప్రభుత్వ నిర్ణయంపై మధ్యతరగతి ప్రజలు తీవ్ర అసంతృప్తిని వ్యక్తం చేస్తున్నారు. ఇప్పటికే వివిధ రకాల పన్నులు, ధరల భారంతో ఇబ్బంది పడుతున్న సామాన్యుడికి ఈ కరెంటు బిల్లుల పెంపు అదనపు భారాన్ని మోపనుంది. గతంలో బిఆర్ఎస్ ప్రభుత్వం హయాంలో రూ.12,403 కోట్ల అదనపు భారాన్ని ప్రభుత్వమే భరించి డిస్కంలకు చెల్లించిందని, ఇప్పుడు కాంగ్రెస్ ప్రభుత్వం ఈ భారాన్ని ప్రజలపై మోపడం సరికాదని విమర్శలు వస్తున్నాయి. ఆధునిక కాలంలో 200 యూనిట్ల విద్యుత్ ఒక సాధారణ ఇంటి అవసరాలకు ఏ మాత్రం సరిపోదని, ఫ్రిజ్, ఫ్యాన్, బల్బులు వంటి వాటిని వాడినా ఆ పరిమితి దాటిపోతుందని ప్రజలు అభిప్రాయపడుతున్నారు. ఈ నిర్ణయంపై ప్రభుత్వం పునరాలోచించాలని ప్రజలు విజ్ఞప్తి చేస్తున్నారు.