Watch: దైవ దర్శనానికి వెళ్తుండగా.. వెంటాడిన మృత్యువు.. తృటిలో తప్పించుకున్న కుటుంబం!

దైవ దర్శనానికి వెళ్తుండగా ఓ కుటుంబానికి తృటిలో పెనుప్రమాదం తప్పింది. కారు రన్నింగ్‌లో ఉండగా ఒక్కసారిగా మంటలు చెలరేగాయి. ప్రమాదాన్ని గమనించిన డ్రైవర్ వెంటనే అప్రమత్తమై కారును పక్కకు ఆపేసి లోపల ఉన్న వారికి దించేశాడు. దీంతో వారు ప్రాణాలతో బయటపడ్డారు. సమాచారం అందుకున్న ఫైర్ సిబ్బంది వెంటనే ఘటనా స్థలానికి చేరుకొని మంటలను అదుపుచేశారు. వివరాల్లోకి వెళ్తే.. నాగర్ కర్నూల్ జిల్లా ఈగలపెంట సమీపంలో గతరాత్రి ఓ కారులో ప్రమాదవశాత్తు మంటలు చెలరేగి దగ్ధం కావడం కలకలం రేపింది. హైదరాబాద్ లోని చిక్కడపల్లికి చెందిన ఆకుల ప్రణవ్ కుమార్ తన ఐదుగురి కుటుంబ సభ్యులతో కలిసి శ్రీశైలం దర్శనానికి వెళ్తున్నారు.

ఈ క్రమంలో ఇంటి నుంచి మొదలైన కారు ప్రయాణం శ్రీశైలానికి కొద్ది దూరంలో అనుకోని ప్రమాదానికి గురైంది. ఈగలపెంట సమీపంలో ఒక్కసారిగా కారు ముందు భాగం నుంచి పోగ రావడాన్ని ప్రణవ్ గమనించాడు. దీంతో వెంటనే రోడ్డుపై కారును ఆపి కుటుంబ సభ్యులను వెంటనే కారు నుంచి దింపేశాడు. అందరూ కారుకు దూరంగా వెళ్లిపోయారు. ఇంతలోనే పొగలు కాస్త మంటలుగా మారాయి. క్షణాల్లోనే ఆ మంటలు పూర్తిగా కారు మొత్తం వ్యాప్తించాయి.

దీంతో ప్రణయ్‌ వెంటనే పోలీసుకుల సమాచారం ఇచ్చాడు. ప్రమాద సమాచారం అందుకున్న పోలీసులు ఘటనాస్థలికి చేరుకున్నారు. సమీపంలో ఉన్న జెన్‌కో కు చెందిన ఫైర్ ఇంజిన్‌తో మంటలను ఆర్పే ప్రయత్నం చేశారు. అప్పటికే చూస్తుండగానే కారు ఆగ్నికి ఆహుతై… బూడిదలా మారిపోయింది. ఇక ఈ ఘటన హైదరాబాద్ – శ్రీశైలం ప్రధాన రహదారిపై జరగడంతో సుమారు రెండు కిలోమీటర్ల మేర ట్రాఫిక్ జామ్ అయ్యింది.

ఇక అప్పటివరకు ప్రయాణించిన కారులో ఒక్కసారిగా మంటలు చెలరేగడం, దగ్ధం కావడం పట్ల ప్రయాణికులు షాక్ కు గురయ్యారు. ఏ మాత్రం ఏమరపాటుగా ఉన్న పెను ప్రమాదం సంభవించేదని భయాందోళనకు గురయ్యారు. అయితే కారులో మంటలు చెలరేగడానికి గల కారణాలపై పోలీసులు ఆరా తీస్తున్నారు.

వీడియో చూడండి..

మరిన్ని తెలంగాణ వార్తల కోసం ఇక్కడ  క్లిక్ చేయండి.