Hyderabad: అర్ధరాత్రి హైదరాబాద్‌లో ఎరుపెక్కిన రోడ్లు.. ఏరులై పారిన ఎర్రని ద్రవం! భయంతో జనం గజగజ
హైదరాబాద్‌లో నగరంలోని కొన్ని ప్రాంతాల్లో సోమవారం రాత్రి రోడ్లపై ఎర్రటి ద్రావణం ఏరులై పారింది. భయంకరమైన దుర్వాసనతో రోడ్లపై పారుతున్న ఈ నీటిని చూసి స్థానికులు భయంతో గజగజ వణికిపోయారు..
Updated on: Nov 26, 2024 | 12:00 PM
హైదరాబాద్, నవంబర్‌ 26: హైదరాబాద్ రోడ్లపై ఒక్కసారిగా ఎర్రటి రక్తం మాదిరి రంగు ద్రవం ఒక్కసారిగా వరదలా పారింది. అక్కడ ఏ హత్యా జరగలేదు. ఎవరికీ ఏ గాయాలు కాలేదు. కానీ చూసేందుకు అచ్చం రక్తం మాదిరే ఉన్న ఎర్రని ఎరుపురంగు కలిగిన చిక్కని ద్రవం రోడ్లపై ఏరులై పారుతుంటే స్థానికులు బెంబేలెత్తిపోయారు. చివరికి అసలు విషయం తెలిసి ఊపిరి పీల్చుకున్నారు. ఇందుకు సంబంధించిన వీడియో క్లిప్‌లు ప్రస్తుతం సోషల్ మీడియాలో వైరల్‌గా మారాయి. హైదరాబాద్ జీడిమెట్ల పారిశ్రామిక ప్రాంతంలో ఈ ఘటన సంభవించింది.
హైదరాబాద్ నగరంలోని జీడిమెట్ల పారిశ్రామికవాడను ఆనుకొని ఉన్న సుభాష్ నగర్, వెంకటాద్రినగర్ వంటి కొన్ని కాలనీల్లో సోమవారం రాత్రి ఒక్కసారిగా ఎరుపురంగులో ఉన్న చిక్కని మురుగు నీరు మ్యాన్‌హోళ్ల నుంచి ఉబికివచ్చింది. భరించలేనంత దుర్గంధంతో రోడ్లపై నీరు పారడంతో స్థానికులు ఊపిరి సలపక ఉక్కిరిబిక్కిరయ్యారు. ఘాటైన రసాయనాలు కలిసిన దుర్గంధం ఆ ప్రాంతమంతా వ్యాప్తి చెందడంతో స్థానికులు తీవ్రంగా ఇబ్బందిపడ్డారు. వయోధిక వృద్ధులు ఊపిరి పీల్చుకోవడంలో సతమతపడ్డారు. దీంతో తీవ్రమైన దగ్గు, కళ్లు ఎరుపెక్కి మంట రావడం వంటి లక్షణాలు కనిపించాయి. ఈ రోడ్లపై ప్రయాణించడానికి వాహనదారులు సైతం వెనుకాడారు.
దీనిపై స్థానిక మున్సిపల్ అధికారులకు స్థానికులు పెద్ద ఎత్తున ఫిర్యాదులు చేశారు. జీడిమెట్ల పారిశ్రామిక ప్రాంతంలో ఉండే కొన్ని గోడౌన్లల్లో పెద్దఎత్తున కెమికల్స్‌ను నిల్వ చేస్తుందటం వల్ల.. అక్కడి చిన్నచిన్న యూనిట్ల నుంచి రసాయనిక వ్యర్థాలు నేరుగా డ్రైనేజీలోకి వదులుతున్నారు. జీడిమెట్ల, బాలానగర్ వంటి పారిశ్రామికవాడల్లో వందల సంఖ్యలో భారీ, చిన్న తరహా పరిశ్రమలు దశాబ్దాల కాలం నుంచీ కొనసాగుతున్నాయి. వాటిల్లో చాలావరకు ఫార్మాసూటికల్స్‌ రంగానికి సంబందించినవే. వీటివల్లనే ఈ పరిస్థితి తలెత్తినట్లు గుర్తించారు. కాలనీలోని కొన్ని గోదాముల నిర్వాహకులు రసాయనాలను నేరుగా డ్రైనేజీలో కలిపేయడం ఏంటని ప్రశ్నిస్తున్నారు. బల్దియా అధికారులకు తాము ఎన్నిసార్లు ఫిర్యాదు చేసినా పట్టించుకోవడం లేదని స్థానికులు ఆవేదన వ్యక్తం చేశారు
