Telangana: తెలంగాణకు భారీ వర్ష సూచన.. అప్రమత్తంగా ఉండాలన్న వాతావరణ శాఖ..
తెలంగాణలో శని, ఆది వారాల్లో ఓ మోస్తరు నుంచి భారీ వర్షాలు కురిసే అవకాశం ఉందని హైదరాబాద్ లోని భారత వాతావరణ శాఖ హెచ్చరించింది. ఈనెల 27, 28 తేదీల్లో రాష్ట్రంలోని పలు జిల్లాలో భారీ వర్షాలు కురిసే అవకాశం ఉందని
Updated on: Aug 25, 2022 | 9:53 PM
Telangana: తెలంగాణలో శని, ఆది వారాల్లో ఓ మోస్తరు నుంచి భారీ వర్షాలు కురిసే అవకాశం ఉందని హైదరాబాద్ లోని భారత వాతావరణ శాఖ హెచ్చరించింది. ఈనెల 27, 28 తేదీల్లో రాష్ట్రంలోని పలు జిల్లాలో భారీ వర్షాలు కురిసే అవకాశం ఉందని వెల్లడించింది. వాయువ్య బంగాళాఖాతంలో ఏర్పడిన ఆవర్తనం.. దక్షిణ జార్ఖండ్ పరిసర ప్రాంతాల్లో కొనసాగుతుందని, ఇది సముద్ర మట్టానికి 4.5 కిలోమీటర్ల ఎత్తున విస్తరించినట్లు వాతావరణ శాఖ పేర్కొంది. దీంతో పాటు మరో ఆవర్తనం దక్షిణ అంతర్గత తమిళనాడు పరిసర ప్రాంతాల్లో సముద్ర మట్టానికి 5.8 కిలోమీటర్ల వరకు విస్తరించిందని తెలిపింది. తెలంగాణలో పశ్చిమ, వాయువ్య దిశల నుంచి కింది స్థాయి గాలులు వీస్తున్నాయని పేర్కొంది. దీని ప్రభావంతో ఈనెల29 వరకు వర్షాలు కురిసే అవకాశం ఉందని తెలిపింది.
గడిచిన 24 గంటల్లో వికారాబాద్ జిల్లాలో పలు చోట్ల భారీ వర్షం కురిసినట్లు హైదరాబాద్ వాతావరణ కేంద్రం తెలిపింది. భారీ వర్షాల హెచ్చరికల నేపథ్యంలో ప్రజలు అప్రమత్తంగా ఉండాలని అధికారులు హెచ్చరిస్తున్నారు. లోతట్టు ప్రాంతాల ప్రజలు ముందస్తు జాగ్రత్తలు తీసుకోవాలని సూచిస్తున్నారు. మరోవైపు అధికారులు కూడా లోతట్టు ప్రాంతాల్లో ముందస్తు జాగ్రత్త చర్యలు చేపడుతున్నారు. గత రెండు రోజులుగా హైదరాబాద్ నగరంలో అక్కడక్కడ స్వల్పంగా వర్షాలు కురుస్తున్న విషయం తెలిసిందే. వర్షాలు ఎక్కవుగా కురిస్తే నదుల్లో వరద ప్రవాహం పెరిగే అవకాశం ఉంది. దీంతో నది పరివాహక ప్రాంతాల్లో ప్రజలు ఇబ్బందులు పడకుండా అవసరమైన చర్యలు చేపట్టేందుకు అధికారులు చర్యలు తీసుకుంటున్నారు.
మరిన్ని తెలంగాణ వార్తల కోసం చూడండి..
