Elections: ఓటు వేసేప్పుడు సెల్ఫీ తీసుకుంటే ఇక అంతే.. సీరియస్‌ వార్నింగ్ ఇచ్చిన ఈసీ..

ప్రస్తుతం సెల్ఫీ ఒక ట్రెండ్‌. కొత్త ప్రదేశానికి వెళ్లినా, సినిమాకు వెళ్లినా ఎక్కడికి వెళ్లినా ఒక సెల్ఫీ తీసుకోవాల్సిందే. ఇంట్లో ఉన్నా రోజుకో సెల్ఫీ దిగి సోషల్‌ మీడియాలో పోస్ట్ చేస్తున్న రోజులివీ. సమయం సందర్భం లేకుండా ఎక్కడపడితే అక్కడ దేనితో పడితే దానితో, ఎవరితో అయినా సెల్ఫీ దిగేందుకు సిద్ధమైపోతున్నారు యూత్.

అయితే సాధారణంగా ఏ సెలబ్రిటీతోనో, పొలిటికల్ లీడర్‌తోనో, కొత్త ప్రాంతానికి వెళ్లినప్పుడు సెల్ఫీ దిగితే పెద్దగా సమస్య ఉండదు. కానీ కొందరు హద్దులు మీరుతున్నారు. చట్టాలను ఉల్లంఘించేలా సెల్పీలను దిగుతున్నారు. అత్యుత్సాహంతో ఓటు వేస్తూ మరీ సెల్ఫీలు దిగుతున్నారు. దిగిన వారు దిగినట్లు ఉండకుండా సోషల్‌ మీడియాలో పోస్ట్ చేస్తున్నారు. అంతేకాకుండా పలానా వారికి ఓటు వేశామని కామెంట్‌ చేస్తూ మరీ పోస్టులు పెడుతున్నారు. దీంతో ఇప్పుడు ఇదే అంశంపై ఎలక్షన్‌ కమిషన్‌ సీరియస్‌గా దృష్టిసారించింది.

కొందరు యువత ఏకంగా ఈవీఎం మిషన్‌ కనిపించేలా సెల్ఫీలు దిగుతూ పోస్ట్‌లు చేశారు. దీంతో ఇది ఇతర ఓటర్లను ప్రభావితం చేయడం… రహస్య బ్యాలెట్ విధానాన్ని ధిక్కరించినట్లు అవుతోంది. ఈ అంశాన్ని పరిగణలోకి తీసుకున్న అధికారులు సీరియస్‌ వార్నింగ్ ఇస్తున్నారు. ఇకపై ఎవరైనా పోలింగ్ బూత్ లో ఫోటో దిగితే వారి ఓటు హక్కును రద్దు చేస్తామని హెచ్చరించారు. అంతేకాదు వారు వేసిన ఓటును కూడా లెక్కలోకి తీసుకోరు. ఒకసారి ఓటు హక్కు రద్దు అయితే.. ఆ తర్వాత మళ్లీ ఓటు పొందడం చాలా కష్టం. వీటన్నిటితో పాటు చట్ట ప్రకారం చర్యలు కూడా ఉంటాయి.

నిజానికి పోలింగ్ బూత్‌లోకి స్మార్ట్ ఫోన్‌లను అనుమతించకుండా ఎన్నికల కమిషన్‌ నిషేధించింది. అయితే కొందరు మాత్రం దొంగ చాటుగా, అధికారులకు దొరక్కుండా.. పోలింగ్ బూత్ లోపలికి ఫోన్లను తీసుకెళ్తున్నారు. ఓటు వేసి దాన్ని సోషల్ మీడియాలో పోస్ట్ చేయడం ద్వారా అత్యుత్సాహాన్ని ప్రదర్శిస్తున్నారు. ఇది ఇకపై సరదా కాదు సీరియస్ యాక్షన్ అంటూ వార్నింగ్ ఇస్తుంది ఎలక్షన్ కమిషన్. చూశారుగా అత్యుత్సాహానికి పోయి సెల్ఫీలు దిగితే తగిన మూల్యం చెల్లించకతప్పదు.

మరిన్ని తెలంగాణ వార్తల కోసం క్లిక్ చేయండి..