Rain Alert: ఓలప్పో.! అల్పపీడనం.. ఆపై వాయుగుండం.. పిడుగులాంటి వార్త పేల్చిన వాతావరణ శాఖ

ఆగ్నేయ బంగాళాఖాతంలో ఈనెల 22వ తేదీన ఒక అల్పపీడనం ఏర్పడే అవకాశం ఉంది. తదుపరి 48 గంటల్లో ఈ అల్పపీడనం పశ్చిమ వాయువ్య దిశలో కదిలి మరింత బలపడి ఈనెల 24వ తేదీన వాయుగుండంగా మారే అవకాశం ఉంది. తదుపరి 48 గంటలలో ఈ వాయుగుండం పశ్చిమ వాయువ్య దిశలో కదిలి మరింత బలపడి నైరుతి బంగాళాఖాతం ప్రాంతానికి చేరుకునే అవకాశం ఉంది. తెలంగాణ రాష్ట్రంలో కిందిస్థాయి గాలులు ప్రధానంగా తూర్పు, ఈశాన్య దిశల నుంచి వీస్తున్నవి. ఈ నేపధ్యంలో రాగల 3 రోజుల్లో వాతావరణ విశేషాలు ఇలా ఉండనున్నాయి. బుధవారం, గురువారం, శుక్రవారం రాష్ట్రంలో పొడి వాతావరణం ఏర్పడే అవకాశం ఉంది. రాగల రెండు రోజుల్లో రాష్ట్రంలోని కొన్ని ప్రాంతాల్లో కనిష్ట ఉష్ణోగ్రతలు సాధారణం నుంచి రెండు నుండి మూడు డిగ్రీలు తక్కువగా ఉండే అవకాశం ఉంది. గురువారం రాష్ట్రంలోని కొన్ని ఉత్తర, పశ్చిమ జిల్లాలలో అక్కడక్కడ చలిగాలులు వీచే అవకాశం ఉందని వాతావరణ శాఖ తెలిపింది.

మరోవైపు ఏపీలో కూడా అల్పపీడన ప్రభావం కారణంగా కొన్ని ప్రాంతాల్లో వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. ముఖ్యంగా ఉత్తరాంద్రలో వచ్చే 3 రోజులు పొడి వాతావరణం ఏర్పడే అవకాశం ఉందన్నారు. దక్షిణ కోస్తాలోని పలు ప్రాంతాల్లో తేలికపాటి నుంచి మోస్తరు వర్షాలు.. అలాగే ఒకట్రెండు చోట్ల ఉరుములతో కూడిన మెరుపులు సంభవించే అవకాశముంది. రాయలసీమలోని పలు ప్రాంతాల్లో కూడా వచ్చే 2 రోజులు తేలికపాటి నుండి మోస్తరు వర్షాలు లేదా జల్లులు ఒకటి లేదా రెండు చోట్ల కురిసే అవకాశముంది. అలాగే శుక్రవారం తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు ఒకటి లేదా రెండు చోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముందని వాతావరణ శాఖ తెలిపింది.