ఆహా ఇలా చేశారంటే చికెన్ కంటే టేస్ట్.. మటన్ కంటే బలం..

మీల్ మేకర్, ఎగ్ కలయికతో తయారుచేసే ఈ అద్భుతమైన వంటకం చికెన్ మటన్‌ల రుచిని మించిపోయేలా ఉంటుంది. ఈ రెసిపీ అన్నం, చపాతీ, లేదా పప్పుచారు, సాంబార్, రసం వంటి వాటికి సైడ్ డిష్‌గా చాలా బాగుంటుంది. పిల్లలకు సాయంత్రం వేళల్లో రుచికరమైన స్నాక్‌గా కూడా ఇది చక్కటి ఎంపిక. దీనిని తయారుచేయడం చాలా సులువు, దీని రుచి ఒకసారి చూస్తే ఇంకెప్పుడూ ఇలాగే తినాలనిపిస్తుంది.

తయారీకి కావలసిన పదార్థాలు:

మీల్ మేకర్ (చిన్నవి): 100 గ్రాములు,  గుడ్లు: 2,  ఉప్పు: రుచికి సరిపడా,  మిరియాల పొడి: అర టేబుల్ స్పూన్ (దంచుకున్నది),  పసుపు: చిటికెడు,  కారం: రుచికి సరిపడా,  కార్న్‌ఫ్లోర్: 2 టేబుల్ స్పూన్లు,  నూనె: 6 టేబుల్ స్పూన్లు (వేయించడానికి 4 టేబుల్ స్పూన్లు, మసాలాకు 2 టేబుల్ స్పూన్లు), జీలకర్ర: అర టేబుల్ స్పూన్ ,  ఉల్లిపాయ: 1 (సన్నగా తరిగినది), అల్లం వెల్లుల్లి పేస్ట్: 1 టేబుల్ స్పూన్,  టమాటాలు: 2 (చిన్న ముక్కలుగా తరిగినవి),  ధనియాల పొడి: 1 టేబుల్ స్పూన్,  గరం మసాలా: పావు టేబుల్ స్పూన్,  పచ్చిమిర్చి: 1 (పొడవుగా కట్ చేసినది, కావాలంటే ఎక్కువ వేసుకోవచ్చు), కొత్తిమీర: అలంకరణకు

తయారీ విధానం:

1. మీల్ మేకర్ సిద్ధం చేయుట:  ముందుగా స్టవ్ వెలిగించి ఒక గిన్నెలో ఒక గ్లాసు నీటిని మరిగించాలి. నీళ్లు మరిగేటప్పుడు కొద్దిగా ఉప్పు వేయాలి. ఉప్పు వేయడం వల్ల మీల్ మేకర్‌కి ఉప్పు పట్టి రుచిగా ఉంటుంది. నీళ్లు మరిగిన తర్వాత స్టవ్ ఆపి, మీల్ మేకర్‌ను వేసి బాగా కలిపి, మూత పెట్టి ఐదు నిమిషాల పాటు పక్కన ఉంచాలి. ఐదు నిమిషాల తర్వాత మీల్ మేకర్ బాగా ఉబ్బుతుంది. నీళ్లు చల్లబడిన తర్వాత, మీల్ మేకర్‌లోని నీటిని గట్టిగా పిండేసి, ఒక గిన్నెలోకి తీసుకోవాలి. అస్సలు నీరు లేకుండా పిండాలి.

2. గుడ్లు, మసాలాతో మిశ్రమం తయారీ: మీల్ మేకర్ ఉన్న గిన్నెలో రెండు గుడ్లు కొట్టి వేయాలి. మీల్ మేకర్ పరిమాణాన్ని బట్టి గుడ్ల సంఖ్యను మార్చుకోవచ్చు. దీనికి సరిపడా ఉప్పు, అర టేబుల్ స్పూన్ దంచిన మిరియాల పొడి, చిటికెడు పసుపు, రుచికి సరిపడా కారం వేసి బాగా కలపాలి. తరువాత, రెండు టేబుల్ స్పూన్ల కార్న్‌ఫ్లోర్ (మొక్కజొన్న పిండి) వేసి కలపాలి. కార్న్‌ఫ్లోర్ వేయడం వల్ల గుడ్లు విడిపోకుండా మీల్ మేకర్‌కి చక్కగా పట్టుకుంటాయి. ఈ మిశ్రమాన్ని మూతపెట్టి 15 నిమిషాల పాటు పక్కన ఉంచాలి. ఇలా చేయడం వల్ల మీల్ మేకర్‌కు ఉప్పు, కారం బాగా పడతాయి.

3.మీల్ మేకర్ వేయించుట: స్టవ్ వెలిగించి ఒక పాన్ పెట్టి, అందులో నాలుగు టేబుల్ స్పూన్ల నూనె వేసి వేడి చేయాలి. నూనె వేడెక్కిన తర్వాత, 15 నిమిషాలు నానబెట్టిన మీల్ మేకర్ మిశ్రమాన్ని పాన్‌లో వేయాలి. దీన్ని వెంటనే కదపకుండా, సిమ్‌లో ఒక నిమిషం పాటు అలాగే వదిలేయాలి. ఇలా చేయడం వల్ల గుడ్డు సోయాకి బాగా అంటుకుంటుంది. ఒక నిమిషం తర్వాత, నెమ్మదిగా కలుపుతూ మీడియం నుండి తక్కువ మంటపై మంచి రంగు వచ్చే వరకు, అంటే సుమారు నాలుగు నిమిషాలు వేయించాలి. వేగిన తర్వాత ఒక ప్లేట్‌లోకి తీసి పక్కన పెట్టుకోవాలి.

4. మసాలా తయారీ:  అదే పాన్‌లో మరో రెండు టేబుల్ స్పూన్ల నూనె వేసుకోవాలి. నూనె వేడైన తర్వాత అర టేబుల్ స్పూన్ జీలకర్ర వేయాలి. సన్నగా తరిగిన ఒక ఉల్లిపాయను వేసి బంగారు రంగు వచ్చేవరకు వేయించాలి. ఉల్లిపాయలు మరీ ఎక్కువ వేగనవసరం లేదు. తరువాత ఒక టేబుల్ స్పూన్ అల్లం వెల్లుల్లి పేస్ట్ వేసి, పచ్చివాసన పోయేంత వరకు వేయించాలి.

5.టమాటాలు, మసాలాలు చేర్చుట:  చిన్న ముక్కలుగా తరిగిన రెండు టమాటాలను వేసి, మెత్తబడేంత వరకు మగ్గనివ్వాలి. టమాటాలు మరీ ఎక్కువ వేగనవసరం లేదు. ఇప్పుడు చిటికెడు పసుపు, ఒక టేబుల్ స్పూన్ ధనియాల పొడి, రుచికి సరిపడా కారం (కారం ఎక్కువగా ఉంటే రుచి బాగుంటుంది), పావు టేబుల్ స్పూన్ గరం మసాలా, మరియు ఒక కట్ చేసిన పచ్చిమిర్చి (రుచిని బట్టి ఎక్కువ వేసుకోవచ్చు) వేసి బాగా కలపాలి. మసాలా పచ్చివాసన పోయేంత వరకు లైట్‌గా వేయించాలి. మసాలాలకు సరిపడా ఉప్పు వేసి అర నిమిషం పాటు వేయించుకోవాలి.

6. చివరి మెరుగులు: ఇప్పుడు వేయించి పక్కన పెట్టుకున్న మీల్ మేకర్ మిశ్రమాన్ని మసాలాలో వేసి, సిమ్ లో ఉంచి బాగా కలపాలి. అంతా బాగా కలిపిన తర్వాత, మూత పెట్టి రెండు నిమిషాల పాటు తక్కువ మంటపై మగ్గనివ్వాలి. ఇలా చేయడం వల్ల టమాటా మసాలా రుచి మీల్ మేకర్‌కి బాగా పట్టి అద్భుతంగా ఉంటుంది. రెండు నిమిషాల తర్వాత మూత తీసి చూస్తే నూనె పైకి తేలి చక్కగా వేగి ఉంటుంది. కావాలంటే కొత్తిమీరతో అలంకరించుకోవచ్చు. ఈ రుచికరమైన మీల్ మేకర్ ఎగ్ రెసిపీ మీ అతిథులను కూడా ఆకట్టుకుంటుంది. చాలా సింపుల్‌గా, రుచికరంగా తయారుచేయగలిగే ఈ వంటకం ప్రతి ఒక్కరికీ నచ్చుతుంది.

మీ మల్లెచెట్టు చిన్నదైనా కొమ్మకొమ్మకి విపరీతంగా పూలు పూయాలంటే ఇలా చేయండి