Chicken Rate: నా సామి రంగ.. చికెన్ ప్రియులు ఎగిరి గంతేసే న్యూస్..

మీరు నాన్ వెజ్ ప్రియులా.. అందునా చికెన్ అంటే మరీ ఇష్టమా..? కూర వండుకుని.. ఫ్రై చేసుకుని.. ఓ కుమ్ముడు కుమ్మేస్తూ ఉంటారా..? అయితే మీరు ఈ గుడ్ న్యూస్ తెలుసుకోవాల్సిందే. చికెన్ ధరలు భారీగా పడిపోయాయి. మొన్నీమధ్య స్కిన్ లెస్ చికెన్ కేజీ ధర 300 రూపాయలకు చేరిన విషయం తెలిసిందే. తాజాగా అందులో సగం రేటుకే కేజీ చికెన్ వచ్చేస్తుంది. గత వారం రోజులుగా చికెన్ ధరలు నేల చూపులు చూస్తున్నాయి.  ప్రసుతం హైదరాబాద్‌లో  లైవ్ కోడి అయితే కేజీ రూ. 100 నుంచి రూ. 120 మధ్య విక్రయిస్తున్నారు.  స్కిన్ లెస్ కేజీ చికెన్.. 150 నుంచి రూ. 180 మధ్య దొరుకుతోంది. సోమవారం నుంచి శ్రావణ మాసం స్టార్టయింది. శ్రావణమాసంలో తెలుగు లోగిళ్లలో నీసు అన్న మాటే ఉండదు. ఇంట్లో వండటం కాదు కదా.. బయట నుంచి తెచ్చుకుంటామన్న, బయట తిని వస్తామన్న ఒప్పుకోరు. నెలంతా వ్రతాలు పాటించిపడంతో పాటు నియమ నిష్టలతో పూజలు చేస్తారు. దీంతో ఈ నెల అంతా ధరలు ఇలానే ఉంటాయని వ్యాపారులు చెబుతున్నారు. దీంతో శ్రావణమాసమా అది మా కోసమే.. ఇప్పుడు చికెన్ ఎంజాయ్ చేసేది మేమే అంటున్నారు బ్యాచిలర్ బ్రదర్స్.

ఇక ఎగ్ ధర మాత్రం తగ్గడం లేదు. బయట షాపుల్లో ఒక్కో ఎగ్‌ను రూ. 6 పైనే అమ్ముతున్నారు. ఇక మటన్ కేజీ రూ. 800 నుంచి రూ. 1000 వరకు అమ్ముతున్నారు. వాతావరణంలో మార్పులు వచ్చినా… ఎండలు అయినా.. వానల అయినా.. శ్రావణమాసం అయినా..  మటన్ ధరల్లో మాత్రం మార్పు కనిపించడం లేదు. ఇక కూరగాయలు ధరలు కూడా ఎక్కువగా ఉన్నాయి. ఏ కూరగాయను పట్టుకున్నా కేజీ 60 నుంచి 100 రూపాయల మధ్య చెప్తున్నారు.  టమాట ఒక్కటే కొద్దిగా 50కి దిగువన ఉంది.

మరిన్ని తెలంగాణ వార్తల కోసం ఇక్కడ క్లిక్ చేయండి..