మీ సీక్రెట్ మాటలు మీ ఫోన్‌కు ఎలా తెలుస్తున్నాయి..? వెంటనే ఈ సెట్టింగ్స్ మార్చండి..

పండుగలు వస్తున్నాయంటే చాలు.. ఇంట్లో కుటుంబ సభ్యులంతా కూర్చుని ఏమేం కొనాలి, ఎలాంటి బట్టలు లేదా బూట్లు ఎంచుకోవాలనే చర్చలు మొదలవుతాయి. అయితే ఆ చర్చ ముగిసి, తీరిగ్గా కూర్చుని ఫోన్ తెరిచి ఫేస్‌బుక్, ఇన్‌స్టాగ్రామ్ లేదా యూట్యూబ్ స్క్రోల్ చేస్తుండగానే సరిగ్గా కొద్దిసేపటి క్రితం మాట్లాడిన అవే బ్రాండ్లు, మోడల్స్ ప్రత్యక్షమవుతాయి. కింద Buy Now బటన్‌తో సహా ఆఫర్లు దర్శనమిస్తాయి. దీంతో చాలామందిలో ఒక బలమైన అనుమానం మొదలవుతోంది. మన ఫోన్ లేదా ఇంట్లోని స్మార్ట్ టీవీ రహస్యంగా మన మాటలను వింటున్నాయా? మన ప్రైవసీ పూర్తిగా గాల్లో కలిసిపోయిందా? అని. నిపుణుల పరిశోధనల ప్రకారం.. స్మార్ట్‌ఫోన్‌లు 24 గంటలూ మన మాటలన్నింటినీ రికార్డ్ చేసి నేరుగా డేటా సెంటర్లకు పంపడం సాంకేతికంగా, బ్యాండ్‌విడ్త్ పరంగా చాలా కష్టం. కానీ అంతకంటే శక్తివంతమైన అల్గారిథమ్‌లు, ప్రిడిక్టివ్ AI మన వెనుకే పనిచేస్తున్నాయి.

వేక్ వర్డ్స్ : గూగుల్ అసిస్టెంట్, సిరి, అలెక్సా వంటి వాయిస్ అసిస్టెంట్లు హే గూగుల్ లేదా అలెక్సా వంటి పదాలను గుర్తించడానికి ఎల్లప్పుడూ మైక్రోఫోన్‌ను స్టాండ్‌బై మోడ్‌లో ఉంచుతాయి.

డిజిటల్ ఫుట్‌ప్రింట్ – బిహేవియరల్ ట్రాకింగ్: మీరు కొన్ని రోజుల క్రితం లైక్ చేసిన పోస్ట్, ఒక వెబ్‌సైట్‌లో సెర్చ్ చేసిన వస్తువు, లేదా మీ బ్రౌజింగ్ హిస్టరీ ఆధారంగా AI మీ తదుపరి అడుగును అంచనా వేస్తుంది.

లొకేషన్ – సోషల్ గ్రాఫ్ ట్రాకింగ్: మీతో పాటు ఉన్న కుటుంబ సభ్యుల్లో ఎవరైనా ఆ వస్తువు గురించి సెర్చ్ చేసినా, ఒకే వై ఫై లేదా లొకేషన్ నెట్‌వర్క్‌లో ఉన్న మీ స్క్రీన్‌పై కూడా ఆ ప్రకటనలు కనిపించేలా యాడ్ నెట్‌వర్క్‌లు పనిచేస్తాయి.

మీ ఫోన్ మైక్రోఫోన్ వాడుతోందని ఎలా కనిపెట్టాలి?

స్క్రీన్‌పై ప్రైవసీ ఇండికేటర్లు: ఆధునిక ఆండ్రాయిడ్, ఐఓఎస్ పరికరాలలో మైక్ లేదా కెమెరా ఆన్ అయినప్పుడు స్క్రీన్ పైభాగంలో ఆకుపచ్చ లేదా నారింజ రంగు చుక్క వెలుగుతుంది. మీరు ఏ యాప్ వాడకపోయినా ఆ చుక్క కనిపిస్తే, బ్యాక్‌గ్రౌండ్‌లో ఏదో ఒక యాప్ డేటాను రికార్డ్ చేస్తోందని అర్థం.

బ్యాటరీ – మొబైల్ డేటా క్షీణత: ఏ ప్రత్యేక పనీ చేయకపోయినా బ్యాటరీ వేగంగా డ్రైన్ అవ్వడం, మొబైల్ డేటా అసాధారణంగా ఖర్చు కావడం కూడా నిఘా యాప్‌ల లక్షణం.

భద్రతాపరమైన ముప్పులు

సున్నితమైన వ్యక్తిగత చర్చలు, బ్యాంకింగ్ లేదా వృత్తిపరమైన వివరాలు అనధికారికంగా మూడో పక్షానికి చేరే ప్రమాదం ఉంది. మన బలహీనతలు, అవసరాలను పసిగట్టి సైబర్ నేరగాళ్లు అదే తరహా నకిలీ ఆఫర్లతో వలపన్ని ఆర్థిక మోసాలకు పాల్పడే అవకాశం ఉంది.

సైబర్ రక్షణకు నిపుణుల మార్గదర్శకాలు

యాప్ పర్మిషన్లపై నిఘా పెట్టండి

• ఫోన్ Settings > Apps > Permission Manager లోకి వెళ్లండి.
• Microphone, Camera విభాగాలను తెరిచి, అనవసరమైన గేమ్స్, ఫొటో ఎడిటింగ్ లేదా షాపింగ్ యాప్‌లకు మైక్ అనుమతులను నిరాకరించండి.
• అత్యవసరమైన యాప్‌లకు మాత్రమే Only while using the app ఆప్షన్ ఎంచుకోండి.

స్మార్ట్ టీవీ భద్రత

టీవీ సెట్టింగ్స్‌లోకి వెళ్లి ACR (Automatic Content Recognition),Voice Recognition ఫీచర్లను డిసేబుల్ చేయండి. రిమోట్‌లోని మైక్ బటన్‌ను వాయిస్ కమాండ్ల అవసరం ఉన్నప్పుడు మాత్రమే నొక్కండి.

టెక్నాలజీ మన అవసరాలను తీర్చడానికే తప్ప, మన వ్యక్తిగత గోప్యతను హరించేదిగా మారకూడదు. కొద్దిపాటి డిజిటల్ స్పృహ, జాగ్రత్తలు పాటిస్తే సైబర్ భద్రతను కాపాడుకోవడం సులువే.