కొత్త లుక్, లగ్జరీ ఫీచర్లతో దూసుకొచ్చేసిన MG Windsor EV.. ధర మాత్రం..

ఎలక్ట్రిక్ కారులో స్టైలిష్ లుక్‌తో పాటు ప్రయాణికుల సౌకర్యానికీ ప్రాధాన్యత ఇచ్చేవారికి MG Windsor EV కొత్త ఎడిషన్‌ ఆసక్తికరంగా మారవచ్చు. ఇండల్జ్ ఎడిషన్‌లో బయట డిజైన్‌కు కొత్త రంగును జోడించడంతో పాటు, ఇంటీరియర్‌లో ప్రత్యేక సీట్లు, వెనుక ప్రయాణికుల కోసం స్క్రీన్‌ వంటి ఫీచర్లు అందించనున్నట్లు సమాచారం. అయితే బ్యాటరీ, ధర వివరాలపై అధికారిక ప్రకటన రావాల్సి ఉంది.

గోల్డెన్ కలర్‌..

MG Windsor EV మార్కెట్లోకి వచ్చి రెండేళ్లు పూర్తయిన సందర్భంగా కంపెనీ Indulge Editionను పరిమిత కాలం పాటు అందుబాటులోకి తీసుకురావడానికి సిద్ధమవుతున్నట్లు సమాచారం. ఈ ఎలక్ట్రిక్ కారు 80,000 మందికి పైగా వినియోగదారులను చేరుకున్నట్లు కంపెనీ వెల్లడించింది. తాజాగా బయటకు వచ్చిన ఫొటోలు కొత్త ఎడిషన్‌లో ఉండనున్న మార్పులపై ఆసక్తిని పెంచుతున్నాయి.

ఈ ప్రత్యేక ఎడిషన్‌లో ప్రధాన ఆకర్షణ షాడో గోల్డ్ కలర్‌ థీమ్‌. దీనికి జతగా 18 అంగుళాల బ్లాక్ అల్లాయ్ వీల్స్‌ను అందించనున్నారు. వెనుక క్వార్టర్ గ్లాస్‌పై ‘Indulge’ బ్యాడ్జింగ్‌ కూడా కనిపిస్తోంది. అయితే కారు మొత్తం డిజైన్‌లో పెద్దగా మార్పులు చేసినట్లు కనిపించడం లేదు. LED లైటింగ్‌, బాడీ క్లాడింగ్‌, బ్లాక్ రూఫ్‌, బ్లాక్ ORVMలు వంటి అంశాలు ప్రస్తుత మోడల్‌లో మాదిరిగానే కొనసాగనున్నాయి.

ఇంటీరియర్‌లో కొత్త సీట్లు..

MG Windsor EV Indulge Editionలో ఇంటీరియర్‌ కూడా ప్రత్యేకంగా ఉండనుంది. సాధారణ మోడల్‌లోని నలుపు, ఐవరీ కలర్ థీమ్‌ను కొనసాగిస్తూనే, కొత్త ఎడిషన్‌లో సీట్లకు అర్బన్ టాన్‌, బ్లాక్ కలర్ కాంబినేషన్‌ను అందించనున్నట్లు సమాచారం. లెదరెట్ సీట్లపై ఈ రంగుల కలయికతో క్యాబిన్‌కు కొత్త రూపం రానుంది. ముందు సీట్ల హెడ్‌రెస్ట్‌లపై ‘Indulge’ పేరును కూడా పొందుపరిచారు.

ప్రయాణికుల సౌకర్యం కోసం ముందు భాగంలో నెక్ కుషన్లు, వెనుక సీట్లలో పిల్లోలను అందించనున్నారు. వీటితో పాటు వెనుక ప్రయాణికుల కోసం రూఫ్‌కు అమర్చే ఫ్లిప్‌డౌన్ స్క్రీన్‌ మరో ప్రత్యేక ఆకర్షణ. దీనిని కంపెనీ ‘Prive Screen’గా పేర్కొంటున్నట్లు సమాచారం. ప్రయాణ సమయంలో వెనుక కూర్చున్నవారు వినోద కార్యక్రమాలను వీక్షించేందుకు ఇది ఉపయోగపడవచ్చు. అయితే స్క్రీన్ పరిమాణం, కనెక్టివిటీ, ఇతర ఫంక్షన్ల వివరాలు ఇంకా తెలియాల్సి ఉంది.

బ్యాటరీ, రేంజ్ విషయానికి వస్తే.. ప్రస్తుత MG Windsor EVలో 38kWh, 52.9kWh బ్యాటరీ ప్యాక్‌ ఎంపికలు ఉన్నాయి. వీటి క్లెయిమ్ చేసిన రేంజ్‌ వరుసగా 332 కిలోమీటర్లు, 449 కిలోమీటర్లుగా పేర్కొంటున్నారు. రెండు వెర్షన్లలోనూ ముందు చక్రాలకు శక్తిని అందించే ఎలక్ట్రిక్ మోటార్‌ 136hp పవర్‌, 200Nm టార్క్‌ను ఉత్పత్తి చేస్తుంది. Indulge Editionలోనూ ఇదే పవర్‌ట్రెయిన్ కొనసాగే అవకాశం ఉన్నప్పటికీ, కంపెనీ దీనిని ధ్రువీకరించాల్సి ఉంది. ప్రస్తుత MG Windsor EV ఎక్స్‌షోరూమ్ ధరలు సుమారు రూ.14.70 లక్షల నుంచి రూ.19 లక్షల వరకు ఉన్నాయి. కొత్త కలర్‌, అదనపు సౌకర్యాల కారణంగా Indulge Edition ధర కొంత ఎక్కువగా ఉండవచ్చని అంచనా.