పెట్రోల్ ఇంజిన్, ఎలక్ట్రిక్ పవర్.. BYD Seal U PHEVలో కళ్లు చెదిరే స్పెషల్ ఫీచర్లు!
భారత కార్ మార్కెట్లో ఎలక్ట్రిక్ వాహనాలతో పాటు హైబ్రిడ్ కార్లకు కూడా ఆసక్తి పెరుగుతోంది. ఈ సమయంలో చైనాకు చెందిన BYD మరో కొత్త ప్రయోగానికి సిద్ధమవుతోంది. భారత్‌లో తొలిసారిగా PHEV SUVని తీసుకురానుంది. DM-i Super Plug-in Hybrid టెక్నాలజీతో BYD Seal Uను 2026 చివరి నాటికి దేశీయ మార్కెట్లో విడుదల చేసే అవకాశం ఉంది.
Updated on: Oct 02, 2026 | 7:26 AM
ఒకవైపు నగరాల్లో ఎలక్ట్రిక్ మోడ్‌లో ప్రయాణం.. మరోవైపు దూర ప్రయాణాల్లో పెట్రోల్ ఇంజిన్ సాయం. ఈ రెండు ప్రయోజనాలను కలిపేలా ప్లగ్-ఇన్ హైబ్రిడ్ SUVని BYD భారత్‌కు తీసుకురానుంది. Seal U PHEV ఇప్పటికే భారత రహదారులపై టెస్టింగ్‌లో కనిపించినట్లు సమాచారం. 1,000 కిలోమీటర్లకు పైగా మొత్తం రేంజ్ అందించే సామర్థ్యం ఈ SUVలో ఉంది.
టెక్నాలజీతో క్యాబిన్
BYD Seal Uలో కంపెనీకి చెందిన Ocean Aesthetics డిజైన్ లాంగ్వేజ్ కనిపిస్తుంది. ముందు భాగంలో షార్ప్ లుక్‌తో స్ప్లిట్-స్టైల్ LED హెడ్‌ల్యాంప్స్ ఉన్నాయి. ముడతలతో కూడిన బానెట్, పెద్ద ఎయిర్ వెంట్స్, చిన్న బాష్ ప్లేట్ SUVకు ప్రత్యేకమైన రూపాన్ని ఇస్తాయి.
సైడ్ ప్రొఫైల్‌లో 19-అంగుళాల అల్లాయ్ వీల్స్, స్లోపింగ్ రూఫ్‌లైన్ కనిపిస్తాయి. వెనుక భాగంలో రూఫ్ స్పాయిలర్, వైపర్, స్కిడ్ ప్లేట్‌తో పాటు కనెక్టింగ్ LED టెయిల్‌లైట్స్ ఉన్నాయి.
క్యాబిన్‌లో 12.3-అంగుళాల డిజిటల్ ఇన్‌స్ట్రుమెంట్ క్లస్టర్ ఉంటుంది. వైర్‌లెస్ Apple CarPlay, Android Auto సపోర్ట్‌తో 15.6-అంగుళాల రొటేటింగ్ టచ్‌స్క్రీన్ ఇన్ఫోటైన్‌మెంట్ సిస్టమ్‌ను అందించనున్నారు. 10-స్పీకర్ Infinity సౌండ్ సిస్టమ్, పనోరమిక్ సన్‌రూఫ్, వెంటిలేటెడ్ ఫ్రంట్ సీట్లు, 7 ఎయిర్‌బ్యాగ్స్ వంటి ఫీచర్లు కూడా ఉన్నాయి.
336 hp పవర్
BYD Seal U PHEVలో 1.5-లీటర్ పెట్రోల్ ఇంజిన్ లేదా 1.5-లీటర్ టర్బో పెట్రోల్ ఇంజిన్ ఆప్షన్లు ఉండనున్నాయి. వీటిని ప్లగ్-ఇన్ హైబ్రిడ్ సిస్టమ్‌తో అనుసంధానం చేశారు. 18.3 kWh, 26.6 kWh బ్యాటరీ ప్యాక్‌లలో ఎంపికలు ఉండనున్నట్లు సమాచారం.
26.6 kWh బ్యాటరీతో 140 కిలోమీటర్ల వరకు స్వచ్ఛమైన ఎలక్ట్రిక్ రేంజ్ అందించే సామర్థ్యం ఉంది. మొత్తం పవర్ అవుట్‌పుట్ 336 hp వరకు ఉండవచ్చు. 60 లీటర్ల ఫ్యూయల్ ట్యాంక్ కూడా ఇందులో ఉంటుంది.
బ్యాటరీ, పెట్రోల్ ఇంజిన్ కలయికతో పూర్తి ట్యాంక్, ఛార్జ్‌తో 1,000 కిలోమీటర్లకు పైగా మొత్తం రేంజ్ అందించే సామర్థ్యం ఉందని కంపెనీ పేర్కొంటోంది. 18 kW DC ఫాస్ట్ ఛార్జింగ్ సపోర్ట్‌తో పాటు Vehicle-to-Load (V2L) ఫంక్షన్ కూడా ఉంటుంది. దీని ద్వారా అవసరమైన సమయంలో ఇతర ఎలక్ట్రిక్ పరికరాలకు విద్యుత్ అందించవచ్చు.
2026 చివర్లో BYD Seal U భారత్‌లో విడుదలైతే, కంపెనీ దేశంలో తీసుకురానున్న తొలి DM-i Super Plug-in Hybrid SUVగా నిలవనుంది. నగరాల్లో ఎలక్ట్రిక్ మోడ్, దూర ప్రయాణాల్లో పెట్రోల్ ఇంజిన్ సాయంతో పనిచేసే ఈ SUV భారత PHEV విభాగంలో కొత్త పోటీని తీసుకురానుంది.
