RCB vs GG : గ్రాండ్ గా WPL 2025  ఆరంభం..RCB జోరు కొనసాగిస్తుందా? గుజరాత్ జెయింట్స్ కమ్‌బ్యాక్ ఇస్తుందా?

భారతదేశంలో మహిళా క్రికెట్‌కు కొత్త గుణపాఠం నేర్పించేలా విమెన్ ప్రీమియర్ లీగ్ (WPL) మూడో సీజన్ ప్రారంభమైంది. దేశంలోని అగ్రశ్రేణి క్రీడాకారిణులు జాతీయ జెర్సీని విడిచి, తమ ఫ్రాంచైజీ జట్లు అందించే రంగురంగుల కిట్లను ధరించి పోటీపడుతున్నారు. గత సీజన్ ఛాంపియన్స్ రాయల్ ఛాలెంజర్స్ బెంగళూరు (RCB) టైటిల్‌ను కాపాడుకునే లక్ష్యంతో బరిలోకి దిగగా, గత రెండు సీజన్లలో అట్టడుగున నిలిచిన గుజరాత్ జెయింట్స్ ఈసారి మెరుగైన ప్రదర్శనను కనబర్చాలని ప్రయత్నిస్తోంది.

ఈ మ్యాచ్ వడోదరలోని కోటంబి స్టేడియంలో జరుగుతోంది. WPL మరిన్ని నగరాలకు విస్తరించే క్రమంలో ఇది మరో కొత్త వేదికగా నిలుస్తోంది. హోం గ్రౌండ్‌లో ఆడటం గుజరాత్ జెయింట్స్‌కు కొంత ప్రయోజనాన్ని అందించవచ్చు. మరోవైపు, RCB కెప్టెన్ మంధాన అద్భుత ఫామ్‌లో ఉంది. ఆమె తన దూకుడైన ఆటతీరుతో మళ్లీ అభిమానులను అలరించే అవకాశం ఉంది.

స్మృతి మంధాన టాస్ గెలిచి, తమ టైటిల్ తమ వేట బౌలింగ్ తో ప్రారంభించారు. గుజరాత్ జెయింట్స్ ఓపెనర్లను RCB కొత్త బౌలర్లు కట్టడి చేశారు. మొదట లౌరా వోల్వార్డ్ట్ వెనుదిరగగా, అరంగేట్ర మ్యాచ్‌లోనే కనికా వికెట్ తీసి హేమలతను పెవిలియన్‌కు పంపింది. బేథ్ మూనీ సీజన్ తో తొలి అర్థసెంచరీ నమోదు చేసిన తరువాత అవుట్ అయ్యారు. కాగా గుజరాత్ ప్రస్థుతం 14 ఓవర్లకు మూడు వికెట్లు నష్టపోయి 119 పరుగులు చేసింది.

కెప్టెన్ల పోరు – మంధాన vs గార్డ్నర్

ఈ మ్యాచ్‌లో ప్రధానంగా కెప్టెన్ల మధ్య పోటీ ఆసక్తికరంగా మారనుంది. ఆశ్లే గార్డ్నర్‌కు మంధానపై మంచి రికార్డు ఉంది, దీంతో ఈ ఇద్దరి పోరులో విజయం ఎవరిదో చూడాలి. అటు RCB టైటిల్‌ను కాపాడుతుందా? ఇటు గుజరాత్ జెయింట్స్ గతాన్ని మరచిపోయి కొత్త విజయాలను అందుకుంటుందా? అన్నది చూడాలి. కచ్చితంగా ఈ సీజన్ రసవత్తరమైన పోటీలకు వేదికకావడం ఖాయం!

RCBకి గాయాల సమస్య – మంధాన కీలకం

ఈ సీజన్‌లో స్మృతి మంధాన RCBకి నాయకత్వం వహించనుంది. గత సీజన్‌లో ఢిల్లీ క్యాపిటల్స్‌ను ఓడించి ఫ్రాంచైజీకి తొలి టైటిల్ అందించిన మంధాన, ఈసారి కూడా అదే జోరు కొనసాగించాలని ఆశిస్తోంది. అయితే, గాయాల సమస్య RCBను వెంటాడుతోంది. ఎలీస్ పెర్రీ, సోఫీ మోలినెక్స్, సోఫీ డివైన్ లాంటి కీలక ఆటగాళ్లు ఈ సీజన్‌లో మిస్సవ్వడం జట్టుకు పెద్ద ఎదురుదెబ్బగా మారింది. ముఖ్యంగా, గత సీజన్‌లో కీలకంగా నిలిచిన ఆశా సోభనా (టోర్నమెంట్ నుంచి దూరం) శ్రేయాంక పటేల్ (గాయంతో ఆటకు దూరం) లేకపోవడం RCB స్పిన్ దళాన్ని దెబ్బతీసింది. దీంతో మంధాన, రిచా ఘోష్ మంచి ప్రదర్శన ఇవ్వాలని అభిమానులు ఆశిస్తున్నారు.

గుజరాత్ జెయింట్స్ – కొత్త నాయకత్వం, కొత్త ఆశలు

గత రెండు సీజన్లలో 4 విజయాలు, 12 పరాజయాలతో దిగజారిన గుజరాత్ జెయింట్స్ ఈసారి కొత్త నాయకత్వం, కొత్త కోచింగ్ సిబ్బందితో బరిలోకి దిగుతోంది. ఆశ్లే గార్డ్నర్ కెప్టెన్సీ బాధ్యతలు స్వీకరించగా, గత సీజన్ కెప్టెన్ బేథ్ మూనీ స్థానాన్ని భర్తీ చేసింది. జట్టుకు సిమ్రన్ షేక్, డియాండ్రా డాటిన్ వంటి కీలక ఆటగాళ్లను వేలంలో దక్కించుకుని, బ్యాటింగ్‌లో మరింత బలాన్ని పెంచే ప్రయత్నం చేసింది. గత సీజన్లలో జెయింట్స్ సిక్సర్లు కొట్టడంలో వెనుకబడి, ఓటములను మూటగట్టుకున్నాయి. ఈసారి, ఆ లోటును అధిగమించి మెరుగైన ప్రదర్శన ఇవ్వాలని ఉవ్విళ్లూరుతోంది.

మరిన్ని క్రీడా వార్తల కోసం ఇక్కడ క్లిక్ చేయండి..