సచిన్ బాటలోనే.. బేబీ బాస్ను వదలని నైన్టీస్ నెర్వస్.. వరుసగా 2వసారి.. మొత్తం ఎన్నో తెలుసా?
వైభవ్ సూర్యవంశీ సెంచరీలు మిస్ అయి ఉండవచ్చు, కానీ వరుసగా రెండు ప్లేఆఫ్స్ మ్యాచ్ల్లో జట్టును గెలిపించే ఇన్నింగ్స్లు ఆడి అందరి మనసులను గెలుచుకున్నాడు. ఈ తప్పుల నుండి పాఠాలు నేర్చుకుని, భవిష్యత్తులో ఈ యువ సంచలనం భారత క్రికెట్లో ఒక వెలుగు వెలగడం ఖాయమని విశ్లేషకులు భావిస్తున్నారు.
Updated on: May 29, 2026 | 9:25 PM
ఐపీఎల్ 2026 ప్లేఆఫ్స్లో రాజస్థాన్ రాయల్స్ యువ బ్యాటర్ వైభవ్ సూర్యవంశీ సంచలన ఫామ్తో దూసుకుపోతున్నాడు. అయితే, దురదృష్టం అతడిని వెంటాడుతోంది. కేవలం ఒక్క మ్యాచ్ వ్యవధిలోనే వరుసగా రెండోసారి సెంచరీకి అతిసమీపంలోకి వచ్చి అవుటవ్వడం అభిమానులను కలచివేస్తోంది. ఎలిమినేటర్లో 97 పరుగులకు అవుటైన ఈ యువ కిశోరం, ఇప్పుడు క్వాలిఫైయర్-2లో 96 పరుగుల వద్ద పెవిలియన్ చేరాడు.
అదే షార్ట్ బాల్.. అదే ట్రాప్!
గుజరాత్ టైటాన్స్తో జరుగుతున్న అత్యంత కీలకమైన క్వాలిఫైయర్-2 మ్యాచ్లో వైభవ్ సూర్యవంశీ మైదానంలో పరుగుల వరద పారించాడు. ప్రత్యర్థి బౌలర్లను సుడిగాలి ఇన్నింగ్స్తో భయపెట్టిన ఈ ఎడమచేతి వాటం బ్యాటర్, శతకం వైపు అడుగులు వేశాడు. కేవలం 47 బంతుల్లోనే 8 ఫోర్లు, 7 సిక్సర్లతో 96 పరుగులు చేసి క్రీజులో పాతుకుపోయాడు.
సరిగ్గా ఈ సమయంలోనే కాగిసో రబడా వేసిన ఒక షార్ట్ పిచ్ బంతిని భారీ షాట్ ఆడేందుకు వైభవ్ ప్రయత్నించాడు. దురదృష్టవశాత్తూ ఆ బంతి కాస్త థర్డ్ మ్యాన్ దిశగా గాల్లోకి లేచింది. అక్కడ ఫీల్డింగ్ చేస్తున్న ప్రసిద్ధ్ కృష్ణ ఎలాంటి తప్పు చేయకుండా క్యాచ్ అందుకోవడంతో వైభవ్ ఇన్నింగ్స్ విషాదాంతమైంది. సెంచరీ మార్కుకు కేవలం నాలుగు పరుగుల దూరంలో నిలిచిపోయి తీవ్ర నిరాశతో అతడు క్రీజ్ వీడాడు.
సన్రైజర్స్ మ్యాచ్ రిపీట్.. అభిమానుల గుండె కోత..
ఈ వికెట్ పడిన తీరును చూసిన వారందరికీ సన్రైజర్స్ హైదరాబాద్తో జరిగిన ఎలిమినేటర్ మ్యాచ్ గుర్తుకు రాక మానదు. ఆ మ్యాచ్లో కూడా వైభవ్ సూర్యవంశీ అద్భుతంగా ఆడి 97 పరుగులు చేశాడు. అప్పుడు కూడా షార్ట్ బాల్ను ఎదుర్కొనే క్రమంలోనే అవుటై కన్నీళ్లతో మైదానాన్ని వీడాడు. ఇప్పుడు క్వాలిఫైయర్-2లో సరిగ్గా అదే తప్పును పునరావృతం చేస్తూ 96 పరుగుల వద్ద అవుట్ కావడం యాక్షన్ రిప్లేను తలపించింది. నర్వస్ నైంటీస్లో వరుసగా రెండుసార్లు ఇలాంటి తప్పిదానికి బలికావడం ఈ యువ ఆటగాడిని ఎంతగానో కలిచివేసింది. పెవిలియన్ వైపు వెళ్తూ వైభవ్ తనపై తానే తీవ్ర అసహనాన్ని ప్రదర్శించాడు.
మైదానమంతా లేచి నిలబడి చప్పట్లు..
సెంచరీ మిస్ అయినప్పటికీ, ఈ 19 ఏళ్ల కుర్రాడు ఆడిన అసాధారణ ఇన్నింగ్స్కు ముల్లాన్పూర్ మైదానం ఫిదా అయిపోయింది. క్వాలిఫైయర్ వంటి ఒత్తిడితో కూడిన మ్యాచ్లో రాజస్థాన్ రాయల్స్ జట్టును తన భుజాలపై మోసిన తీరు అమోఘం. వైభవ్ అవుటై వెనుతిరుగుతున్న సమయంలో స్టేడియంలోని ప్రేక్షకులు, రాజస్థాన్ రాయల్స్ డగౌట్తో పాటు ప్రత్యర్థి గుజరాత్ టైటాన్స్ ఆటగాళ్లు సైతం లేచి నిలబడి చప్పట్లతో (స్టాండింగ్ ఓవేషన్) అతడికి ఘన వీడ్కోలు పలికారు. సోషల్ మీడియాలో సైతం అతడి ప్రతిభను మెచ్చుకుంటూ పోస్టుల వరద కురుస్తోంది.
వైభవ్ సూర్యవంశీ సెంచరీలు మిస్ అయి ఉండవచ్చు, కానీ వరుసగా రెండు ప్లేఆఫ్స్ మ్యాచ్ల్లో జట్టును గెలిపించే ఇన్నింగ్స్లు ఆడి అందరి మనసులను గెలుచుకున్నాడు. ఈ తప్పుల నుండి పాఠాలు నేర్చుకుని, భవిష్యత్తులో ఈ యువ సంచలనం భారత క్రికెట్లో ఒక వెలుగు వెలగడం ఖాయమని విశ్లేషకులు భావిస్తున్నారు.
