ఐపీఎల్‌లో అట్టర్ ఫ్లాప్.. ఎంఎల్‌సీలో సూపర్ హిట్.. 22 సిక్సర్లతో రఫ్పాడించిన రాజస్థాన్ రౌడీ ప్లేయర్

Shimron Hetmyer: మేజర్ లీగ్ క్రికెట్ (MLC) 2025లో వెస్టిండీస్ విధ్వంసక బ్యాట్స్‌మెన్ షిమ్రోన్ హెట్మెయర్ అద్భుతమైన ఫామ్‌ను కొనసాగిస్తున్నాడు. అతను గత మూడు మ్యాచ్‌లలో తన బ్యాటింగ్ పరాక్రమాన్ని ప్రదర్శిస్తూ, 22 సిక్సర్లతో సహా 239 పరుగులు చేసి నాటౌట్‌గా నిలిచాడు. అతని మెరుపులు సీటెల్ ఓర్కాస్‌కు వరుస విజయాలను అందించి, ప్లేఆఫ్‌ల రేసులో నిలిపాడు.

MI న్యూయార్క్‌పై అజేయంగా 97 పరుగులు..

సీజన్ ప్రారంభంలో ఐదు వరుస పరాజయాలతో సతమతమవుతున్న సీటెల్ ఓర్కాస్‌కు, జూన్ 27న MI న్యూయార్క్‌తో జరిగిన మ్యాచ్‌లో షిమ్రోన్ హెట్మెయర్ ఊపిరి పోశాడు. 238 పరుగుల భారీ లక్ష్యాన్ని ఛేదించే క్రమంలో, ఓర్కాస్ ఒక దశలో కష్టాల్లో పడింది. కానీ, 6వ స్థానంలో బ్యాటింగ్‌కు వచ్చిన హెట్మెయర్ కేవలం 40 బంతుల్లో 9 సిక్సర్లతో అజేయంగా 97 పరుగులు చేసి జట్టును గెలిపించాడు. చివరి బంతికి 6 పరుగులు అవసరమైనప్పుడు కీరన్ పొలార్డ్ బౌలింగ్‌లో అద్భుతమైన సిక్సర్ కొట్టి తన జట్టుకు సంచలన విజయాన్ని అందించాడు. ఈ ఇన్నింగ్స్‌ను MLC చరిత్రలో గొప్ప ఇన్నింగ్స్‌లలో ఒకటిగా అభివర్ణిస్తున్నారు.

లాస్ ఏంజిల్స్ నైట్ రైడర్స్‌పై అజేయంగా 64 పరుగులు..

ఆ మరుసటి రోజే, లాస్ ఏంజిల్స్ నైట్ రైడర్స్‌తో జరిగిన మరో మ్యాచ్‌లో హెట్మెయర్ తన ఫామ్‌ను కొనసాగించాడు. 200 ప్లస్ లక్ష్యాన్ని ఛేదించే క్రమంలో, కేవలం 26 బంతుల్లో 6 సిక్సర్లతో 64 పరుగులు చేసి నాటౌట్‌గా నిలిచి, జట్టుకు వరుసగా రెండో విజయాన్ని అందించాడు. ఈ రెండు మ్యాచ్‌లలో అతను జట్టుకు విజయాలను అందిస్తూ హీరోగా నిలిచాడు.

శాన్ ఫ్రాన్సిస్కో యునికార్న్స్‌పై అజేయంగా 78 పరుగులు..

జూలై 1న శాన్ ఫ్రాన్సిస్కో యునికార్న్స్‌తో జరిగిన మ్యాచ్‌లో కూడా హెట్మెయర్ బ్యాట్ ఝుళిపించాడు. 169 పరుగుల లక్ష్యంతో బరిలోకి దిగిన సీటెల్ ఓర్కాస్, 89 పరుగులకే 5 వికెట్లు కోల్పోయి కష్టాల్లో పడింది. ఈ దశలో హెట్మెయర్ మరోసారి రంగంలోకి దిగి 37 బంతుల్లో 7 సిక్సర్లతో అజేయంగా 78 పరుగులు చేసి జట్టును గెలిపించాడు. ఇది అతని వరుసగా మూడవ అద్భుతమైన ఇన్నింగ్స్. ఈ మూడు మ్యాచ్‌లలో కలిపి అతను 22 సిక్సర్లతో 239 పరుగులు చేసి ఒక్కసారి కూడా అవుట్ కాకుండా జట్టుకు విజయాలను అందించడం విశేషం.

ఐపీఎల్ 2025లో రాజస్థాన్ రాయల్స్ తరపున ఆశించిన స్థాయిలో రాణించలేకపోయిన హెట్మెయర్, MLC 2025లో మాత్రం తన విధ్వంసక బ్యాటింగ్‌తో అందరి దృష్టిని ఆకర్షిస్తున్నాడు. అతని ప్రస్తుత ఫామ్ రాజస్థాన్ రాయల్స్‌కు కూడా శుభవార్త, ఎందుకంటే IPL 2026 వేలానికి ముందు అతని రిటెన్షన్ అవకాశాలను ఇది గణనీయంగా పెంచుతుంది. రాబోయే మ్యాచ్‌లలో కూడా హెట్మెయర్ ఇదే ఫామ్‌ను కొనసాగిస్తాడని, సీటెల్ ఓర్కాస్‌ను ప్లేఆఫ్‌లకు తీసుకెళ్తాడని అభిమానులు ఆశిస్తున్నారు.